جاقىندا ەلورداداعى «شاڭىراق» مەيرامحاناسىندا بەلگىلى قالامگەر تولەن تىلەۋبايدىڭ «تۇلكىلىتاۋدىڭ اسپانى» اتتى جاڭا كىتابىنىڭ تۇساۋى كەسىلدى.

سالتاناتتى جيىنعا ابىلايتانۋشى جانە ماعجانتانۋشى عالىم، قازاقستاننىڭ ەڭبەك سىڭىرگەن قايراتكەرى، قازاقستان جوعارى مەكتەبى ۇلتتىق اكادەمياسىنىڭ اكادەميگى زارقىن تايشىباي، قازاقستاننىڭ ەڭبەك سىڭىرگەن قايراتكەرى، «استانا اقشامى» گازەتىنىڭ باس رەداكتورى ەركىن قىدىر، اقىن، جۋرناليست، پارلامەنت ءماجىلىسىنىڭ دەپۋتاتى جاناربەك ءاشىمجان، الاشتانۋشى عالىم، ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ جۋرناليستيكا جانە الەۋمەتتىك عىلىمدار فاكۋلتەتىنىڭ دەكانى قايرات ساق، قازاقتىڭ سارى تەنتەگى اتانعان ايتىسكەر اقىن، بارد قۋانىش ماقسۇتوۆ، اقىن، جۋرناليست ايباتىر سەيتاق، الاشتانۋشى عالىم، مەديا ساراپشى، تۋريزم جانە سپورت مينيسترلىگىنىڭ رەسمي سايتىنىڭ رەداكتورى مەيرامحان جاپەك، اۆتوردىڭ سىنىپتاسى، تالانتتى سۋرەتشى داۋلەت ءىزباساروۆ، زيالى قاۋىم وكىلدەرى جانە وقىرمان قاۋىم قاتىستى. تۇساۋكەسەردى ايتىسكەر اقىن، عالىم-ۇستاز، فيلولوگيا عىلىمدارىنىڭ كانديداتى ايتباي جۇماعۇل جۇرگىزدى. جاڭا كىتاپتىڭ تۇساۋى كەسىلگەننەن كەيىن ازاماتتار قالامگەرگە ءبىر-ءبىر اۋىز جىلى لەبىزىن ايتىپ، شىعارماشىلىعىنا تابىس تىلەدى.

قازاق جۋرناليستيكاسىندا شيرەك عاسىرلىق مەجەدە ءوز قولتاڭباسىن قالىپتاستىرعان ءجۋرناليستىڭ بۇل تۋىندىسى – ادەبيەت الەمىنە جاساعان قادامى. كىتاپ اۆتوردى جازۋشىلىق قىرىنان اشىپ كورسەتەدى. جيناققا «تۇلكىلىتاۋدىڭ اسپانى» اتتى تۇڭعىش پوۆەسى مەن اڭگىمەلەرى ەنگەن. شىعارمالارعا اۋىل بالاسىنىڭ ارمان-مۇراتى، جاستاردىڭ ءمولدىر سەزىمى، ادامگەرشىلىك، ادالدىق، مەيىرىم ارقاۋ بولعان. كىتاپ مەكتەپ جاسىنداعى بالالارعا جانە كوپشىلىك قاۋىمعا ارنالعان.

جاڭا كىتاپ قاراعاندى قالاسىنداعى «Tengri» باسپاسىنان 1000 دانامەن جارىققا شىقتى. تولەن تىلەۋبايعا ادەبيەت الەمىنە جاساعان قادامىڭ قۇتتى بولسىن دەيمىز! كىتاپتىڭ وقىرماندارى كوبەيە بەرسىن!

شاپاعات ءابدىر

Abai.kz