سۋ سالاسىندا اشىقتىقتى قامتاماسىز ەتۋ ماقساتىندا سۋ رەسۋرستارى جانە يرريگاتسيا مينيسترلىگى جىل سايىن ءوز سايتىندا قازاقستاننىڭ سۋ رەسۋرستارىن پايدالانۋ تۋرالى ۇلتتىق اقپاراتتىق ەسەپ جاريالايتىن بولادى. جاڭا سۋ كودەكسىنىڭ جوباسىندا اتالعان نورما قاراستىرىلعان.

ۇلتتىق ەسەپ - بۇل ەلىمىزدىڭ سۋ قورىنىڭ جاي-كۇيى، قورعالۋى جانە پايدالانىلۋى تۋرالى وتكەن كۇنتىزبەلىك جىلعا تالدامالىق ەسەپ.

وندا نەگىزگى وزەندەردىڭ سۋلىلىعى تۋرالى مالىمەت، سۋ شارۋاشىلىعى باسسەيندەرى، وڭىرلەر مەن ەكونوميكانىڭ سالالارى بولىنىسىندە سۋ پايدالانۋدى تالداۋ، سۋ شارۋاشىلىعى جانە گيدروتەحنيكالىق قۇرىلىستاردىڭ، ونىڭ ىشىندە مەملەكەتارالىق قۇرىلىستاردىڭ سانى مەن جاي-كۇيى تۋرالى اقپارات كورسەتىلەدى. سونداي-اق، قۇجاتتا سۋ قورىن قورعاۋ بويىنشا ىسكە اسىرىلعان ءىس-شارالار، ينۆەستيتسيالىق جوبالاردى ىسكە اسىرۋ جانە زاماناۋي تەحنولوگيالاردى ەنگىزۋ تۋرالى مالىمەتتەر جازىلادى.

«جاڭا سۋ كودەكسىنىڭ جوباسىنا سايكەس، ورتالىق مەملەكەتتىك جانە جەرگىلىكتى اتقارۋشى ورگاندار ەسەپتى جىلدان كەيىن 1 ناۋرىزعا دەيىن ەسەپ بەرۋ ءۇشىن اقپارات دايىنداۋى ءتيىس. ۇلتتىق ەسەپ 1 مامىردان كەشىكتىرىلمەي جاريالانۋى كەرەك. بۇل قازاقستاننىڭ سۋ رەسۋرستارىن باسقارۋ مەن پايدالانۋدىڭ اشىقتىعىن قامتاماسىز ەتەدى»، - دەدى سۋ رەسۋرستارى جانە يرريگاتسيا ءبىرىنشى ۆيتسە-ءمينيسترى بولات بەكنياز.

Abai.kz