تالعاردا 16 جاستاعى شەرزات پولاتتىڭ قازاسىنا قاتىستى الماتى وبلىسىنىڭ پوليتسيا دەپارتامەنتى قىلمىستىق كودەكستىڭ بەس بابى بويىنشا قىلمىستىق ءىس قوزعادى.

بۇل تۋرالى ىشكى ىستەر ءمينيسترىنىڭ دەپۋتاتتىق ساۋالعا بەرگەن جاۋابىندا ايتىلعان.

«تالعار قالاسىندا بولعان ش.پولاتتىڭ ولىمىنە قاتىستى الماتى وبلىسىنىڭ پوليتسيا دەپارتامەنتى قىلمىستىق كودەكستىڭ 99-بابى 2-بولىگى (ادام ءولتىرۋ), 293-بابى 3-بولىگى (بۇزاقىلىق), 115-بابى (قورقىتۋ), 432-بابى (قىلمىستى جاسىرىپ قالۋ) جانە 434-بابىمەن (قىلمىس تۋرالى حابارلاماۋ) قىلمىستىق ىستەردى تىركەپ، تەرگەپ جاتىر. تەرگەۋ بارىسى مەنىڭ جەكە باقىلاۋىمدا، وقيعا ورنىندا مينيسترلىكتىڭ ورتالىق اپپاراتىنىڭ قىزمەتكەرلەرى دە جۇمىس ىستەپ ءجۇر»، - دەلىنگەن جاۋاپتا.

قازىر سوت سانكتسياسىمەن قاساقانا كىسى ءولتىردى دەگەن كۇدىكپەن 8 ادام جانە قىلمىس تۋرالى حابارلاماۋ بويىنشا 3 ادام قاماۋعا الىنعان.

«تەرگەۋ جالعاسۋدا، ونىڭ بارىسىندا وقيعا بولعان جەردەگى باسقا دا ادامداردىڭ قاتىستىلىعى تەكسەرىلىپ، ارەكەتتەرىنە قۇقىقتىق باعا بەرىلەدى. جالپى قازىر ەلىمىزدەگى كريمينوگەندىك احۋال تۇراقتى»، - دەپ اتاپ ءوتتى ءىىم.

Abai.kz