بەلارۋس پرەزيدەنتى لۋكاشەنكو بىلتىر قازان ايىنىڭ باسىندا 9 مەملەكەتتىڭ جاڭا تاعايىندالعان ەلشىلەرىن قابىلداعان ەدى. ولاردىڭ قاتارىندا قازاقستان ەلشىسى تيمۋر جاقسىلىقوۆ تا بولدى.

لۋكاشەنكو قازاق ەلشىسىنە قازاقستاندى، پرەزيدەنت توقاەۆتى ۋاقىت سىنىنان وتكەن بەلارۋس ەلىنىڭ دوسى رەتىندە سيپاتتاعان. سويتە تۇرا جاقسىلىقوۆتى «قاجەتسىز اقپارات قۇرالداردى وقىماۋعا» شاقىرعان.

وتكەن جىلى تامىزدا ۋكراينا ساربازدارى رەسەيدىڭ كۋرسك وبلىسىنا باسىپ كىرگەندە بەلارۋس باسشىسى ۇقشۇ-داعى ارىپتەستەرىنە شۇيلىگىپ، «رەسەيگە قاجەتتى كومەك كورسەتپەي جاتىرسىڭدار» دەپ ايىپتاعان. اراسىندا قازاقستاننىڭ اتىن اتاپ، «قاڭتار قىرعىنى» كەزىندە ۇقشۇ اسكەرلەرىنىڭ كومەككە كەلگەنىن ەسكە سالعان.

ازاتتىقتىڭ جازۋىنشا، وعان قارىمجى رەتىندە ەلىمىزدىڭ ءسىم باسشىسى مۇرات نۇرتىلەۋ بەلارۋستىڭ بىزدەگى ەلشىسىن شاقىرىپ، تۇسىنىكتەمە تالاپ ەتكەن. لۋكاشەنكو «قاجەتسىز اقپارات» دەپ سول جايدى مەڭزەسە كەرەك.

بيىل دا بەلارۋس پرەزيدەنتى الەكساندر لۋكاشەنكو جاڭا ەلشىلەرىن تاعايىنداۋ كەزىندە، تاعى دا وزگەشە مىنەز كورسەتىپتى. قازاقستانعا جىبەرىلگەن جاڭا ەلشىسى الەكسەي بوگدانوۆقا: «سەنى قازاقستانعا ءوز ەركىڭمەن جىبەرىپ جاتىرمىز با، الدە كۇشتەپ وتىرمىز با؟» دەپ ءبىر ءتۇرلى سۇراق قويىپتى.

– الەكسەي، مەن تاعى دا سۇرايمىن. سەنى ءوز ەركىڭمەن بارا جاتىر دەپ ەسەپتەيىك. سوندا سەن قازاقستاندا نەمەن اينالىسپاقسىڭ؟ ارينە، باستىسى — ەكونوميكا. بىراق ءبارىن ەگجەي-تەگجەي ءتۇسىندىر...»، - دەپ تەپسىنىپتى.

بوگدانوۆ ونىڭ سۇراعىنا سابىرمەن جاۋاپ بەرىپ: «مەنى ەشكىم ماجبۇرلەگەن جوق، ءوز ەركىممەن بارا جاتىرمىن، قازاقستانداعى باستى ميسسيام – ەكونوميكالىق قارىم-قاتىناستاردى نىعايتۋ»، - دەپتى.

پۋتين ۋكرايناعا سوعىس باستاعالى بەرى لۋكاشەنكو ونىڭ قاسىنان تابىلىپ، ادال قولداۋشىسى بولىپ كەلەدى. ونىڭ بوداۋىنا رەسەيمەن بىرگە باتىستىڭ سانكتسياسىنا ءىلىنىپ، ەۋرازيالىق ەكونوميكالىق وداقتىڭ ارقاسىندا ەپتەپ كۇن كورۋدە. قازاقستان ەكەۋىنە دە قىتايمەن ساۋدا جاساسۋعا ترانزيت ەل بولىپ وتىر.

ءبىر ەسەپتەن لۋكاشەنكونىڭ وعاش قىلىقتارىن تۇسىنۋگە بولادى. بيىل ونىڭ بيلىگىن كۇشتى سىناقتار كۇتىپ تۇر. الدا پرەزيدەنت سايلاۋى، رەسەيمەن بىرىگۋ كەلىسىمىنىڭ كەلىسىلگەن مەرزىمى دە كەلىپ جەتتى. حالقى ونى قولداي ما، جوق الدىنعى سايلاۋداعىداي جاپپاي ەرەۋىلگە شىعا ما، وسى سۇراقتار وعان مازا بەرمەي تۇرعانى انىق.

Abai.kz