قازاقستان پرەزيدەنتى قاسىم-جومارت توقاەۆ VI دۇنيەجۇزىلىك كوشپەندىلەر ويىندارىنىڭ جەڭىمپازدارى مەن جۇلدەگەرلەرىن ماراپاتتادى، دەپ حابارلايدى اقوردانىڭ ءباسپاسوز قىزمەتى.

«الەمنىڭ 100-دەن استام ەلىنەن كەلگەن سپورتشىلارمەن سايىسقا ءتۇسىپ، حالقىمىزدىڭ اتىنان ابىرويمەن ونەر كورسەتتىڭىزدەر، وتانىمىزدىڭ كوك بايراعىن كوكتە جەلبىرەتتىڭىزدەر. ۇلتتىق قۇرامامىز وتانداستارىمىزدىڭ ءۇمىتىن تولىقتاي اقتادى دەپ كامىل ايتا الامىن. مەملەكەت باسشىسى رەتىندە بارشا قازاقستاندى جىگەرلەندىرگەن وسى جەڭىستەرىڭىز ءۇشىن سىزدەرگە شىنايى ريزاشىلىعىمدى بىلدىرەمىن. بۇكىل حالقىمىز سىزدەرگە جانكۇيەر بولىپ، شىن جۇرەكتەن تىلەۋلەرىڭىزدى تىلەدى»، — دەدى ول.

تاۋەلسىزدىك سارايىندا وتكەن سالتاناتتى شارادا مەملەكەت باسشىسى سپورتشىلار مەن باپكەرلەردى دۇنيەجۇزىلىك كوشپەندىلەر ويىندارىنداعى تابىستى ونەرلەرىمەن قۇتتىقتادى. ول قۇرامانىڭ جوعارى شەبەرلىگىن جانە ەلىمىزدىڭ ۇلتتىق سپورت تۇرلەرىندەگى بەدەلىن ارتتىرۋعا قوسقان ۇلەسىن اتاپ ءوتتى.

سونىمەن قاتار پرەزيدەنت ۇلتتىق قۇرامانىڭ جالپى ەسەپتەگى جەڭىسى بۇكىل ەل ءۇشىن ۇلكەن ماقتانىش بولعانىنا توقتالدى.

«ويىن قورىتىندىسى بويىنشا قازاقستاندىق سپورتشىلار 74 مەدال جەڭىپ السا، ونىڭ 32-ءسى — التىن. بۇل تابىس حالقىمىزدىڭ قايسار مىنەزىنىڭ، بيىك رۋحىنىڭ جانە جەڭىسكە دەگەن مۇلتىكسىز ەرىك-جىگەرىنىڭ ايقىن دالەلى بولدى. ءسوزسىز، سپورتتىڭ ەڭ باستى ميسسياسى — ءوزارا قۇرمەت پەن قولداۋدى قالىپتاستىرۋ، سونداي-اق حالىقتار اراسىنداعى دوستىقتى نىعايتۋ. بۇل ءدۇبىرلى سپورتتىق وقيعا جوعارى دەڭگەيدە ۇيىمداستىرىلىپ، ونىڭ ناتيجەلەرى دە ءادىل بولدى. وسىعان بايلانىستى قىرعىز رەسپۋبليكاسىنىڭ پرەزيدەنتىنە ريزاشىلىعىمدى بىلدىرگىم كەلەدى»، — دەدى توقاەۆ.

مەملەكەت باسشىسى بۇگىندە بۇكىل الەمنىڭ نازارى تۇركى حالىقتارىنا اۋىپ وتىرعانىن ايتىپ، وسى جارىستى ودان ءارى دامىتۋ مەن تانىمال ەتۋ ءۇشىن كۇش بىرىكتىرۋگە شاقىردى.

«قازاقستان بۇل ورتاق ىسكە ءاردايىم ءوز ۇلەسىن قوسۋعا دايىن. بابالارىمىزدىڭ ەكى باۋىرلاس حالىققا قالدىرعان ەڭ باعالى مۇراسى — ءوزارا قۇرمەت پەن ماڭگىلىك دوستىق. ءبىز بۇل دانا وسيەتتى قاستەرلەۋىمىز كەرەك. ءبىز — ۇلى دالا تسيۆيليزاتسياسىنىڭ زاڭدى مۇراگەرىمىز. قاھارمان بابالارىمىز بىزگە ۇلان-عايىر جەردى امانات ەتتى، ءوز داستۇرلەرى مەن رۋحاني قۇندىلىقتارىن تابىستادى. وسى اسىل قازىنانى كوزدىڭ قاراشىعىنداي ساقتاپ، كەلەشەك ۇرپاققا اماناتتاۋ — بارىمىزگە ورتاق پارىز. بۇل قاسيەتتى ميسسيانى ءبىز ىشكى مادەنيەتىمىزدى، جوعارى ادەبىمىز بەن پاراساتىمىزدى ساقتاي وتىرىپ ورىنداۋىمىز قاجەت»، — دەدى ول.

پرەزيدەنت قازاقستان بولاشاققا باعدارلانعان، ايقىن ماقساتى مەن جوسپارى بار ۇلت رەتىندە قارقىندى دامىپ كەلە جاتقانىن باسا ايتتى.

«ءبارىمىز، سونىڭ ىشىندە ۇلتتىق سپورتپەن اينالىساتىن جاستار، باسقا دا سپورتشىلار، مەملەكەتتىك قىزمەتشىلەر مەن بيزنەسمەندەر، دارىگەرلەر مەن مۇعالىمدەر، ستۋدەنتتەر مەن عالىمدار، جۇمىسشىلار مەن باسشىلار، اسكەري قىزمەتشىلەر مەن ءتۇرلى ورگان قىزمەتكەرلەرى جوعارى مادەنيەتتىلىك، ۇستامدىلىق، ىشكى سابىرلىلىق تانىتىپ، بوس ءسوز بەن ماقتانشاقتىقتان اۋلاق بولۋىمىز كەرەك. تەك سوندا عانا ءبىز شىنىمەن دە وزىق قوعام قۇرا الامىز»، — دەپ اتاپ ءوتتى توقاەۆ.

مەملەكەت باسشىسى ۇلتتىق سپورت تۇرلەرىن دامىتۋ ۇكىمەت پەن اكىمدىكتەردىڭ ەڭ ماڭىزدى مىندەتتەرىنىڭ ءبىرى ەكەنىن ايتتى.

«قازىرگى تاڭدا بۇل سالادا 30-دان استام ارنايى مەكەمە جۇمىس ىستەيدى. استانادا ۇلتتىق سپورت ۋنيۆەرسيتەتى اشىلدى. بۇل جوعارى وقۋ ورنى سپورت سالاسىنداعى كادرلاردىڭ كاسىبي دەڭگەيىن كوتەرۋگە شەشۋشى ۇلەس قوسادى دەپ سەنەمىز. ۇلتتىق جانە ات سپورتى تۇرلەرى ورتالىعى دا ءوز جۇمىسىن ويداعىداي باستاپ كەتتى. ەلىمىزدە جىل سايىن قازاق كۇرەسى، توعىزقۇمالاق، اسىق اتۋ، كوكپار، بايگە جانە باسقا دا سپورت تۇرلەرىنەن مىڭنان استام جارىس وتەدى. تۇراقتى تۇردە ۇلتتىق سپورت تۇرلەرى فەستيۆالى، «اق بيداي» اۋىل ويىندارى، «قازاقستان بارىسى» ءتۋرنيرى ۇيىمداستىرىلادى. ەڭ باستىسى، ۇلتتىق سپورت تۇرلەرىنىڭ مارتەبەسى زاڭنامالىق تۇردە وليمپيادالىق سپورت تۇرلەرىمەن تەڭەستىرىلدى. بۇگىندە قازاق سپورتىنىڭ بەدەلى بۇرىن-سوڭدى بولماعانداي جوعارى جانە مۇنى بۇكىل الەم مويىندايدى. سپورتشىلارىمىز ءاردايىم ۇزدىكتەر قاتارىنان كورىنەدى. تاياۋدا عانا ءبىزدىڭ داڭقتى سپورتشىمىز ەلەنا رىباكينا تەننيس بويىنشا الەمنىڭ ءبىرىنشى راكەتكاسى اتاندى. بۇل — شىنىمەن دە تاريحي ءارى ايتۋلى جەتىستىك. مەن ەلەنا رىباكينانى قۇتتىقتاپ، ونىڭ ەڭبەكقورلىعىن، شەبەرلىگىن جانە جەكە مادەنيەتىنىڭ جوعارى دەڭگەيىن ەرەكشە اتاپ ءوتتىم»، — دەدى ول.

پرەزيدەنت وتاندىق سپورتتىڭ قازىرگى جەتىستىكتەرى ۇكىمەت پەن ءتيىستى مينيسترلىكتىڭ جۇيەلى ءارى دايەكتى جۇمىسىنىڭ ناتيجەسى ەكەنىن جەتكىزدى. سونىمەن قاتار، ءالى دە شەشىمىن تابۋى ءتيىس مىندەتتەردىڭ از ەمەستىگىنە توقتالدى.

«قازاقستاندا كوپتەگەن حالىقارالىق جارىستار وتكىزىلىپ كەلەدى. بۇرىن-سوڭدى بولماعان ءداستۇرلى سپورت پەن تسيفرلىق تەحنولوگيالاردى توعىستىرعان «بولاشاق ويىندارى» بيىل استانادا تابىستى ءوتتى. كەلەسى جىلى ەلوردامىز بىردەن جەتى الەم چەمپيوناتىن قابىلدايدى. الدىمىزدا اۋقىمدى جۇمىس تۇر، بىراق بۇل حالىقارالىق شارالاردىڭ بارلىعى ەلىمىزدىڭ حالىقارالىق بەدەلى مەن ابىرويىن نىعايتۋ ءۇشىن وتە قاجەت. ال 2029 جىلى الماتىدا X قىسقى ازيا ويىندارى وتەدى. وسى ءىرى تۋرنيرلەردىڭ بارلىعىن ەڭ جوعارى دەڭگەيدە ۇيىمداستىرۋىمىز كەرەك»، — دەدى توقاەۆ.

ءسوزىنىڭ سوڭىندا مەملەكەت باسشىسى سپورتشىلار جەڭىسىنىڭ ءوسىپ كەلە جاتقان جاس ۇرپاقتى جىگەرلەندىرۋدەگى ماڭىزدى ءرولىن اتاپ ءوتتى.

«جاستار سىزدەرگە قاراپ بوي تۇزەيدى، بۇل — ۇلكەن مارتەبە ءارى زور جاۋاپكەرشىلىك. جەڭىمپاز، چەمپيون بولۋ — ءبىر باسقا، ال اينالاڭداعىلارعا ۇلگى بولىپ، چەمپيون دەگەن اتقا تولىقتاي لايىق بولۋ — ءبىر باسقا. جاستاردىڭ بويىندا قايسارلىق پەن توزىمدىلىكتى عانا ەمەس، سونىمەن بىرگە ولاردى ادەپتىلىككە، مادەنيەتتىلىككە جانە تارتىپكە باۋلۋ وتە ماڭىزدى. تەك وسىلايشا ءبىزدىڭ جاستارىمىزدىڭ دەنى دە، رۋحى دا ساۋ بولادى»، — دەپ تۇيىندەدى مەملەكەت باسشىسى.

Abai.kz