اندرەي زۆورىكين رەسەيدەگى «ەۋرازيا جاستار قوزعالىسىنىڭ» تەڭ توراعاسى. تومەندە ونىڭ قىتايدىڭ «باقىلاۋشى» ينتەرنەت باسىلىمىنا بەرگەن سۇحباتىن اۋدارىپ بەرىپ وتىرمىز.

ءتىلشى: قىتايدا الەكساندر دۋگين باتىس ليبەراليزمىن قاتاڭ سىناۋىمەن تانىمال، ونىڭ «ءپۋتيننىڭ ميى» دەگەن اتاعى دا بار. بۇگىنگى ورىس زيالىلارىنىڭ اراسىندا دۋگيننىڭ ورنى مەن ىقپالى قانداي؟

اندرەي زۆورىكين: «ءپۋتيننىڭ ميى» – باتىس جۋرناليستەرى مەن ويشىلدارى اراسىندا وتە كەڭ تارالعان كوزقاراس. ادامدار پۋتين دۋگيننىڭ بارلىق يدەيالارىن جۇزەگە اسىرسا، بۇل ءسوزسىز رەسەي مەن باتىس اراسىنداعى كۇردەلى قاقتىعىسقا الىپ كەلەدى دەپ قاۋىپتەنەدى. دۋگيننىڭ 2005-جىلى «گەوساياسات نەگىزدەرى» كىتابى جاريالانعاننان بەرى باتىستا سونداي الاڭ كوڭىل كۇشەيدى.

انىعىندا، دۋگين ورىس زيالىلارىنىڭ ورتاسىندا وتە بەلسەندى، ارىپتەستەرىنىڭ اراسىندا بەدەلدى بولعانىمەن، بىراق ول ساياسي يادروعا تىم جاقىنداي قويعان جوق. ءوز كوزقاراسىن ءاردايىم فيلوسوف جانە ويشىل رەتىندە ءبىلدىرىپ كەلەدى.

قازىرگى ۋاقىتتا ول رەسەيدىڭ جەتەكشى گۋمانيتارلىق ۋنيۆەرسيتەتتەرىنىڭ ءبىرى – رەسەي مەملەكەتتىك گۋمانيتارلىق ۋنيۆەرسيتەتىنىڭ ساياساتتانۋ ينيستيتۋتىنىڭ رەكتورى. دۋگين رەسەيدىڭ جوعارى ءبىلىم سەكتورىنداعى وقىتۋشىلارمەن كۇندەلىكتى بايلانىستا. ۋنيۆەرسيتەت وقىتۋشىلارىنا لەكتسيا وقيدى، ولار ءوز ستۋدەنتتەرىنە ءدارىس بەرەدى. ورىس ستۋدەنتتەرىنىڭ پاتريوتتىق سەزىمىن كوتەرۋگە جۇمىس جاسايدى.

الەكساندر دۋگيننىڭ بىرنەشە ماڭىزدى اكادەميالىق كوزقاراستارى بار. العاشقىسى ونىڭ ساياسي سالاداعى ەڭ ماڭىزدى كوزقاراسى – «ەۋرازياشىلدىق».

20-عاسىردىڭ باسىنداعى ىشكى سوعىستا بولشەۆيكتەر جەڭىسكە جەتكەننەن كەيىن، بوسقىن بولعان اقتاردىڭ اراسىندا «ەۋرازياشىلدىق» ۇعىمى قانات جايدى. «ەۋرازياشىلدىقتى» جاقتايتىندار رەسەيدى «ەۋروپالىق ەل ەمەس» دەپ ەسەپتەيدى، بۇل كوزقاراستى بۇرىن دا كوپ ادامدار ۇستانعان، قازىر دە قولداۋشىلار قاراسى باسىم.

بۇل كوزقاراس بويىنشا «موڭعول-تاتار» داۋىرىندە موڭعولدار ورىستىڭ مەملەكەتتىك ساناسىنىڭ قالىپتاسۋىنا ۇلكەن ۇلەس قوستى. وسى كەزەڭدە ورىس كنيازدىكتەرى «التىن ورداعا» تاۋەلدى بولىپ، رەسەي ءوزىنىڭ دامۋ جولىندا ەۋروپادان الشاقتاي باستادى، سودان باستاپ رەسەي ءوزىنىڭ دەربەس وركەنيەتىن قالىپتاستىردى. سوندىقتان رەسەيدى جالاڭ ەۋروپالىق نەمەسە ازيالىق ەل دەپ قاراستىرۋدىڭ قاجەتى جوق. رەسەي – ەۋروپا مەن ازيانىڭ قوسىندىسى.

دۋگيننىڭ ەكىنشى ماڭىزدىسى يدەياسى – رەسەيگە عانا قاتىستى «ەۋرازياشىلدىق» تۇجىرىمداماسىن كەڭەيتكەن، بۇكىل ادامزات مۇددەسىنە ساياتىن «كوپ ۇيەكتى الەم» ۇستانىمى.

ونىڭ پايىمداۋىنشا، باتىستىق دامۋ مودەلى – الەمنىڭ ءار تۇكپىرىندە قولدانىلاتىن، بارشاعا ساي كەلەتىن جالعىز دامۋ مودەلى ەمەس. كەرىسىنشە، قىتاي وركەنيەتى، ءۇندى وركەنيەتى، لاتىن امەريكاسى وركەنيەتى سياقتى ءاربىر دامىعان وركەنيەت ءوزىنىڭ ساياسي، فيلوسوفيالىق جانە مادەني يدەيالارىنا يە، باتىستىق ۇلگىگە، باتىس مادەنيەتىنە سايكەس كەلۋگە مىندەتتى ەمەس. بۇل دۋگيننىڭ ەكىنشى نەگىزگى كوزقاراسى.

دۋگيننىڭ ءۇشىنشى نەگىزگى يدەياسى – «ءتورتىنشى ساياسي تەوريا». «ءتورتىنشى ساياسي تەوريا» كونتسەپتسياسى ءىس جۇزىندە مەن جوعارىدا ايتقان كەيبىر كونتسەپتسيالارمەن بايلانىسسىز ەمەس. ونىڭ نەگىزگى مازمۇنى قازىرگى الەمدە ءۇش نەگىزگى ساياسي تەوريا بار: ليبەراليزم، سوتسياليزم جانە ۇلتشىلدىق، ۇشەۋى دە رۋحاني تۇرعى دا «ادامزاتتىڭ قۇتقارۋشى جۇلدىزى» بولعىسى كەلەدى. مىسالى، «ەركىن دۇنيە» دەگەن ليبەرالدىق كونتسەپتسيا، ءسوتسياليزمنىڭ «الەمدىك رەۆوليۋتسياسى»، ناتسيزم مەن ونىڭ ءىزباسارلارى ۇسىنعان «جاڭا دۇنيە ءتارتىبى» تەورياسى.

دۋگين ءبىر پوليارلى الەمدىك ءتارتىپ بىرتىندەپ اۋىستىرىلىپ جاتقان قازىرگى قوعامدا ءۇش تەوريانىڭ دا بۇرىنعىداي ماڭىزدى جوق دەپ سانايدى. ول گەرمانيانىڭ ءۇشىنشى رەيحىندە بەينەلەنگەن اسىرە ۇلتشىلدىق، سونداي-اق ماركستىك ماعىناداعى ءداستۇرلى ءسوتسياليزمىڭ، اقىر سوڭىندا ليبەراليزمنەن جەڭىلگەنىن اتاپ وتەدى. الدىمەن فاشيزم قۇلادى، كەيىن كەڭەستىك كوممۋنيستىك يدەولوگيا قۇلاپ، اقىرى ليبەراليزم جەڭىسكە جەتتى. بىراق ليبەراليزمنىڭ ورىنىن «ءتورتىنشى ساياسي تەوريا» باسادى، ونىڭ بۇرىنعى ءۇش ساياسي تەوريادان ايىرماشىلىعى جالپىعا ورتاق بولماۋىندا. بۇل «كوپ ۇيەكتى الەم» تەورياسىمەن تىكەلەي بايلانىستى، ياعني ءاربىر وركەنيەتتىڭ ءوز ۇلگىسىندەگى «ءتورتىنشى ساياسي تەورياسى» بولادى، ول ءار حالىقتىڭ دۇنيەگە وزىندىك تۇسىنىگى نەگىزىندە قالىپتاسادى.

دۋگين قىتاي حالىق رەسپۋبليكاسىنىڭ «قىتايلىق ەرەكشەلىككە يە ءسوتسياليزمىن»، ءۇندىستاننىڭ دىننەن جوعارى تۇراتىن «حيندۋتۆا» يدەولوگياسىن جانە رەسەي پرەزيدەنتى ۆلاديمير پۋتين ۇسىنعان «رەسەيلىك ءداستۇرلى قۇندىلىقتاردى» – «ءتورتىنشى ساياسي تەوريا» قاتارىنا جاتقىزادى

ءتىلشى: الەكساندر دۋگيننەن باسقا، ورىس قوعامىندا تاعى قانداي ىقپالدى زيالىلار بار؟ قىتايلىقتار بۇل تۋرالى كوپ بىلە بەرمەيدى. ءسىز قازىرگى ويشىلداردان باستاپ تانىستىرا كەتسەڭىز...

اندرەي زۆورىكين: باقيلىق بولسا دا، 1990-جىلدارى دۋگيننىڭ اعا كومەكشىسى بولعان ەدۋارد ليمونوۆتى ايرىقشا اتاپ وتكىم كەلەدى.

ليمونوۆ ءوزىن «ۇلتشىل بولشەۆيكپىن» دەپ اتادى. 1993-جىلى قازاندا ەلتسين اسكەر شىعارىپ رەسەي فەدەراتسياسىنىڭ جوعارعى كەڭەسىن كۇشتەپ تاراتقاننان كەيىن، كوپ ۇزاماي ول «ۇلتتىق بولشەۆيكتەر پارتياسىن» قۇردى. ليمونوۆ باستاعان پارتيزان وتريادى قازاقستاننىڭ سولتۇستىگىندە بۇلىك ۇيىمداستىرماق بولعانى ءۇشىن پارتيانىڭ بارلىق قىزمەتىنە تىيىم سالىنىپ، ليمونوۆتىڭ ءوزى قارۋ كونترابانداسى ءۇشىن تۇتقىندالىپ، تۇرمەگە جابىلدى.

تۇرمەدەن شىققان سوڭ جاڭا ساياسي پارتيا قۇردى، وعان تىيىم سالىنعان جوق. 2020-جىلى ليمونوۆ قايتىس بولعاننان كەيىن پارتيانىڭ اتاۋى «ەدۆارد ليمونوۆتىڭ باسقا رەسەيى» بولىپ وزگەرتىلدى. ليمونوۆ سوتسياليستىك تەوريانى ۇلتشىلدىق يدەيالارمەن ۇشتاستىرعان تۇلعا. بۇل تۇرعىدا ول جاس دۋگيننىڭ ىقپالىنا ۇشىرادى. ەكەۋى 1990-جىلدارى «ۇلتتىق بولشەۆيكتەر پارتياسىن» بىرگە باسقاردى.

الايدا 1990-جىلداردىڭ اياعىندا ەكەۋىنىڭ جولى ەكى ايىرىلدى. دۋگين جاڭا كەلگەن ۆلاديمير ءپۋتيندى قولدادى، ليمونوۆ پۋتين بوريس ەلتسيننىڭ ليبەرالدىق جولىن جالعاستىرادى دەپ قولداۋدان باس تارتى. ءبىر قىزىعى، 2012-جىلعى نارازىلىقتار كەزىندە ليمونوۆ ليبەرالدارمەن بىرىگىپ، ءپۋتيننىڭ باسشىلىعىن قۇلاتۋعا تىرىستى.

ليمونوۆ مادەنيەت پەن سىرتقى ساياساتتا اسىرە ۇلتشىلدىق باعىتتى ۇستاندى جانە بارلىق ورىستاردى ءبىر مەملەكەتكە بىرىكتىرۋدى كوزدەدى. ەكونوميكالىق سالادا ول سولشىل كوزقاراستاردى ۇستاندى. «وليگارحتاردى جويۋ» – ونىڭ پارتياسىنىڭ باستى ۇراندارىنىڭ ءبىرى بولدى.

كەلەسى تانىستىراتىنىم الەكساندر دۋگيننىڭ تاعى ءبىر ارىپتەسى، ورىس جازۋشىسى جانە ءجۋرناليستى الەكساندر اندرەەۆيچ پروحانوۆ. ول كۇنى بۇگىنگە دەيىن دۋگينمەن جاقسى قارىم-قاتىناستا.

كەڭەس كەزىندە پروحانوۆ اسكەري ءتىلشى بولدى، ول ءوز ومىرىندە الەمنىڭ ءتۇرلى ەلدەرىندەگى 24 سوعىس وشاعىنا بارىپ، كەڭەستىك جانە رەسەيلىك ءارتۇرلى باسىلىمدارعا رەپورتاج جازدى. 1990-جىلدارى پروحانوۆ ەلتسينگە وتە قارسى بولدى جانە 1993 جىلى قازاندا اق ۇيدە وتكەن ەلتسينگە قارسى ءىس-شارانى قولدادى. ول «كۇن» دەپ اتالاتىن گازەت شىعاردى، ونى كەيىن «ەرتەڭ» دەپ وزگەرتتى.

پروحانوۆتىڭ يدەياسى جالپىلاما سيپاتتا، بىراق ول ءسوتسياليزمدى پراۆوسلاۆيەلىك كونسەرۆاتيزممەن بىرىكتىردى. ول رەسەي يمپەرياسى – ريم يمپەرياسىنىڭ جالعاسى دەپ سانايدى. ونىڭ پايىمداۋىنشا، قازىرگى ادامزات تاريحىندا رەسەي دە يسا سياقتى قايتا ءتىرىلۋى كەرەك; رەسەي باسىندا 1990-جىلدارى ۇمىتسىزدىك قۇردىمىنا قۇلاپ، قايتا ەس جيىپ، ەڭسە كوتەردى، تۇبىندە الەمدىك دەرجاۆاعا اينالادى.

كەلەسى ايتا كەتەتىن ادام – زاحار پريلەپين. زاحار پريلەپين – ونىڭ قالام اتى، شىن ەسىمى – ەۆگەني نيكولاەۆيچ پريلەپين. پريلەپين «شەشەن سوعىسىنا» قاتىسىپ، «ارنايى ماقساتتاعى جىلجىمالى بولىمشەنىڭ» (ومون) قۇرامىندا بولدى. ونى بۇرىنعى پوليتسيا قىزمەتكەرى دەپ ايتۋعا دا بولادى.

سوعىستان كەيىن ول ليمونوۆتىڭ پارتياسىنا ءوتىپ، ورىس ۇلتشىلدىعىن دارىپتەي باستادى. سونىمەن بىرگە ول بۇرىنعى كەڭەس وداعى مەن سوتسياليستىك ەكونوميكاعا جاڭاشا قۇرمەتپەن قاراي وتىرىپ، پۋبليتسيستيكالىق جازبالار مەن كوركەم روماندار جازا باستادى، ولاردىڭ ىشىندەگى ەڭ تانىمالى – ورىس بوزبالاسىنىڭ «ۇلتتىق بولشەۆيكتەر پارتياسىنىڭ» قۇرامىنا قوسىلۋىن ارقاۋ ەتكەن «سانكيا» رومانى. كەيىن ول ءپۋتيننىڭ ساياساتىن قولداپ ليمونوۆپەن بايلانىسىن ءۇزدى. ءوزىنىڭ «اقيقات ءۇشىن» قوزعالىسىن قۇردى، كەيىن قوزعالىس پاتريوتتىق سوتسيال-دەموكراتيالىق پارتيا «ءادىل رەسەيمەن» بىرىكتى.

ەگور ستانيسلاۆوۆيچ حولموگوروۆ – قازىرگى ورىستىڭ ۇلتشىل زيالىلارىنىڭ ءبىرى، بىراق باسقا تۇلعالاردان ايرىقشا ەرەكشەلەنەدى. ول كوپكە تانىمال عالىم ءارى بلوگەر، الەۋمەتتىك جەلىدە وتە بەلسەندى. ءوز ويلارىن ۇنەمى ورتاعا سالىپ تۇرادى.

حولموگوروۆ ورىس ۇلتشىلى، رەسەي يمپەرياسىنىڭ جاقتاۋشىسى جانە بۇرىنعى كەڭەس وداعىمەن بايلانىستى بارلىق نارسەگە تۇبەگەيلى قارسى تۇرۋشى. موڭعولداردىڭ ورىس مادەنيەتىنە ىقپالى ماسەلەسىندە ول دۋگين سياقتى «ەۋرازياشىلدىق» كوزقاراستى ۇستانۋشىلارمەن ءجيى ايتىسادى. ول رەسەيدىڭ دارا وركەنيەت رەتىندە ءوزىنىڭ ەرەكشە دامۋ جولى بولدى دەپ سانايدى. «التىن وردانى» رەسەي تاريحىنداعى تەرىس فاكتور دەپ قاراپ، پراۆوسلاۆيەنىڭ رەسەيگە باتىس كاتوليكتىك ەلدەرىنەن ەمەس، ۆيزانتيا يمپەرياسىنان كەلگەنىن اتاپ وتەدى.

ۆلاديسلاۆ يۋرەۆيچ سۋركوۆ – جوعارىدا اتالعانداردان مۇلدە باسقا تيپتەگى ادام. باسقالاردان ايىرماشىلىعى ول ساياساتپەن تىكەلەي اينالىسىپ، 2004-2008 جىلدار ارالىعىندا ءتورت جىل بويى رەسەي فەدەراتسياسى پرەزيدەنتىنىڭ كومەكشىسى بولدى، ءبىرىنشى دارەجەلى مەملەكەتتىك كەڭەسشى.

سۋركوۆ ءوزىن ورىس ۇلتشىلى سانامايدى، ءتىپتى ورىستى ەرەكشە وركەنيەت دەيتىندەرمەن دە كەلىسپەيدى. ساياسي سالادا سۋركوۆ «ەگەمەندى دەموكراتيا» تۇجىرىمداماسىن ۇسىندى، بۇل رەسەي ۇكىمەتىنىڭ رەسمي يدەولوگياسى بولدى دەپ ايتۋعا بولادى، دەگەنمەن رەسەي ۇكىمەتى ونى ەشقاشان جاريا تۇردە ايتقان ەمەس.

سۋركوۆتىڭ پايىمى بويىنشا، باتىستىق دەموكراتيادان ايىرماشىلىعى، «ەگەمەندى دەموكراتيا» ەگەمەندىكتىڭ (ياعني رەسەي فەدەراتسياسى پرەزيدەنتىنىڭ) قاراماعىندا جۇمىس ىستەيتىن بەكىتۋشى-كەڭەسشى ورگاندار ارقىلى جۇزەگە اسادى، بۇل جۇيەدە بارلىق بيلىك رەسەي فەدەراتسياسىنىڭ پرەزيدەنتىندە بولادى، بىراق ول حالىقتىق سايلاۋ ارقىلى سايلانادى، سونداي-اق رەسەيدەگى ىقپالدى ەليتانىڭ پىكىرىمەن دە ساناسۋى كەرەك.

سىرتقى ساياسات سالاسىندا سۋركوۆ «سولتۇستىك ەۋرازيا» كونتسەپتسيانىڭ جاقتاۋشىسى بولىپ تابىلادى، وعان سايكەس رەسەي ەۋروپانىڭ ەۋرازيانىڭ بايتاق سولتۇستىك-شىعىس كەڭىستىگىندەگى جالعاسى بولىپ تابىلادى. سول سەبەپتى رەسەي جەكە دارا وركەنيەت ەمەس، كەرىسىنشە وشۋگە اينالعان ەۋروپانىڭ دەموكراتيا الاۋىن قايتا جاعىپ، ولاردىڭ كوشباسشىسى بولۋعا لايىقتى. ولاردى باستاپ وزگە وركەنيەتتەرمەن (قىتاي جانە ءۇندى وركەنيەتتەرى) بەتپە-بەت كەلۋگە جول سالۋشى.

ءتىلشى: سۋركوۆتىڭ پىكىرىنشە، وركەنيەتتەر قاقتىعىسى قانداي فورماتتا؟ وركەنيەتتەر قاقتىعىسىنىڭ الدىن الۋعا بولا ما؟

اندرەي زۆورىكين: وركەنيەتتەر اراسىنداعى قاقتىعىس اسكەري سيپاتتاعى قاقتىعىس ەمەس. سۋركوۆ ءبىر كەزدەرى رەسەي كوپتەگەن باتىس ەلدەرىنىڭ اراسىندا كوشباسشى بولعان جاعدايدا نە بولاتىنىن مىسالعا كەلتىردى.

قازىرگى ۋاقىتتا اقش پەن ەۋروپا ەلدەرى قىتايدى وبەكتيۆتى سەبەپتەرمەن باستى قارسىلاس سانايدى. ەگەر رەسەي باتىس الەمىنىڭ كوشباسشىسى بولسا، سۋركوۆتىڭ پىكىرىنشە، رەسەي دە بۇكىل باتىستى قىتايعا قارسى قويادى. قارسىلىق فورماسى قازىرگى جاعدايعا ۇقساس بولادى، ساۋدا سوعىسى، نەمەسە ەكىنشى جاقپەن سوعىس، اسكەري شيەلەنىس. قازىرگى تاڭداعى قىتاي مەن اقش اراسىندا شيەلەنىس سياقتى، رەسەي دە قىتايمەن تىكەلەي اسكەري قاقتىعىس قاۋپىنە ۇشىراۋى مۇمكىن.

ارينە، ەگەر ەكىنشى ءبىر تاراپ كىشپەيىلدىك تانىتا السا، جاعدايدى جەڭىلدەتۋگە جانە اسكەري قاقتىعىستى بولدىرماۋعا بولادى. كەڭەس وداعى ىدىراعاننان بەرى رەسەي باتىس الەمىنە باعىنىشتى ءرول اتقارىپ كەلەدى.

ءتىلشى: ءسىز جوعارىدا كوپتەگەن تۇلعالاردى اتاپ ءوتتىڭىز، ولاردىڭ يدەياسىنىڭ ماڭىزدىلىعىن قالاي باعالايسىز؟ ولاردىڭ قازىرگى رەسەيدىڭ رۋحانياتى مەن ساياساتىنا قانداي اسەرى بار؟

اندرەي زۆورىكين: بۇل تۇلعالاردىڭ ىشىندە سۋركوۆ ەرەكشە، ويتكەنى ول كرەملدە جۇمىس اتقارعان جانە ءالى دە سولاي. ونىڭ ۆلاديمير پۋتينمەن جەكە قارىم-قاتىناسى بار، كەم دەگەندە ول پۋتينمەن تىكەلەي سويلەسكەن، كەڭەس بەرگەن ادام. پۋتين مەن سۋركوۆتىڭ قارىم-قاتىناسى بۇرىنعىداي جاقىن بولماسا دا، سۋركوۆتىڭ ءاربىر جاڭا ماقالاسى ءالى دە ءپۋتيننىڭ ۇستەلىندە تۇرادى دەپ ايتىلادى.

باسقا ويشىلدارعا كەلەر بولساق، جاعداي، ارينە، كۇردەلىرەك. «ارنايى اسكەري وپەراتسياعا» دەيىن رەسەي باتىسپەن تەڭ دارەجەدە قارىم-قاتىناس ورناتۋعا تىرىستى. ۋكرايناعا قاتىستى «مينسك كەلىسسوزدەرى» كەزىندە ۆلاديمير ۇلتشىلداردىڭ پىكىرىنە قۇلاق اسا قويعان جوق. اسىرە ۇلتشىلدار «بۇل رەسەيدىڭ نازارىن باسقا جاققا اۋدارۋ ارەكەتى، ۋكراينا ماسەلەسىن شەشۋدىڭ جولى اسكەري كۇش قولدانۋ» دەپ قارادى. رەسەيدىڭ 2014-جىلدان كەيىن باسقا تاڭداۋى قالمادى.

قازىر ۇلتشىل زيالىلاردىڭ ىقپالى ءتىپتى دە ارتا ءتۇستى. وعان تەلەارنالاردان تۇسپەيتىن، ءوز الدىنا ينيستيتۋت قۇرعان دۋگين مىسالى دالەل. ارينە اتى اتالعانداردىڭ ءبارى دە ساياستقا ىقپال ەتكىسى كەلەدى. ولاردىڭ اسەرى جوعارىدان تومەنگە ەمەس، تومەننەن جوعارىعا. ولار قوعامدىق ۇيىمدار مەن قوزعالىستار قۇرۋ ارقىلى ساياساتقا ىقپال ەتەدى.

الەكساندر دۋگين حالىقارالىق ەۋرازيالىق قوزعالىسىن قۇرىپ. رەسەي مەن تمد ەلدەرىندە جانە ودان تىس جەرلەردە ءوزىنىڭ ساياسي تەوريالارىن تاراتتى. زاحار پريلەپين «اقيقات ءۇشىن» قوزعالىسىن قۇرىپ، ول كەيىننەن «ادىلەتتى رەسەي» پاتريوتتىق سوتسيال-دەموكراتيالىق پارتياسىمەن بىرىكتى.

ارينە، ولاردىڭ بارلىعى عىلىمي كىتاپتار جازۋ ارقىلى ينتەللەكتۋالدىق الەممەن ارالاسىپ، كەيدە كوركەم ادەبيەت ارقىلى دا قالىڭ جۇرتشىلىققا وي تاستايدى. مىسالى، ەدۆارد ليمونوۆ مۇنى جاسادى. سونىمەن قاتار، الەكساندر پروحانوۆ پەن زاحار پريلەپين دە رومان فورماسىن قولدانىپ ءجۇر.

قىتاي تىلىنەن اۋدارعان: ەسبول ۇسەنۇلى

Abai.kz