جاڭا داۋىرگە قادام باسىپ، دامۋدىڭ داڭعىل جولىنا تۇسكەن قازاقستان ەكونوميكالىق تۇرعىدان دا، ساياسي تۇرعىدان دا جاڭعىرۋ ۇدەرىسىنە ەركىن بەيىمدەلىپ، قاراپايىم حالىقتىڭ ءال-اۋقاتىن ارتتىرۋ مەملەكەتتىك ساياساتتىڭ باسىم باعىتىنا اينالدى. بۇعان مەملەكەت باسشىسىنىڭ ءار جولداۋىندا قامتىلعان ماڭىزدى ماقساتتار مەن تاريحي مىندەتتەر نەگىز بولىپ كەلەدى.

سوندىقتان دا، قازاقستاننىڭ ءار ازاماتى، تۇتاس قوعام پرەزيدەنتىمىزدىڭ ءار جولداۋىن تاعاتسىزدانا كۇتىپ، تالاپ-جىگەرمەن قابىلدايتىن دەڭگەيگە جەتتى. بۇل – ورتاق مۇددەنى كوزدەگەن وراسان يگىلىكتىڭ كورىنىسى!

ەل پرەزيدەنتى قاسىم-جومارت كەمەلۇلى توقاەۆتىڭ قازاقستان حالقىنا ارناعان «ادىلەتتى قازاقستان: زاڭ مەن ءتارتىپ، ەكونوميكالىق ءوسىم جانە قوعامدىق وپتيميزم» اتتى بيىلعى جولداۋىن اسا جوعارى ىجداھاتپەن كۇتىپ، ىستىق ىقىلاسپەن قابىلدادىم. ويتكەنى، مەن ەلىمنىڭ ەرتەڭىنە بەي-جاي قاراي المايمىن.

مەملەكەت باسشىسىنىڭ بۇل جولعى جولداۋىنا ادەتتەگىدەي ءوزىنىڭ بۇعان دەيىنگى جولداۋلارى مەن سايلاۋالدى باعدارلاماسىندا قامتىلعان مىندەتتەر مەن رەفورمالاردى ودان ءارى جەتىلدىرۋگە باعىتتالدى. قازاقستاندىق قوعام اسىعا كۇتكەن جولداۋدىڭ بۇل مازمۇنى جۇيەلى دامۋدىڭ داڭعىل جولىن ايعاقتاپ تۇر.

سونىمەن، ەل پرەزيدەنتى بۇگىنگى باستامالارىندا ادىلەتتى قوعامنىڭ الەۋمەتتىك الەۋەتىن ارتتىرۋ ماقساتىنداعى ەڭ ماڭىزدى دەگەن توعىز باعىتتى سالماقتاي وتىرىپ، سول باعىتتار بويىنشا ۇكىمەت پەن اكىمدەرگە ناقتى تاپسىرمالار جۇكتەدى. بارلىعى دا – حالىقتىڭ ارمانىمەن استاسىپ جاتقان اسۋلار، دامۋدىڭ قيسىندى جولى، وتكەننىڭ وكىنىشتى ساتتەرىنىڭ ساباعى. ءبىر سوزبەن ايتقاندا، كوكتەن الىنعان، كوپتەن الشاق تۇرعان ەشتەڭە جوق.

تۇتاس قوعام مەن ازاماتتار جانە تاريح پەن ەرتەڭگى بولاشاق الدىنداعى جاۋاپكەرشىلىگىن استە ەستەن شىعارىپ كورمەگەن مەملەكەت باسشىسى ەل دامۋىنىڭ وتكەن بەس جىلداعى بەلەستەرىنە شولۋ جاساي وتىرىپ، جاڭا ءداۋىر تالاپتارى مەن الەمدىك گەوساياسي سىن-قاتەرلەر تۋرالى وردالى ويلارىن ورتاعا سالدى. «ءبىز قابىلداعان ءاربىر شەشىم مەن ءاربىر جوبا قاراپايىم حالىق ءۇشىن بارىنشا ءتيىمدى بولۋى ءتۇيىس»، – دەپ وي ساباقتاعان قاسىم-جومارت كەمەلۇلىنىڭ وسى جولعى جولداۋدا قامتىلعان ءاربىر باستاماسى ەكونوميكا حالىق تۇرمىسىنا قىزمەت ەتۋى كەرەك دەگەن تۇجىرىممەن تۇيىندەلىپ جاتتى. بارلىق توعىز باعىتتىڭ دا ءتۇيىنى وسى مازمۇندا ءوربىدى.

ارينە، بايانسىز باستامالار مەن ۇشقارى ۇستانىمداردان قاراپايىم حالىق زارداپ شەگەدى. مۇنداي كەمشىلىكتەر بىزدە جوق ەمەس. بيۋدجەتتىڭ كىرىس بولىگى تياناقتالماي جاتىپ، شىعىس كولەمىنىڭ شەكتەن تىس ۇلعايىپ كەتۋى مەملەكەت قارجىسىن وراسان ىسىراپقا ۇشىراتىپ جاتقانى دا جاسىرىن ەمەس. وسىنداي كەلەڭسىزدىكتەردى وتكىر سىنعا العان ەل پرەزيدەنتى قاسىم-جومارت كەمەلۇلى:

– مەملەكەت قارجىسىنىڭ تۇراقتىلىعىن قامتاماسىز ەتۋدىڭ بىردەن ءبىر جولى – كورپەگە قاراي كوسىلۋ. سوندىقتان بيۋدجەت قاراجاتىن ستراتەگيالىق ماڭىزى جوق، اسا شۇعىل ەمەس شارۋالارعا وڭدى-سولدى شاشۋدى دوعارۋ كەرەك، – دەدى. ورىندى تالاپ، ورنىقتى ۇستانىم!

پرەزيدەنتىمىزدىڭ جولداۋلارىندا، ۇلتتىق قۇرىلتاي وتىرىستارىندا سويلەگەن سوزدەرى مەن جەتەكشى باسىلىمدارعا بەرگەن سۇحباتتارىندا ءجيى ايتىلاتىن «ەكونوميكالىق ءوسىم» تىركەسى بالكىم، تەرمينگە اينالىپ كەتكەن شىعار. بىراق، ونىڭ تۇپكى ماعىناسى – ەلدى ەڭسەلەندىرۋ، حالىقتىڭ تۇرمىسىن اتتىرۋ.

ەلىمىز ءۇشىن ەكونوميكالىق ءوسىمنىڭ اسا ماڭىزدى ەكەنى بارشامىزعا بەلگىلى. وسى ماسەلەگە ەرەكشە توقتالعان ەل پرەزيدەنتى ونەركاسىپ سالاسىن دامىتۋ، ەكونوميكاداعى وتاندىق ءونىم ۇلەسىن ارتتىرۋ ماسەلەلەرىنە توقتالا كەلىپ، ءدال وسى سالاعا قاتىستى قاراعاندى وبلىسىنىڭ تاجىريبەسىن تىلگە تيەك ەتتى.

– مەن جۋىردا قاراعاندى وبلىسىندا بولدىم. سول كەزدە «Qarmet» مەتاللۋرگيا كومبيناتىنا باردىم. وتاندىق ينۆەستور كەلگەن سوڭ، ونداعى احۋال ەداۋىر تۇراقتالدى. كاسىپورىن جاڭعىرتىلا باستادى. بۇل قادام وندىرىلەتىن ءونىم كولەمىن ايتارلىقتاي ارتتىرۋعا ءتيىس. ساران قالاسىنىڭ ەكونوميكاسىن ءارتاراپتاندىرۋ جۇمىسى جۇرگىزىلىپ جاتىر. وندا اۆتوكولىك دوڭعالاعىن جانە تۇرمىستىق تەحنيكا شىعاراتىن وندىرىستەر ىسكە قوسىلدى. سونىڭ ارقاسىندا بۇل ەلدى مەكەن مونوقالالار ساناتىنان شىعارىلدى. باسقا دا مونوقالالارعا دەم بەرۋ ءۇشىن وسى تاجىريبەنى قولدانۋ قاجەت. جالپى، ايماقتاردىڭ ءوسىپ-وركەندەۋىنە جول اشاتىن جاڭا ءوندىرىس ورىندارىن بارىنشا دامىتۋ كەرەك.

كوڭىلگە ەرىكسىز ماقتانىش سەزىمى ۇيالايدى ەكەن. مەن بۇل جولى پرەزيدەنت جولداۋىن پارلامەنت پالاتالارىنىڭ بىرلەسكەن وتىرىسىنا قاتىسىپ، تىكەلەي تىڭداعان ەدىم. پرەزيدەنتتىڭ جاڭاعى پىكىرى مەنى تولقىتىپ جىبەردى. سەسسيا اياتالعان ساتتەگى قاراعاندىلىق ازاماتتاردىڭ جانارىنداعى قۋانىش پەن ماقتانىش سەزىمنىڭ ۇشقىنىن كورۋدىڭ ءوزى ءبىر باقىت ەدى.

سونىمەن قاتار، قاسىم-جومارت كەمەلۇلىنىڭ بۇگىنگى باستامالارىنىڭ الدىڭعى سايلاۋلاردا حالىقتىڭ زور سەنىمىنە يە بولعان AMANAT پارتياسىنىڭ ومىرشەڭ جوبالارىمەن ۇندەسىپ جاتقاندىعى جەتەكشى پارتيانىڭ بيلىك پەن حالىق الدىنداعى بەكەم بەدەلىنە قولداۋ بولعاندىعىن ايتا الامىن. ماسەلەن، پارتيانىڭ «قارىزسىز قوعام»، «اۋىل اماناتى» جوبالارى اياسىندا اتقارىلعان جۇمىستارىنا وڭ باعا بەرىپ، اۋىل شارۋاشىلىعى تاۋارلارىن وندىرۋشىلەرگە «تاۋارلى نەسيە» بەرۋ جونىندەگى باستاماسى كوڭىلگە سەرپىندى سەنىم ۇيالاتتى.

سونىمەن قاتار، پرەزيدەنتتىڭ بيىلعى جولداۋىندا قامتىلعان توعىز باعىتتىڭ بارلىعى قاسىم-جومارت كەمەلۇلىنىڭ بۇعان دەيىنگى ۇلتتىق قۇرىلتاي وتىرىستارىندا كوتەرىپ كەلە جاتقان ماسەلەلەرىمەن ۇندەستىك تاپقانى كوڭىلگە سەرپىندى سەنىم ۇيالاتادى. بۇل دەگەنىمىز – مەملەكەتتىك ساياساتتىڭ جۇيەلىلىگى. ويتكەنى، ۇلتتىق قۇرىلتاي وتىرىستارىندا مەملەكەت باسشىسىنىڭ ۇلتتىق يدەولوگيا قالىپتاستىرۋ جونىندەگى مىندەتتەرى مەن تاپسىرمالارى وسى جولعى جولداۋداعى ادىلەتتى قازاقستاننىڭ الەۋمەتتىك باعدارىمەن ساباقتاسىپ جاتىر.

جالپى، پرەزيدەنتتىڭ بۇگىنگى جولداۋى ەل كوكەيىندەگىنى ءدوپ باسىپ، ادىلەتتى قازاقستاننىڭ دامۋ قارقىنىن ەسەلەپ، ەكونوميكامىزدىڭ ەڭسەلەنۋىنە جول اشقان تاريحي ءمانى زور قۇجات بولعانىن  باسا ايتقىم كەلەدى.

بەكزات التىنبەكوۆ،

ۇلتتىق قۇرىلتاي مۇشەسى، AMANAT پارتياسى قاراعاندى وبلىستىق فيليالىنىڭ توراعاسى، وبلىستىق ءماسليحاتتىڭ دەپۋتاتى

Abai.kz