مىڭداعان بەيبىت تۇرعىن، جۇزدەگەن مىڭ سارباز قازا تاپتى. ميلليونداعان ادام بوسىپ كەتتى. تۇتاستاي قالالار ءۇيىندى-قيراندىعا اينالدى…

قازىر ۋكرايناداعى سوعىستىڭ قارۋلارى دا ىرىلەنە باستادى. ۋكراينا ايدىك امەريكالىق ATACMS-تار مەن بريتانيالىق جويقىن Storm Shadow-لاردى قولدانا باستادى.

ال رەسەي العاش رەت “ورەشنيك” دەيتىن كونتيتەنتارالىق باليستيكالىق زىمىرانمەن ۋكراينانىڭ دنەپرىنە سوققى بەردى. مۇنى پرەزيدەنت ءپۋتيننىڭ ءوزى مالىمدەدى، بۇگىن.

قازىر قوس تاراپ تا “نە بەل كەتەدى، نە بەلبەۋ كەتەدى” دەپ تىرەسىپ تۇر. رەسەي اسكەري-ساياسي باسشىلىعى تاراپىنان يادرولىق قارۋ قولدانۋ تۋرالى ريتوريكا كوپ ايتىلعان. ارنايى جاتتىعۋلار ءجيى وتكىزىلىپ تۇردى. دەسە دە، ول ءسوز ەدى. وسى جولى ءىستىڭ سۇلباسى كورىندى. يادرولىق وقتۇمسىقسىز بولسا دا، “وركشنيكتى” اتۋ - رەسەيدىڭ ەڭ سوڭعى ويىنداعىسى ەكەنى جاسىرىن ەمەس. سوندىقتان، سوڭعى كۇندەردەگى سۋىت حابارلار الەم ەلدەرىن تىكسىنتىپ تاستاعانى فاكت.

تمد مەن ەۋروپانىڭ ءبىرسىپىرا ەلى سوعىسۋشى ەلدەر مەن ۇرىس ايماعىنا جاقىن جەرلەردەگى ءوز ازاماتتارىنا ەدەل-جەدەل ۇندەۋلار جاساپ، قاۋىپسىزدىگىن قامتۋعا كىرىسىپ كەتتى. بۇل ساناتتا قازاقستان دا بار.

قر ءسىم-ءى ءبىر، ۋكرايناداعى ەلشىلىك ەكى كەزەك ۇندەۋ جاساپ، قازاقستان ازاماتتارىن قاۋىپتى ايماقتاردان كەتۋگە شاقىرۋدا.

قازاقستان بۇل سوعىستا بەيتاراپ ەل. دەسە دە، قازاقستاننىڭ ساياسي باسشىلىعى بىرنەشە مارتە ەلىشىلىك جانە حالىقارالىق بيىك مىنبەرلەردەن ۇندەۋ جاساپ، رەسەي مەن ۋكراينانى ديالوگقا شاقىرۋدا. ءتىپتى، استانا سوعىسۋشى قوس تاراپقا ديالوگ الاڭىن دا ۇسىندى. بۇل جاھاندىق ساياسي كەڭىستىكتە ءوزىنىڭ بىتىمگەرلىك ميسسياسىن دالەلدەپ ۇلگەرگەن قازاقستاننىڭ ۇستانىمىن الەم جۇرتىنا تاعى ءبىر كورسەتتى. قازاقستان جاھاندىق قاقتىعىستارديا رەتتەۋدە بەيبىت كەلىسسوزدەرگە الاڭ بولا ءبىلدى. سونىڭ ءبىرلى-جارىم سوزدالەلى: سيريا، قاراباق سوعىستارى. قازاقستان رەسەي مەن ۋكرايناعا دا الاڭ ۇسىنعان. ال قازاقستاننىڭ ۇسىنىسىن قابىل الۋى-الماۋى تاراپتاردىڭ ەركىندەگى ءىس.

ۋكرايناداعى احۋالدىڭ ۋشىعۋىنا قاتىستى پرەزيدەنت توقاەۆ ەلىمىزدىڭ قورعانىس سالاسىنداعى باسشىلارعا، ۇكىمەت پەن ءپا-گە، بارلىق اكىمدەرگە تاپسىرما بەردى.

“مەملەكەت باسشىسى قاسىم-جومارت توقاەۆ ۋكراينا توڭىرەگىندەگى جاعدايدىڭ ۋشىعۋىنا بايلانىستى نەگىزگى اسكەري جانە ازاماتتىق نىسانداردىڭ قاۋىپسىزدىگىن قامتاماسىز ەتۋ جونىندە شۇعىل شارالار قابىلداۋدى تاپسىردى.

پارلامەنت پالاتالارىنىڭ توراعالارى قابىلدانىپ جاتقان ءىس-قيمىل تۋرالى حاباردار ەتىلدى”، - دەپ جازدى قر پرەزيدەنتىنىڭ كەڭەسشىسى - قر پرەزيدەنتىنىڭ ءباسپاسوز حاتشىسى بەرىك ءۋالي.

“پرەزيدەنت ەلىمىزدەگى جاعدايدى ءوز باقىلاۋىندا ۇستاپ وتىر”، - دەگەن بەرىك ءۋالي مىرزا ەلىمىز ءۇشىن باستى ستراتەگيالىق ماقسات – تۇراقتىلىقتى، تىنىشتىقتى، زاڭ مەن ءتارتىپ ۇستەمدىگىن ساقتاۋ ەكەندىگىن ءسوز ەتتى.

تاعى قايتالايىق: بىزگە ءوز ازاماتتارىمىزدىڭ اماندىعى مەن جەرىمىزدىڭ بۇتىندىگى ءبىرىنشى ماڭىزدى. الەم الاعاي دا بۇلاعاي كەزەڭدە. دەمەك، ەلدىڭ قاۋىپسىزدىگى ءار ءسات ماڭىزدى! وڭىرلەردەگى ءھام استاناداعى ءاربىر جاۋاپتى تۇلعا قىرعيداي قىراعى بولۋى كەرەك!

ەل تىنىش بولسىن! جەر ءبۇتىن بولسىن!