مينيستر ەرجان سادەنوۆ باستاعان قازاقستان رەسپۋبليكاسى ىشكى ىستەر مينيسترلىگىنىڭ دەلەگاتسياسى دوحا قالاسىنا (كاتار) ىسساپارمەن باردى. ساپار اياسىندا كاتاردىڭ ىشكى ىستەر ءمينيسترى شەيح حاليف بەن حاماد ءال تانيمەن كەزدەسۋ ءوتتى.

ءىىم ءباسپاسوز قىزمەتى بەرگەن اقپاراتقا ساي، كەزدەسۋدە تاراپتار قىلمىسقا قارسى كۇرەستەگى ءوزارا ءىس-قيمىل پەرسپەكتيۆالارىن، سونىڭ ىشىندە قىلمىستىڭ ۇيىمداسقان تۇرلەرىنە، ەسىرتكىنىڭ زاڭسىز اينالىمىنا، ەكسترەميزمگە، كيبەرقىلمىسقا قارسى كۇرەس ماسەلەلەرىن، سونداي-اق ادامداردى ىزدەستىرۋ جانە تاجىريبە الماسۋ سالاسىنداعى ىنتىماقتاستىقتى تالقىلادى.

"MILIPOL QATAR-2024" 15-ءشى حالىقارالىق قاۋىپسىزدىك كورمەسىنىڭ اياسىندا وتكەن قىلمىسقا قارسى كۇرەستەگى ىنتىماقتاستىق تۋرالى ۇكىمەتارالىق كەلىسىمگە قول قويۋ ساپاردىڭ باستى ناتيجەسى بولدى.

بۇل كەلىسىم قۇقىق قورعاۋ سالاسىنداعى قازاقستان-كاتار قاتىناستارىنىڭ جاڭا كەزەڭىن اشىپ، قاۋىپسىزدىك باعىتىنداعى ءوزارا ءىس-قيمىل مەن كۇش-جىگەردى ۇيلەستىرۋدىڭ قۇقىقتىق نەگىزىن قالىپتاستىرادى.

2024 جىلعى 30 قازاندا مەملەكەت باسشىسى قاسىم-جومارت توقاەۆ كاتار ءامىرى شەيح تاميم بەن حاماد ءال تانيمەن تەلەفون ارقىلى سويلەستى. ساۋدا-ەكونوميكالىق جانە ينۆەستيتسيالىق سالالارداعى قازاقستان-كاتار ىنتىماقتاستىعىن كەڭەيتۋ ماسەلەلەرى، سونداي-اق اعىمداعى جىلدىڭ باسىندا قول قويىلعان ۇزاق مەرزىمدى ستراتەگيالىق ارىپتەستىك ورناتۋ تۋرالى كەلىسىمدى جۇزەگە اسىرۋ بارىسى تالقىلاندى.

Abai.kz