اقتاۋ ماڭىنداعى ۇشاق اپاتىنا بايلانىستى ءتۇرلى جورامال ايتىلۋدا. الەۋمەتتىك جەلىدە تاراعان فوتو جانە ۆيدەولارعا بايلانىستى جەلى قولدانۋشىلارى سان ءتۇرلى نۇسقانى اتاۋدا. ۇشاقتىڭ تەحنيكالىق اقاۋىنىڭ بولۋى، ۇشاقتىڭ قۇستارمەن سوقتىعىسۋى، ۇشاققا درون نەمەسە اۋە قورعانىس جۇيەسىنىڭ شابۋىل جاساۋى جانە باسقا نۇسقالار ايتىلۋدا.

ماماندار ۇشاق اپاتىنىڭ ناقتى سەبەبىن انىقتاۋ ءۇشىن ۋاقىت پەن ساراپتاما قورىتىندىلارىن كۇتۋ قاجەت ەكەنىن ايتتى. ۇشاق اپاتىن زەرتتەۋگە قازاقستان، ازەربايجان، رەسەي ماماندارى مەن حالىقارالىق ساراپشىلار قاتىسادى. ۇشاق اپاتىنىڭ سەبەبىن انىقتاۋ ماقساتىندا قارا جاشىكتى وقۋ، ءتىرى قالعان جولاۋشىلاردان جانە ۇشاق ەكيپاجىنان اپاتقا قاتىستى پىكىر الۋ، الەۋمەتتىك جەلىدە جاريالانعان فوتو جانە ۆيدەولاردى ساراپتامادان وتكىزۋ، ۇشاقتىڭ ءار بولشەگىن قاراستىرۋ جانە باسقا ءىس-شارالار جۇزەگە اسىرىلۋدا.

قايعىلى وقيعاعا بايلانىستى بيلىك وكىلدەرى دە پىكىر بىلدىرۋدە. سەنات توراعاسى ماۋلەن اشىمباەۆ Azerbaijan Airlines كومپانياسىنىڭ ۇشاعىنىڭ اپاتىنا بايلانىستى: «اۋە اپاتىنىڭ، ۇشاقتىڭ زاقىمدانعان تۇستارىنىڭ جانە بۇل قايعىلى وقيعانىڭ ناقتى سەبەبى ازىرگە بەلگىسىز. ارنايى كوميسسيا جۇمىس ىستەپ جاتىر. قازاقستاننىڭ، ازەربايجانننىڭ، رەسەيدىڭ ءتيىستى ورگاندارى جۇمىلدىرىلعان. بۇل ەلدەردىڭ وكىلدەرىمەن بىرگە ءبىزدىڭ ماماندارىمىز دا جۇمىس ىستەۋدە. فوتوعا قاراپ بىردەن شەشىم شىعارىپ، بۇل وسىنداي ارەكەتتىڭ سالدارىنان دەۋ نەمەسە تاعى باسقانى ايتۋ بۇل - نەگىزسىز مالىمدەمەلەر، سپەكۋلياتسيا»، - دەيدى.

ول مامانداردىڭ ۇشاق اپاتىنا بايلانىستى پىكىرلەرىنە قۇلاق اسىپ، قورىتىندىنى كۇتۋ كەرەكتىگىن ايتتى. دالەلسىز دولبارلار مەن نەگىزسىز جورامالدار جاساماۋعا شاقىردى.

«كوميسسيا، ماماندار، ساراپشىلار جۇمىس ىستەۋدە. ولار بارلىعىن قارايدى، وزدەرىنىڭ قورىتىندىلارىن جاسايدى. قازاقستان دا، ازەربايجان دا، رەسەي دە اقپاراتتى جاسىرىپ قالۋعا نيەتتى ەمەس. بارلىق اقپارات قوعامعا اشىق جەتكىزىلەتىن بولادى. وعان قاتىستى ەشكىمدە كۇمان بولماۋى ءتيىس. ماماندارعا قورىتىندى جاساۋعا مۇمكىندىك بەرۋ كەرەك جانە ونى ازاماتتارعا جەتكىزۋ قاجەت»، - دەيدى اشىمباەۆ.

ۇشاق اپاتىنا بايلانىستى كوميسسيانى باسقاراتىن ۆيتسە-پرەمەر قانات بوزىمباەۆ اپاتتىڭ سەبەبىنە قاتىستى تۇجىرىم جاساۋعا ازىرگە ەرتە دەگەن ويدا. «الدىن-الا مالىمدەمەلەر جاساي المايمىن. ءتىپتى بولجامدى تۇجىرىم جاساۋعا دا ەرتەرەك. ءمان-جايدى انىقتاپ جاتقان ماماندار بار»، - دەيدى ول.

ۇشاق اپاتىنان كەيىن ەل پرەمەرى بەكتەنوۆ تە پىكىر ءبىلدىردى. ول اۆياتسيالىق قاۋىپسىزدىكتى كۇشەيتۋ كەرەكتىگىن ايتىپ، تاپسىرما بەردى. «ءبىرىنشى كەزەكتە جوسپاردان تىس تەكسەرۋ جۇرگىزۋ جانە اۋەجايلاردىڭ، اۋە كەمەلەرىنىڭ تەحنيكالىق جاعدايىن ەرەكشە باقىلاۋعا الۋ قاجەت. وتكىزىلىپ وتىرعان ءىس-شارالار شەڭبەرىندە وتاندىق اۆياكومپانيالار ەكيپاجداردىڭ بىلىكتىلىگىن، رۇقساتنامالارىن جانە قۇزىرەتىن قايتا تەكسەرۋ كەرەك. سونىمەن قاتار اۋە وقيعالارىنا جەدەل دەن قويۋ ماقساتىندا اپاتتىق-قۇتقارۋ جۇمىستارىن جەتىلدىرۋ جانە مۇددەلى مەملەكەتتىك ورگانداردىڭ ۇيلەسىمدى جۇمىسىن قامتاماسىز ەتۋ قاجەت. ورىن العان جاعدايدان وسىنداي وقيعالاردى الداعى ۋاقىتتا بولدىرماۋ ءۇشىن ناقتى ۇسىنىستاردى ازىرلەي وتىرىپ دۇرىس قورىتىندى شىعارۋ كەرەكپىز»، — دەيدى ول.

اقتاۋ ماڭىنداعى ۇشاق اپاتى 2024 جىلدىڭ 25-جەلتوقسانىندا بولدى. ۇشاق بورتىندا 67 ادام بولعان. اپاتتان 29 ادام ءتىرى قالدى.

Abai.kz