دەپۋتات سارىم ەكس-پرەزيدەنتتىڭ قىزى تۋرالى پىكىر ءبىلدىردى... دەپۋتات ايدوس سارىم جەلىدە جەلدەي ەسىپ تۇرعان «داريعا نازارباەۆا ۆيتسە-پرەزيدەنت بولۋى مۇمكىن» دەگەن قاۋەسەتكە پىكىر ءبىلدىردى دەپ حابارلايدى Ertenmedia.kz.

ماجىلىسمەن داريعانىڭ ساياساتقا ورالۋ مۇمكىندىگىن تولىق جوققا شىعارىپ، وعان ەشقانداي نەگىز جوق ەكەنىن ايتتى.

«مەنىڭشە، داريعا نۇرسۇلتانقىزىنىڭ ءداۋىرى ءوتتى. ول، ول ما ساياسي تۇرعىدا وتە-موتە سۇيكىمسىز تۇلعاعا اينالىپ كەتكەن ساياساتكەر. ارينە، ەشكىم وعان قوعامدىق نە ساياسي ىسپەن اينالىسۋعا، قانداي دا ءبىر پارتياعا مۇشە بولۋعا تىيىم سالا المايدى.

ال پارتيالار ونى ءوز قاتارىنان كورگىسى كەلە مە، كەلمەي مە، بۇل ەندى باسقا ماسەلە. سوندىقتان داريعا ۆيتسە-پرەزيدەنت نەمەسە پرەمەر بولادى دەگەن اڭگىمەگە مۇلدە يلانبايمىن. ەل اراسىنان «داريعا نۇرسۇلتانقىزى، كەلىڭىز، ءبىزدى قۇتقارىڭىز…» دەپ ايتاتىن ادام تابىلادى دەپ تە ويلامايمىن.

شىنىمدى ايتسام، مۇنداي جاعدايدىڭ ورىنا الارىنا سەنۋ قيىن»، – دەدى ايدوس سارىم.

ول ەكس-پرەزيدەنتتىڭ ۇلكەن قىزىنىڭ ساياساتقا قايتا ورالۋ ىقتيمالدىعىن «ەسەپ-قيساپقا شاعىپ، نولگە جۋىق، جوققا ءتان» دەپ باعالادى.

تىلشىلەر دەپۋتاتقا «داريعا نازارباەۆا «حالىق كەڭەسىنىڭ» مۇشەسى بولا الا ما؟» دەگەن ساۋال دا قويدى.

«ونىڭ وعان نە قاجەتى بار؟ سىزدەر ونى قازىر ناشار ءومىر ءسۇرىپ جاتىر دەپ ويلايسىزدار ما؟» – دەپ جاۋاپ بەردى دەپۋتات ايدوس سارىم.

ايتا كەتەلىك، وسىنىڭ الدىندا عانا سارىمنىڭ ارىپتەسى ابزال قۇسپان «ۆيتسە-پرەزيدەنت كرەسلوسىندا داريعانىڭ كولەڭكەسى كورىنبەي مە» دەگەن ساۋالعا جاۋاپ قاتقان-تۇعىن.

Abai.kz