بيىلعى جىلى، شاماسى ناۋرىز ايىندا، بۋرابايدا ءوتۋى ءتيىس ۇلتتىق قۇرىلتايدىڭ (ۇق) قارساڭىندا جۇمىس سەكتسيالارىنىڭ كەزەكتى وتىرىسى ءوتتى. «تۇيەنىڭ تانيتىنى جاپىراق» - مەن «ازاماتتىق قوعام» سەكتسياسىنىڭ جۇمىسىنا قاتىسىپ، ءوزىمنىڭ بىرەر وي-پىكىرىمدى ورتاعا سالدىم.

وتىرىستار اراسىندا قر مەملەكەتتىك كەڭەسشىسى ەرلان كارين مىرزانىڭ قابىلداۋىندا بولىپ، بيلىك پەن ەلدەگى قوعام اراسىنداعى قاتىناستار جونىندە ءبىراز اڭگىمە-دۇكەن قۇردىق. ورتاق تۇجىرىمدار مەن پەرسپەكتيۆادا تالقىلاۋ تالابىنا سايكەس تاقىرىپتار ءسوز بولدى (كۇنىبۇرىن جاريا قىلۋ قۇرسوزدىلىك بولادى).

جالپى، قر پرەزيدەنتىنىڭ كومەكشىسى رۋسلان جەلدىباي جۇرگىزگەن «ازاماتتىق قوعام» سەكتسياسىنا قاتىسۋشى ۇق مۇشەلەرى (50-گە جۋىق ادام) ەل ىشىندەگى، ايماقتارداعى ءبىراز پروبلەمالىق تاقىرىپتى قوزعادى، رۋسلان مىرزا ءاربىر سويلەۋشىدەن كەيىن، قوزعالعان ماسەلەگە بايلانىستى اقوردانىڭ كوزقاراسىن بىلدىرەتىن ەدەل-جەدەل كوممەنتاري جاساپ وتىردى. جەكەلەگەن ماسەلەلەرگە قاتىستى بيلىك تاراپىنان جاسالعان ءىس-شارالار مەن جاسالۋى ءتيىس جوسپاردىڭ جورالعى نوبايىن ايتىپ بەردى.

مەن وسى وتىرىستاعى ءوز سوزىمدە قوعامدا ۋشىعىپ تۇرعان بىرەر تاقىرىپتى تىلگە تيەك ەتكەننەن كەيىن، بۋراباي قۇرىلتايىنىڭ تالقىسىنا تاتيتىن بىرەر تەزيستى ۇسىنۋدى ءجون كوردىم:

بىرىنشىدەن:

- تۇتاس ەلدى وزگەرىستەرگە باستايتىن «جاڭا قازاقستان» يدەياسىنىڭ كومەسكىلەنىپ بارا جاتقانى;

- سىرتقى جانە «ءۇشىنشى» كۇشتەر تاراپىنان پروتەستىك قاۋىمنىڭ «قولتىعىنا سۋ بۇركۋ» ارەكەتى ءورشىپ، جاڭا باستامالارعا قارسى قوعامدىق قارسىلىقتار تۋدىرۋ ءۇردىسىنىڭ اسقىنۋ تەندەنتسياسى;

- «ەسكى قازاقستان» مەن ونىڭ ساياسات تەحنولوگتارى بىرقاتار ينتەرنەت رەسۋرستار مەن تانىمال بلوگوسفەرانىڭ جەكەلەگەن كونتەنتىن «ساتىپ الۋ» ايلاسىمەن ونلاين قارسىلىق قوزعالىسىن ءورشىتۋ جانە سول ارقىلى «ەسكى قازاقستاننىڭ» سالىستىرمالى «ارتىقشىلىعىن» دارىپتەۋ ارەكەتىنىڭ پايدا بولۋى;

- «جاڭا قازاقستان» باستامالارىنا قارسى ءبىر ورتالىقتان باسقارىلاتىن «ۋاتساب» چاتتارىنىڭ اۋداندىق-اۋىلدىق دەڭگەيگە دەيىنگى ورمەكشىنىڭ تورىنداي قۇرىلعان ۇياشىقتارىندا (ياچەيكا) قوعامدىق تەڭسەلىس تۋدىرۋ كونتەنتىنىن قالىپتاسۋ قاۋپى;

- قوعامدى كۇش كورسەتۋشى ورگانداردىڭ وراشولاق ارەكەتىمەن ۇركىتۋدەن بۇرىن، جەرگىلىكتى جەردەگى قوعام بەلسەندىلەرىمەن مامىلەلى اڭگىمە، ديالوگتىق دوڭگەلەك ۇستەل پلاتفورمالارى ارقىلى كەلىسىم كەڭەسىن جۇرگىزۋدىڭ كەندەلىگى;

- مۇددەلى ماسەلەدە تاراپتاردىڭ مەملەكەتتىك، ۇلتىق، ەلدىك جاۋاپكەرشىلىگى مەن «قوعاممەن سويلەسۋدەگى» لاۋازىمگەر تۇلعالاردىڭ ازاماتتىق باتىلدىعىن قالىپتاستىرۋ قاجەتتىلىگى.

- الدەبىر مۇمكىن الەۋمەتتىك-تۇرمىستىق داعدارىس (جاڭاوزەن نەمەسە قاڭتار وقيعاسى سىڭارلاس) پايدا بولا قالعان جاعدايدا، قوعامدىق كاتاكليزمدى ەلدىك مۇددە تۇرعىسىندا باسقارۋ قابىلەتى بار، پروتەستىك قوعامدى كونسترۋكتيۆتى مامىلەگە جۇمىلدىرىپ، كەلىسىم ۇستەلىنە وتىرا الاتىن تاۋەلسىز ازاماتتىق كۇشتەردىڭ قالىپتاسۋىنا بيلىكتىڭ كۇنىبۇرىنعى جاۋاپكەرشىلىگى;

ەكىنشىدەن:

- پارلامەنتتىڭ ءبىر توپ دەپۋتاتى باستاماشىلىق جاساعان «ءدىن ىستەرى تۋرالى» زاڭعا وزگەرىستەر مەن تولىقتىرۋلار ەنگىزۋ جونىندەگى زاڭ جوباسىنا مەملەكەتتىك ورگاندار تاراپىنان تارتىنشاقتىق جاسالۋىنىڭ تۇسىنىكسىز سيپاتى;

- زاڭ جوباسىن تالقىلاۋ بارىسىندا قوعامدىق ارتىس-تارتىس ۋشىعادى دەگەن شامادان ارتىق ساقتىق سالدارىنان تۋىندايتىن يلليۋزيانىڭ مەملەكەت پەن ۇلت بولاشاعى تۇتاستىعىنا قاتەر ءتوندىرۋى قاۋپى;

يسلامىشىلىك تالاس-تارتىستىڭ ونىسىز دا اسقىنۋ ءۇردىسىنىڭ:

1. ينتەرنەت پلاتفورمالاردا;

2. الەۋمەتتىك جەلىلەردە;

3. مەشىتتەردىڭ توڭىرەگىندەگى تولاسسىزدىعى;

«تەرىس اعىم» يدەيالارى:

1. جەكەلەگەن الەۋمەتتىك ورتالاردى;

2. بىرقاتار ازىق-تۇلىك ساۋدا بازارلارىن; -اۆتوبولشەكتەر مەن تەلەفون گادجەتتەرىن ساتۋ جانە قىزمەت كورسەتۋ ورتالىقتارىن;

3. ءىرى مەگاپوليستەردەگى سپورت مەكتەپتەرىن بارعان سايىن «جاۋلاپ الۋ» قاۋپى.

- قازاقستانداعى مىڭجىلدىق ءداستۇرلى يسلام ءدىنىن ىعىستىرۋدىڭ سىرتتان سىڭىرىلگەن يدەياسى تۇتاسقان ءدىني يدەولوگياعا اينالىپ كەتۋ قاتەرى سالدارىنان مەملەكەتتىك جانە ۇلتتىق تۇتاستىققا تونگەن قاۋىپتىڭ الدىن الۋ.

ۇشىنشىدەن:

- قازاقستان قارۋلى كۇشتەرىنە، ەلدىڭ قورعانىس قابىلەتىنە قارسى جانە اسكەري قىزمەتكە دەگەن قىزىعۋشىلىقتى السىرەتۋ ماقساتىنداعى «ءۇشىنشى» كۇشتەردىڭ ارەكەتى;

- قازاقستاندىق ءپاتريوتيزمدى تۇنشىقتىرۋ ارقىلى اسكەري ادامنىڭ بەدەلىن ءتۇسىرۋ، ارميانىڭ ابىرويىن مانسۇق ەتۋ;

- تەڭسەلىپ تۇرعان گەوساياسي الەمدە قازاقستاننىڭ قورعانىس قاۋىپسىزدىگىن قامتاماسىز ەتۋ ماقساتىندا مۇددەلى مەملەكەتتىك ورگانداردىڭ، دەپۋتاتتاردىڭ، قوعام وكىلدەرىنىڭ، جوعارعى مەكتەپتىڭ، ارداگەرلىك ۇيىمداردىڭ قاتىسۋىمەن رەسپۋبليكالىق پاتريوتتىق قوزعالىس جيىنىن وتكىزۋدىڭ كەزەك كۇتتىرمەس قاجەتتىلىگى.

ارينە، ءبىر دەپۋتاتتىڭ بۇل تەزيستەرى كەلەشەك قۇرىلتايدىڭ جالپىعا ورتاق كۇن تارتىنە ەنۋ-ەنبەۋى ەكىتالاي ماسەلە. قالاي بولعاندا دا، بۇل تاقىرىپتار بيلىك پەن قوعامنىڭ «قۇلاعىنا التىن سىرعا» رەتىندە ايتىلىپ ءجۇرۋى ءتيىس دەپ سانايمىن. «ەڭ الدىمەن ءسوز پايدا بولعان» دەگەن تامسىلگە ءتانتى بولساق، سوزدەن كەيىن ءىستىڭ پايدا بولارى ءسوزسىز.

ەرمۇرات باپي، 

قر ءماجىلىسىنىڭ دەپۋتاتى

Abai.kz