قازاقتا «حالىق ايتسا، قالپ ايتپايدى» دەگەن ءسوز بار. وسى ءسوز كەيبىردە دەپۋتاتتارعا قاراتا ايتىلعان با دەپ تە قالامىز.

ءيا، دەپۋتاتتار وزدەرىن سايلادى-مىس دەيتىن حالىقتان تىم قاشىقتاپ كەتكەن. ياعني، «ەرتوستىك» ەرتەگىسىندەگىدەي: «ەرتوستىگىم – ءبىر توبە، سەگىز ۇلىم – ءبىر توبە». ءۇمىت ەڭ سوڭىنان ۇزىلەدى دەگەن ۇلتتىق پايىمىمىز دا بار. قانشا جەردەن سايلاۋشىلارىن جەرگە قاراتىپ كەلە جاتسا دا، حالىق پارلامەنتتەن ۇلتتىق سيپاتقا يە بولادى-اۋ دەگەن ءۇمىتىن ۇزگەن جوق.

زاڭ ەڭ الدىمەن تيتۋلدى ۇلتتىڭ جوعىن تۇگەندەۋ ءۇشىن شىعادى. «ەۋروپادا اناداي، اقش-تا مىناداي» دەگەن بىلگىشسىنۋدىڭ ەش كەرەگى جوق. ارينە، جۇرت ۇلتتىق پارلامەنت تەك قازاق تىلىندە سويلەگەنىن قالايدى. ەلىمىزدەگى پارتيالاردان سايلاعان ءتۇرلى دەڭگەيدەگى دەپۋتاتتاردىڭ ءتىلدى ءبىلۋىن تالاپ ەتەتىن ارنايى زاڭ كۇتەدى. بىراق دەپۋتاتتار ءتىل دەپ سايراۋىن ءالى قويماي، ونى وزدەرىنەن باستاۋ كەرەك ەكەنىن ۇمىتىپ تا كەتەدى ءھام ەل اڭساعان تىرلىكتى زاڭمەن بەكىتىپ، تارتىپپەن تالاپ ەتۋىن ەستەرىنەن شىعارىپ الادى.

قالانىڭ ماقتامەن باۋىزدارلارى، اۋىلدىڭ جاتىپ اتارلارى پارلامەنتتە قاراپايىم جۇرتقا شەكەسىنەن قاراۋشىلارعا ارناپ تالاي تەرىسقاقپايلار شىعارىپ ۇلگەردى. حالىقتى جاقتايمىن دەپ ءبىر دەپۋتات – كۇلكىگە، ءبىر دەپۋتات – تۇرپىگە اينالدى. ەندى وسى توڭىرەگىندە ءسوز قوزعايىق.

سۋرەت: kaztag.kz سايتىنان الىندى.

حالىقتىڭ مۇڭىنا ورتاقتاسىمىن دەپ «اۋىل» پارتياسىنىڭ سەركەسى دايراباەۆ تەگىس جەردەن ءسۇرىندى. ءبارى دە توراعا ەرلان قوشانوۆتىڭ حالىقتىڭ قارىز الۋى تۋرالى ءسوزى كەزىندە بولدى.

قوشانوۆتىڭ: «دۇرىس، حالىق كەدەيلەنۋدە»، - دەگەنى سول ەدى، دايراباەۆ ءماجىلىس توراعاسىن قولداپ قولپاشتاي باستادى.

قوشانوۆ دەپۋتاتتى سوزدەن توسىپ، توقتاتقان كەزدە دايراباەۆ ارىپتەسىن قولداپ وتىرعانىن ايتتى. سودان كەيىن زال كۇلكىگە كومىلدى. «مەنى قولداۋدىڭ قاجەتى جوق. ءسوز سىزگە اۋىسقاندا، ايتىڭىز. مەنىمەن قاتار وتىرۋدىڭ قاجەتى جوق»، - دەدى ءماجىلىس توراعاسى ساياساتكەرلەر تىنىشتالعان كەزدە.

سۋرەت: parlam.kz سايتىنان الىندى.

ورتالىق سايلاۋ كوميسسياسىنىڭ حابارلاۋىنشا، «قازاقستان حالىق پارتياسى» قوعامدىق بىرلەستىگىنىڭ بيۋرو قاۋلىسىنا سايكەس (2024 جىلعى 23 جەلتوقسان، №27) گاۋحار شايمەردەنقىزى تاناشەۆانىڭ ءماجىلىس دەپۋتاتى رەتىندەگى وكىلەتتىگى توقتاتىلدى. نەگە توقتاتىلعانى كەيىن بەلگىلى بولدى. وسىلايشا، «قازاقستان حالىق پارتياسى» حالىقپەن ەمەس، بيلىكپەن بىرگە ەكەنىن تانىتتى. ەندى بالەنىڭ قايدان شىققانىن ءسوز ەتە كەتەيىك.

حالىقتىڭ الەۋمەتتىك جاعىنان وسال توپتارى ماسەلەلەرىنە ارنالعان دوڭگەلەك ۇستەلدە دەپۋتات گاۋھار تاناشەۆا قازاقستاندا ءار بالاعا 70 مىڭ تەڭگەدەن تولەۋدى ۇسىندى.

«نەگە قازاقستاندا بالا تۋدى ىنتالاندىرماسقا؟ بۇل بولاشاقتا كوپبالالى وتباسى بولا الاتىن جاستارعا باعىتتالۋى كەرەك. كەلەشەكتە قورىقپاي بالالى بولۋى ءۇشىن ولاردى تۇرعىن ۇيمەن قامتۋ (كەرەك - رەد. ەسكەرتپەسى). ءوزىم بىلتىر دەپۋتات بولىپ سايلانعاندا ءار بالاعا 70 مىڭ تەڭگەدەن تولەۋدى ۇسىنعانمىن. بۇل سوما ەڭ تومەنگى جالاقىعا تەڭ بولدى. مۇنى مەن 2023 جىلى ۇسىنعان ەدىم. ارينە، بۇل سوما دا جەتكىلىكسىز. بالا سانىنا قاراماستان، كوپبالالى وتباسى ما، كوپبالالى وتباسى ەمەس پە، وتباسىنداعى ءبىر بالاعا – 70 مىڭ. ءبىر بالاڭىز بار ما؟ سىزگە 70 مىڭ تەڭگە. ويتكەنى ءسىز وسى وتانعا قىزمەت ەتەتىن، ونى قورعايتىن، وسىندا جۇمىس ىستەيتىن، سالىق تولەيتىن، ەلىمىزدى دامىتاتىن قازاقستان ازاماتىن دۇنيەگە اكەلدىڭىز. سوندىقتان ءبىز ءاربىر ادامدى باعالاي ءبىلۋىمىز كەرەك»، - دەدى دەپۋتات گاۋحار تاناشەۆا.

سپيكەرگە «مۇنداي نورمانى قانداي دا ءبىر ناقتى زاڭ جوباسىنا ەنگىزۋ جوسپارلانىپ وتىرعان جوق پا؟» دەگەن سۇراق قويىلدى. گاۋحار تاناشەۆا زاڭ جوباسىن ازىرلەۋ جانە ەنگىزۋ وڭاي ەمەس ەكەنىن ايتىپ، قانداي دا ءبىر تۇزەتۋلەر ەنگىزىلىپ، قورىتىندىعا جىبەرىلگەنىن اتاپ ءوتتى.

دەپۋتات 70 مىڭ تەڭگە تولەم ەنگىزۋ تۋرالى العاشقى ۇسىنىسىندا-اق وعان اقشا جوق ەكەنىن ايتقانىن مالىمدەدى. «بۇل سۇراقتى كوتەرگەندە، مەنىڭ دەپۋتاتتىق ساۋالىما «شىعىنى كوپ نورما» دەگەن جاۋاپ الدىم. قارجىلاندىرۋ جوق. بيۋدجەتتە قارجى جوق. بۇل ءان قازىر دە ايتىلىپ جاتىر، ول ماڭگى جالعاسا بەرەدى. بىراق ءبىزدىڭ مىندەتىمىز – ارى قاراي ەنگىزۋ جانە ەنگىزۋ» - دەيدى گاۋھار تاناشەۆا.

ءيا، گاۋحار ءۇشىن وسى ۇسىنىسى دەپۋتاتتىق مانداتىنان ايىرىلۋعا اكەپ سوقتىردى. وسىلايشا، ەرتىسباەۆتىڭ قالتا پارتياسى انالاردىڭ اق ءۇمىتىنىڭ جولىن كەستى.

ءابىل-سەرىك الىاكبار

Abai.kz