سەنات سپيكەرى ماۋلەن اشىمباەۆتىڭ توراعالىعىمەن پالاتا بيۋروسىنىڭ وتىرىسى ءوتتى. وندا دەپۋتاتتار 31 قازان كۇنى وتەتىن سەنات وتىرىسىنىڭ كۇن ءتارتىبىن بەكىتتى جانە مەملەكەت باسشىسىنىڭ تاپسىرمالارىن ىسكە اسىرۋ اياسىنداعى مىندەتتەردى تالقىلادى.

سوعان سايكەس الداعى بەيسەنبىدە سەناتورلار ەكى ماسەلەنى قارايدى. ولاردىڭ ءبىرى - «قازاقستان رەسپۋبليكاسى مەن ۆەتنام سوتسياليستىك رەسپۋبليكاسى اراسىنداعى سوتتالعان ادامداردى بەرۋ تۋرالى شارتتى راتيفيكاتسيالاۋ تۋرالى» زاڭ.

اتالعان قۇجاتتىڭ نورمالارى ەكى مەملەكەت اراسىنداعى قۇقىقتىق ىنتىماقتاستىقتى نىعايتۋعا جانە سوتتالعانداردىڭ جازاسىن وتەۋ ءۇشىن ولار ازاماتى بولىپ تابىلاتىن مەملەكەتتە قوعامعا قايتا قوسىلۋىنا جاردەمدەسۋگە ارنالعان.

سونداي-اق پالاتا وتىرىسىندا قازاقستان رەسپۋبليكاسى تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترىنىڭ ءبىر توپ سەناتوردىڭ تسيفرلاندىرۋ ماسەلەلەرى بويىنشا دەپۋتاتتىق ساۋالىنا اۋىزشا جاۋابى تىڭدالادى. سەنات سپيكەرى ماسەلەنىڭ ماڭىزدى ەكەنىنە توقتالىپ، تالقىلاۋعا باسقا دا مۇددەلى مەملەكەتتىك ورگانداردىڭ وكىلدەرى قاتىساتىنىن ايتتى.

بيۋرو وتىرىسىندا دەپۋتاتتاردىڭ الداعى ۋاقىتتا اباي وبلىسىنىڭ كۋرچاتوۆ قالاسىندا وتەتىن رادياتسيالىق جانە سەيسميكالىق قاۋىپسىزدىك ماماندارىمەن كەزدەسۋىنە قاتىستى ماسەلەلەر دە تالقىلاندى. قازاقستاندا اەس سالىنۋىنا بايلانىستى بۇل تاقىرىپتىڭ وزەكتىلىگى ارتا تۇسكەنى انىق.

سونىمەن قاتار سەناتورلار مەملەكەت باسشىسى قاسىم-جومارت توقاەۆتىڭ تاپسىرمالارىن ىسكە اسىرۋ اياسىندا اگرارلىق سەكتوردى تىكەلەي سۋبسيديالاۋدان قولجەتىمدى نەسيەلەندىرۋگە كوشۋ جانە دەنساۋلىق ساقتاۋ جۇيەسىن كادرلىق تۇرعىدان قامتاماسىز ەتۋ ماسەلەلەرىن جەرگىلىكتى تۇرعىندارمەن بىرگە تالقىلاۋ ءۇشىن وڭىرلەرگە بارىپ، كەزدەسۋلەر وتكىزەدى. ماۋلەن اشىمباەۆ اتاپ وتكەندەي، قازىر ەلىمىزدە، اسىرەسە، اۋىلدىق جەرلەردە بىلىكتى مەديتسينالىق كادرلاردىڭ تاپشىلىعى وتە وزەكتى. سوندىقتان سالاداعى پروبلەمالاردى جان-جاقتى زەردەلەپ، ءتيىستى ماماندارمەن بىرلەسىپ ولاردى شەشۋ جونىندە ۇسىنىستار ازىرلەۋدىڭ ماڭىزى زور.

سونداي-اق بيۋرو وتىرىسىندا ماجىلىستەن كەلىپ تۇسكەن زاڭدار جۇمىس ءۇشىن تۇراقتى كوميتەتتەرگە ءبولىنىپ بەرىلدى.

Abai.kz