ەلوردالىق پوليتسيا پولكوۆنيگىنە قاتىستى ءىس قوزعالدى ما؟ ۇقك تەرگەۋ ءجۇرىپ جاتقانىن راستادى...

كوميتەت استانا قالاسى پوليتسيا دەپارتامەنتى كوشى-قون قىزمەتى باسقارماسى باستىعىنىڭ ورىنباسارى ءاليا ماقاەۆاعا قاتىستى قىلمىستىق ءىس بار ەكەنىن راستادى.

ۇقك ايىپتاۋ بابى مەن ءىستىڭ ءمان-جايىن اشپادى. «ۇلتتىق قاۋىپسىزدىك كوميتەتى سوتقا دەيىنگى تەرگەپ-تەكسەرۋ جۇرگىزىپ جاتىر. تەرگەۋ مۇددەسىنە بايلانىستى وزگە اقپارات ازىرگە جاريا ەتىلمەيدى»، — دەپ حابارلادى كۇشتىك قۇرىلىم وكىلدەرى.

ولار قىلمىستىق ءىستىڭ قاي باپ بويىنشا تەرگەلىپ جاتقانىن ناقتىلامادى.

ءاليا ماقاەۆا ىشكى ىستەر ورگاندارىنداعى ەڭبەك جولىن استاناداعى الماتى اۋداندىق ىشكى ىستەر باسقارماسىندا تاربيە جانە كادر جۇمىسى جونىندەگى ينسپەكتور بولىپ باستاعان.

2004 جىلدان 2018 جىلعا دەيىن ەسىل اۋدانى كوشى-قون پوليتسياسىنىڭ اعا ينسپەكتورى بولىپ جۇمىس ىستەدى، كەيىن ايەلدەردى زومبىلىقتان قورعاۋ ماسەلەلەرىمەن اينالىسىپ، ازاماتتىق جانە يمميگراتسيا بولىمىندە ەرەكشە تاپسىرمالاردى ورىندادى.

2022 جىلى ەلوردالىق پوليتسيانىڭ كوشى-قون قىزمەتى باسقارماسى ازاماتتىق جانە يمميگراتسيا ءبولىمىن باسقاردى، كەيىن باسقارما باستىعىنىڭ ورىنباسارى بولدى.

Abai.kz