تاۋ شاڭعى سپورتىنان ۇلتتىق قۇراما سوڭعى رەت جەڭىس تۇعىرىنا 2011 جىلى قازاقستاندا وتكەن ازيا ويىندارىندا شىققان. اراعا 14 جىل سالىپ، ۇلتتىق قۇراما قايتادان التىن مەدالعا يە بولا الا ما؟ بۇل تۋرالى Olympic.kz سايتى جازدى.

تاۋ شاڭعى سپورتى - سپورتشىلاردىڭ قارلى تاۋ بەتكەيلەرىنەن ارنايى دايىندالعان جولدار ارقىلى ءتۇسۋىن قامتيتىن سپورت ءتۇرى. اتالمىش ديستسيپلينا قىسقى ازيا ويىندارىندا 1986 جىلدان باستاپ وتكىزىلىپ كەلەدى.

نەگىزىنەن تاۋ شاڭعى سپورتى بىرنەشە ديستسيپلينانى قامتيدى. اتاپ ايتساق، سلالوم، الىپ سلالوم، وتە الىپ سلالوم، جىلدام ءتۇسۋ جانە سۋپەركومبيناتسيا.

جالپى، سلالوم جانە الىپ سلالوم ديستسيپلينالارى 2011 جىلدى ساناماعاندا، بارلىق دەرلىك قىسقى ازيا ويىندارىندا وتكەن. ال 2011 جىلى قازاقستاندا ۇيىمداستىرىلعان مۋلتسپورتتىق ءىس-شارادا تەك سۋپەركومبيناتسيا، وتە الىپ سلالوم جانە جىلدام ءتۇسۋ ديستسيپلينالارى قامتىلعان.

قازاقستان قۇراماسىنا كەلەر بولساق. ۇلتتىق كوماندا تاۋ شاڭعى سپورتىنان كوشباسشىلار قاتارىندا ەمەس. دەي تۇرعانمەن، ازيا ويىندارىنداعى جەتكىن جەتىستىكتەرىن اتاپ وتكەن ءجون بولار.

ەرلەر اراسىندا سلالومنان ۇزدىك ناتيجە كورسەتكەن سپورتشى ءالى تىركەلمەدى. ەسەسىنە ايەلدەر اراسىندا قازاقستاندىق ولگا ۆەدياشەۆا بار. وتانداسىمىز 1996 جانە 1999 جىلعى قىسقى ازيا ويىندارىندا ونەر كورسەتكەن. ۆەدياشەۆا 1996 جىلى حاربيندە وتكەن قىسقى ازيا ويىندارىندا الىپ سلالوم جانە وتە الىپ سلالومعا قاتىسقان. ناتيجەسىندە 1 التىن مەدال مەن 1 كۇمىس ەنشىلەگەن. ال 1999 جىلى كانۆوندو دا وتكەن ويىنداردا سلالوم ديستسيپليناسى بويىنشا دا ونەر كورسەتىپ، كۇمىس مەدال يەلەنگەن. ودان بولەك الىپ سلالومدا التىن، وتە الىپ سلالومدا قولا جۇلدەگە يە بولعان. سونداي-اق، الىپ سلالومدا يۋليا كرىگينا قولا جۇلدەنى قاناعات تۇتقان.

2011 جىلعى قازاقستاندا وتكەن قىسقى ازيا ويىندارى ەرەكشەلەنگەن ەدى. اتالمىش دودادا تاۋ شاڭعى سپورتى تەك ءۇش ديستسيپلينانى قامتىدى: وتە الىپ سلالوم، سۋپەركومبيناتسيا جانە جىلدام ءتۇسۋ.

قازاقستان جەرىندە وتكەن مۋلتيسپورتتىق شارادا ۇلتتىق قۇراما 3 التىن، 5 كۇمىس جانە 2 قولا مەدال ەنشىلەگەن. ەرلەر اراسىندا دميتري كوشكين جانە يگور زاكۋرداەۆ ونەر كورسەتتى. سونىڭ ىشىندە وتە الىپ سلالومدا يگور زاكۋرداەۆ التىننان القا تاقسا، جىلدام تۇسۋدە دميتري كوشكين ۇزدىك اتاندى. جانە دە وسى ديستسيپلينالاردا ءبىر-ءبىر كۇمىس مەدال بار.

ايەلدەر اراسىنداعى سۋپەركومبيناتسيادا ليۋدميلا فەدوتوۆا التىنعا يە بولدى. سونداي-اق، ول وتە الىپ سلالوم جانە جىلدام تۇسۋدە كۇمىس مەدال يەلەنسە، سۋپەركومبيناتسيا مەن جىلدام تۇسۋدەن كسەنيا سترويلوۆا قولا جۇلدەگە قول جەتكىزگەن.

ەندى جالپى مەدالدىق ەسەپ تۋرالى ايتساق، قازاقستان قۇراماسى كەستەدە ءۇشىنشى ورىندا تۇر. ۇلتتىق قۇراما قورجىنىندا 5 التىن مەدال، 7 كۇمىس جانە 4 قولا جۇلدە بار.

2025 جىلى حاربيندە وتەتىن قىسقى ازيا ويىندارىنا قازاقستان اتىنان كىمدەر باق سىنايدى؟ تومەندە اتالمىش جارىسقا باراتىن سپورتشىلاردىڭ ءتىزىمى كورسەتىلگەن:

- زاحار كۋچين

- روستيسلاۆ حوحلوۆ

- الەكسەي كۋلاكوۆ

- دانيل سىسوەۆ

- الەكساندرا ترويتسكايا

- كسەنيا بەرەجنايا

- ماريا شكاباروۆا

- الەكساندرا سكوروحودوۆا

قازاقستان ۇلتتىق قۇراماسىنىڭ سوڭعى ناتيجەلەرىن ەسكەرە وتىرىپ، فاۆوريتتەر قاتارىنا جاتقىزۋ قيىن. مىسالى 2022 جىلى بەيجىڭدە وتكەن وليمپيادانى الساق، سول تۋرنيردە زاحار كۋچين ەل نامىسىن قورعاعان ەدى. الايدا سپورتشى الىپ سلالومدا قاشىقتىقتى ەڭسەرە المادى. اتلەتتىڭ ايتۋى بويىنشا بۇعان اۋا رايىنىڭ قولايسىزدىعى سەبەپ بولعان.

سونداي-اق، ايەلدەر اراسىندا الەكساندرا ترويتسكايا ونەر كورسەتتى. وكىنىشكە قاراي، وتانداسىمىز سلالومدا مارەگە جەتە المادى.

2025 جىلى قىتايدىڭ حاربين قالاسىندا وتەتىن قىسقى ازيا ويىندارىنداعى باستى فاۆوريتتەرگە توقتالساق. ارينە، بۇل ءسوزسىز جاپونيا قۇراماسى. جاپونيالىقتار بارلىق ديستسيپلينالاردا ۇزدىك ەكەندەرىن دالەلدەي ءبىلدى. جالپى مەدالدىق ەسەپتە 22 التىن مەدال ەنشىلەگەن. سونداي-اق، وڭتۇستىك كورەيا قۇراماسى ىلگەرى وزىپ كەلەدى. ولاردىڭ قورجىنىندا 8 التىن مەدال بار. دەي تۇرعانمەن، بيىل قازاقستان قۇراماسى ءبىرشاما جەتىستىككە جەتىپ، بۇل كورسەتكىشتى باسىپ وزۋعا تولىقتاي مۇمكىندىكتەرى بار.

بيىلعى ازيا ويىندارىندا تاۋ شاڭعى سپورتى ەكى ديستسيپلينا بويىنشا وتەدى: الىپ سلالوم جانە سلالوم. قازاقستاندىقتار بۇل ديستسيپلينالاردا جوعارى ناتيجە كورسەتە الماسا دا، مەدالدار ءۇشىن كۇرەسە الاتىنى انىق.

Abai.kz