قازاقستان جەڭىل اتلەتيكا فەدەراتسياسىنىڭ پرەزيدەنتى دانيال احمەتوۆ قىزمەتىن مەرزىمىنەن بۇرىن توقتاتتى. ونىڭ ورنىنا وليمپيادا چەمپيونى ولگا رىپاكوۆا تاعايىندالدى.

تۋريزم جانە سپورت مينيسترلىگىندە فەدەراتسيانىڭ 2024 جىلعى قورىتىندى جيىنى ءوتتى. دانيال احمەتوۆ فەدەراتسيانىڭ اتقارعان جۇمىسى تۋرالى ەسەپ بەرىپ، سپورتتاعى بىرقاتار ماڭىزدى جەتىستىگىن اتاپ ءوتتى. ونىڭ ىشىندە، حالىقارالىق جارىستاردا قازاقستاندىق اتلەتتەر كورسەتكەن جوعارى ناتيجەلەر مەن جەڭىستەر، سونداي-اق جەڭىل اتلەتيكانىڭ دامۋىنا باعىتتالعان جاڭا باستامالار ايتىلدى.

وتىرىستا دانيال احمەتوۆ ءوز قىزمەتىن مەرزىمىنەن بۇرىن توقتاتاتىنىن مالىمدەپ، فەدەراتسيا پرەزيدەنتتىگىنە داڭقتى جەڭىل اتلەت، ريو وليمپياداسىنىڭ چەمپيونى ولگا رىپاكوۆانىڭ كانديداتۋراسىن ۇسىندى. جيىنعا قاتىسۋشىلار، سونىڭ ىشىندە وبلىس فەدەراتسيالارىنىڭ باسشىلىعى مەن سپورت قاۋىمداستىعى ولگا رىپاكوۆانىڭ كانديداتۋراسىن ءبىراۋىزدان قولدادى.

جەڭىل اتلەتيكا – ەلدەگى ەڭ تانىمال سپورت تۇرلەرىنىڭ ءبىرى. قازىر 360 مىڭنان استام وتانداسىمىز ءدال وسى سپورت تۇرىمەن كاسىبي تۇردە اينالىسادى. سوندىقتان ءبىز بۇل سپورتتى جاڭا دەڭگەيگە كوتەرىپ، ونىڭ حالىقارالىق ارەنادا تانىمالدىلىعىن ارتتىرۋىمىز قاجەت. بۇگىنگى جيىندا فەدەراتسيانىڭ جۇمىسىنا قاتىستى ماڭىزدى وزگەرىستەر بولىپ جاتىر. فەدەراتسيانى بىرنەشە جىل باسقارعان دانيال احمەتوۆ قىزمەتىنەن كەتىپ جاتىر. وعان اتقارعان جۇمىسى ءۇشىن العىس بىلدىرەمىن. دانيال كەنجەتايۇلىنىڭ باسشىلىعىمەن ءبىزدىڭ اتلەتتەر حالىقارالىق جارىستاردا ۇلكەن جەتىستىكتەرگە جەتتى. ەندى فەدەراتسيا پرەزيدەنتتىگىنە وليمپيادا چەمپيونى ولگا رىپاكوۆا كەلىپ وتىر. ولگا سەرگەەۆنانىڭ وتاندىق جەڭىل اتلەتيكانىڭ دامۋىنا قوسقان ۇلەسى مول. الداعى ۋاقىتتا دا ەلىمىزدىڭ جەڭىل اتلەتيكا سپورتىن بيىكتەرگە كوتەرەدى دەپ سەنەمىز، – دەپ اتاپ ءوتتى ەربول مىرزابوسىنوۆ.

جيىن سوڭىندا مينيستر ولگا رىپاكوۆاعا ەلىمىزدەگى جەڭىل اتلەتيكا سپورتىنىڭ حالىقارالىق دەڭگەيدەگى ىنتىماقتاستىعىن ارتتىرۋ، سپورتشىلاردىڭ دايىندىعىنا جانە رەزەرۆتى دايارلاۋعا ەرەكشە كوڭىل ءبولۋ قاجەتتىگىن تاپسىردى.

Abai.kz