«ازىق-تۇلىك كەلىسىمشارت كورپوراتسياسى» ۇك» اق مەملەكەت باسشىسىنىڭ تاپسىرماسىنا سايكەس، 2024 جىلعى 18 قاراشادان باستاپ تىكەلەي استىقتى ساتىپ الۋ باعدارلاماسىنا قاتىسۋعا اۋىل شارۋاشىلىعى تاۋارىن وندىرۋشىلەردەن وتىنىمدەردى قابىلداۋدى باستادى. بۇل ماقساتتارعا 10 ملرد تەڭگە بولىنەدى. ەڭ الدىمەن، استىق ساتىپ الۋ شاعىن شارۋا قوجالىقتارىنىڭ ءوز ونىمدەرىن ءادىل باعامەن وتكىزۋىن قامتاماسىز ەتۋ ءۇشىن جۇزەگە اسىرىلادى. باعدارلامانىڭ ناتيجەسىندە شاعىن جانە ورتا اۋىل شارۋاشىلىعى سۋبەكتىلەرى مەملەكەتتىك قولداۋ شارالارىن پايدالانا الادى. سونداي-اق، ارتىق استىقتى ساتىپ الۋ تەتىگى ىشكى نارىقتاعى باعا كونيۋنكتۋراسىنا دەلدالداردىڭ ىقپالىن بارىنشا ازايتادى»، - دەلىنگەن مينيسترلىكتىڭ ءباسپاسوز قىزمەتى تاراتقان مالىمەتتە.

ازىق-تۇلىك كەلىسىمشارت كورپوراتسياسى بەلگىلەنگەن ستاندارتتار مەن ساپا تالاپتارىن ساقتاي وتىرىپ، اۋىل شارۋاشىلىعى تاۋارىن وندىرۋشىلەردىڭ استىعىن باسەكەلەستىك شارتتاردا ساتىپ الادى.

تىكەلەي ساتىپ الۋ باعدارلاماسى بويىنشا الدىن الا باعالار:

3-سىنىپتى بيداي (جەلىمتەگى 27%+) – 90 000 تەڭگە ققس-پەن;

3-سىنىپتى بيداي (جەلىمتەگى 25%+) – 80 000 تەڭگە ققس-پەن;

3-سىنىپتى بيداي (جەلىمتەگى 23%+) – 75 000 تەڭگە ققس-پەن;

4-سىنىپتى بيداي (جەلىمتەگى 21%+) – 65 000 تەڭگە ققس-پەن;

4-سىنىپتى بيداي (جەلىمتەگى 18%+) – 55 000 تەڭگە ققس-پەن;

5-سىنىپتى بيداي (جەلىمتەگى 18%+) – 50 000 تەڭگە ققس-پەن;

2-سىنىپتى ارپا (ناتۋراسى 630 گ/ل) – 50 000 تەڭگە ققس-پەن.

بارلىق راسىمدەردىڭ اشىقتىعىن قامتاماسىز ەتۋ ماقساتىندا فەرمەرلەردىڭ وتىنىمدەرىن قاراۋ وبلىستاردىڭ ۇيلەستىرۋ كەڭەستەرىنىڭ قاتىسۋىمەن جۇرگىزىلەدى.

«ازىق-تۇلىك كەلىسىمشارت كورپوراتسياسىنىڭ اقشالاي قاراجاتىن بولگەننەن كەيىن، فەرمەرلەر استىق جەتكىزگەنى ءۇشىن اقى الا الادى. قازىرگى كەزدە استىق وپەراتورىنىڭ اقشا الۋىنا قارجى-ەكونوميكالىق نەگىزدەمەنى ماقۇلداۋ بويىنشا ءىس-شارالار اتقارىلىپ جاتىر. تىكەلەي ساتىپ الۋ باعدارلاماسىنا قاتىسۋعا وتىنىمدەردى «ازىق-تۇلىك كەلىسىمشارت كورپوراتسياسى» ۇك» اق وڭىرلىك وكىلدىكتەرى قابىلدايدى. استىقتى قابىلداۋمەن وپەراتور ايقىنداعان ليتسەنزيالانعان استىق قابىلداۋ كاسىپورىندارى اينالىسادى»، - دەپ اتالىپ وتكەن مينيسترلىك اقپاراتىندا.

Abai.kz