«تۇرسىنباەۆادان باستايمىز»: قۇزىرلى ورگاندار حالىقتان اقشا جيناعان جۇلدىزدارمەن اينالىسپاق، - دەپ جازادى DALA INSIDE.

«ءبىز بىرگەمىز» قورىنىڭ قۇرىلتايشىسى پەريزات قايرات ىسىنەن كەيىن، قۇزىرلى ورگاندار حالىقتان اقشا جيناعان جانە قازىر دە جينايتىن، جەلىدە تانىمال، اۋديتورياسى ۇلكەن ادامدارعا تەكسەرىس جۇرگىزۋ بويىنشا جابىق كونسۋلتاتسيالار وتكىزە باستادى.

كەلەسى جىلدان باستاپ قارجى مونيتورينگى اگەنتتىگى وسى ءىستىڭ باستى كوورديناتورى بولۋى مۇمكىن. DALA INSIDE دەرەككوزىنىڭ ايتۋىنشا، اۋزى دۋالى جۇلدىز بولىپ جۇرگەن ءبىراز ادامنىڭ بىلىعى اشىلۋى عاجاپ ەمەس.

«قايىرىمدىلىق قورلار عانا ەمەس، ەشقانداي قورسىز-اق اۋديتورياسىنان اقشا جيناپ جۇرگەن، كۋرس، باسقا دا زاتتار ساتىپ جۇرگەندەردىڭ ارنايى رەەسترى تۋرالى جابىق تالقىلاۋلار جۇرۋدە. ال قورلاردىڭ جاعدايى تۇسىنىكتى. ولار كەلەسى جىلدان باستاپ قاتاڭ قاداعالاۋعا الىناتىن بولادى»، - دەپ جازادى دەرەككوز.

تەكسەرىلەتىن ءتىزىمدى اينۇر تۇرسىنباەۆا، قۇرالاي حانىم، قۋانىش شوڭباي سىندى كوۋچ، كۋرس ساتاتىن تۇلعالار باستايتىنى انىق. ولاردىڭ بانكتىك ترانزاكتسيالارى تەكسەرىلىپ، سالىق تولەۋ ديستسيپليناسىنا مونيتورينگ جاسالادى دەپ كۇتىلۋدە. اقشا كىمنەن جانە قايدان ءتۇستى، اقشا جىبەرگەندەر ءتيىستى قىزمەت الدى ما، ول تابىستان سالىق تولەندى مە، بارلىعى ميكروسكوپپەن قارالماق.

«رەسەيدەگى «بلينوۆسكايا كەيسى» بىزدە دە قايتالانادى. قازاقتىڭ ءتۇرلى كوۋچتارى، بلوگەرلەرى، قازىردەن باستاپ وسىعان دايىن بولۋى ءتيىس»، - دەيدى، دەرەككوز.

2023 جىلى رەسەيدە «تىلەك مارافونىن» وتكىزىپ جۇرگەن، ەڭ اتىشۋلى بلوگەر ەلەنا بلينوۆسكايا شەتەلگە كەتىپ بارا جاتقان جەرىنەن ۇستالعان بولاتىن. وعان 918 ميلليون رۋبل سالىقتان جالتاردى دەگەن ايىپ تاعىلىپ، الدىمەن ۇيقاماققا، ودان كەيىن تەرگەۋ يزولياتورىنا جونەلتىلگەن ەدى. قازىر بلينوۆسكايا 918 ميلليون ءرۋبلدىڭ 230 ميلليونىن وتەدى. قالعان قارىزدى تولەي الماي، بانكروت دەپ تانىلىپ وتىر. وتاندىق جۇلدىزدار دا بلينوۆسكايا كەبىن كيۋى مۇمكىن. 2025 جىلى بىرنەشە دۇركىرەگەن سوت پروتسەسى وتەدى دەپ كۇتىلۋدە. ونىڭ بارلىعىن يۋتۋبتا اشىق وتكىزۋ بويىنشا يدەيالار قولداۋ تاۋىپ وتىر. تەك ءتيىستى نورماتيۆتىك اكتىلەرگە وزگەرىس ەنگىزۋ قاجەت.

Abai.kz