استاناداعى «بارىس-ارەنا» سپورت كەشەنىندە رەسپۋبليكا كۇنىنە وراي قازاق كۇرەسىنەن «قازاقستان بارىسى» رەسپۋبليكالىق ءتۋرنيرى ءوتتى.

بالۋاندار سايىسى ءبىزدىڭ ەلىمىزدە 2011 جىلدان بەرى وتكىزىلىپ كەلەدى. بۇل جولى وعان رەسپۋبليكالىق ماڭىزى بار قالالاردان، وبلىستاردان جانە اوسك-نان 41 سپورتشى قاتىستى.

«قازاقستان بارىسى» بەدەلدى ءتۋرنيرىنىڭ چەمپيونى اتاعىن ارميا سپورتشىسى سەرجانت ەراسىل قاجىباەۆ ولجالادى. شەشۋشى جەكپە-جەكتە ونىڭ قارسىلاسى شىمكەنتتىك سپورتشى ەرسۇلتان مۇزاپپاروۆ بولدى، ول ەكىنشى ورىن يەلەندى. ءۇشىنشى ورىن اباي وبلىسىنان سايات شامشيەۆكە بۇيىردى.

– بۇگىن بوز كىلەمدە سالماعى مەن جاسى بويىنشا ءار ءتۇرلى سپورتشىلار جينالدى. وسىنداي ايىرماشىلىقتارعا قاراي جەكپە-جەكتىڭ ناتيجەسىن سوڭىنا دەيىن بولجاۋ مۇمكىن بولمادى. تۋرنيرگە قاتىسۋشىلار جاقسى دايىندىقپەن كەلگەن. سپورتتا ارقاشان ساتتىلىك دەگەن بار. بۇل جەڭىستىڭ ارتىندا سپورتشى مەن ونىڭ جاتتىقتىرۋشىسى ەلدار بەيسەنباەۆتىڭ وراسان زور ەڭبەگى تۇرعانىن بىلەمىن. ەراسىل ءوزىن ناعىز بالۋان ەكەنىن كورسەتتى، – دەدى قر قورعانىس مينيسترلىگى سپورت كوميتەتىنىڭ توراعاسى – ارميا ورتالىق سپورت كلۋبىنىڭ باستىعى پولكوۆنيك ارمان ابەۋوۆ.

تۋريزم جانە سپورت ءمينيسترى ەربول مىرزابوسىنوۆ ەراسىل قاجىباەۆقا چەمپيون بەلبەۋى مەن قاسقىر تەرىسىن تابىس ەتتى. ايتا كەتەيىك، جىلدىڭ ەڭ مىقتى بالۋانىنا 15 ملن تەڭگە ماراپات بەرىلدى.

وتىز جاسار ەراسىل قاجىباەۆ – سەمەي قالاسىنىڭ تۋماسى. 2015 جىلى ول «دەنە شىنىقتىرۋ جانە سپورت» ماماندىعى بويىنشا شاكارىم اتىنداعى مەملەكەتتىك ۋنيۆەرسيتەتتى ءبىتىردى. ەراسىل الماتىداعى سپورت كوميتەتى – ارميا ورتالىق سپورت كلۋبى فيليالىنىڭ وقۋ-جاتتىعۋ ورتالىعى شتاتتىق كوماندالارىن دايارلاۋ ءبولىمى دزيۋدو بولىمشەسىنىڭ سپورتشى-نۇسقاۋشىسى بولىپ قىزمەت ەتەدى. سونىمەن قاتار، 2018 جانە 2019 جىلدارى ە. قاجىباەۆ «قازاقستان بارىسى» تۋرنيرىندە ەكىنشى ورىن العان بولاتىن.

ەستەرىڭىزگە سالا كەتسەك، قر قورعانىس مينيسترلىگى اوسك-نان بۇل سايىسقا بارلىعى التى ادام – اعا لەيتەنانت مارات بايقامۇروۆ، كىشى سەرجانت ءادىل ورازباەۆ، قاتارداعى جاۋىنگەر عالىمجان قىرىقباي، ەفرەيتور ايبەك ىزتىلەۋوۆ، كىشى سەرجانت ەراسىل قاجىباەۆ جانە قر قارۋلى كۇشتەرىنىڭ قىزمەتشىسى بەيبارىس ابدىعاني قاتىستى.

سپورتشىلاردان ناعىز شىدامدىلىقتى، فيزيكالىق كۇش پەن ەموتسيونالدى كۇيدى بارىنشا شىعاراتىن تۋرنير جانكۇيەرلەرگە قىزىقتى ساتتەر سىيلاپ قانا قويماي، ماقساتقا جەتەر ادامنىڭ وزىنە سەنىمدى بولاتىنىن كورسەتتى.

قر قورعانىس مينيسترلىگىنىڭ ءباسپاسوز قىزمەتى

Abai.kz