قازاق سپورتشىلارىنىڭ وتكەن اپتاداعى جارقىن جەڭىسى تۋرالى قر سپورت جانە تۋريزم مينيسترلىگى مالىمدەدى. 

دزيۋدو: وزبەكستان استاناسى تاشكەنتتە وتكەن دزيۋدودان اسكەري قىزمەتكەرلەر اراسىنداعى الەم چەمپيوناتىندا ۇلتتىق قۇراما سپورتشىلارى 1 التىن، 1 كۇمىس، 4 قولا مەدال جەڭىپ الدى.

كيورلينگ: شوتلانديانىڭ ابەردين قالاسىندا ءوتىپ جاتقان كيورلينگتەن ارالاس كوماندالار اراسىنداعى الەم چەمپيوناتىندا قازاقستان قۇراماسى تاريحي ناتيجە كورسەتىپ، العاش رەت جاھاندىق دودانىڭ پلەي-وفف كەزەڭىنە جولداما الدى.

تەننيس: زارينا دياس تۇركيانىڭ كايسەري قالاسىندا ۇيىمداستىرىلعان ITF W50 تۋرنيرىنە قاتىسىپ، جارىس جەڭىمپازى اتاندى. ول فينالدا الەمنىڭ 224-ءشى، وسى جارىستىڭ 3-راكەتكاسى بەلارۋس وكىلى الەنا فالەيدەن 0:6, 6:4, 6:3 ەسەبىمەن باسىم ءتۇستى.

ارالاس جەكپە-جەك: اقش-تىڭ لاس-ۆەگاس قالاسىندا وتكەن ارالاس جەكپە-جەكتەن UFC Fight Night 245 تۋرنيرىندە اسۋ الماباەۆ (20-2) ونەر كورسەتىپ، برازيليالىق قارسىلاسى ماتەۋس نيكولاۋدى (19-4-1) تورەشىلەردىڭ ءبىراۋىزدان قابىلداعان شەشىمىمەن جەڭدى.

Abai.kz