فەدەرالدىق مەملەكەتتىك ستاتيستيكا قىزمەتىنىڭ ورىنبور وبلىسى بويىنشا اۋماقتىق ورگانىنىڭ حابارلاۋىنشا، ورىنبور وبلىسىندا بالا تۋ تومەندەپ، ءولىم-ءجىتىم كەرىسىنشە، كۇرت وسكەن.

سالدارىنان وسى ەكى كورسەتكىش اراسىنداعى ايىرما، ياعني، ورىنبورلىقتاردىڭ تابيعي شىعىنى "مينۋس 9 مىڭ ادامنان" اسقان.

"ورىنبور وبلىسى حالقىنىڭ تابيعي كەمۋى 2024-جىلعى 10 ايدا 9 040 ادامعا جەتتى. ولكەدە تۋ قۇلدىرادى، ءولىم-ءجىتىم ۇلعايدى. مەملەكەتتىك ستاتقىزمەتتىڭ اۋماقتىق ورگانىنىڭ دەرەگىنشە، ءبىزدىڭ وڭىردە 2024 جىلعى قاڭتار-قازاندا 13 002 بوبەك قانا دۇنيە ەسىگىن اشقان. بۇل ءتىپتى كەزەكتى رەكوردتىق قۇلدىراۋ تىركەلگەن 2023 جىلعى ۇقساس كەزەڭدەگىدەن 479 سابيگە از. ءبىر جىل ىشىندە تاعى -3,7% كەمىدى", – دەپ جازدى جەرگىلىكتى تانىمال "ۋرال56.رۋ" پورتالى.

فەدەرالدىق مەملەكەتتىك ستاتيستيكا قىزمەتىنىڭ ورىنبور وبلىسى بويىنشا اۋماقتىق ورگانىنىڭ دەرەگىنشە، ورىنبور وبلىسىندا بالا تۋدىڭ قۇلدىراۋى 2016-جىلدان بەرى توقتاۋسىز جۇرۋدە.

"تۋعان بالالار سانىنىڭ ولگەن تۇرعىندار سانىنان اسىپ ءتۇسۋى سوڭعى رەت 2015 جىلى تىركەلگەن. سوندا ورىنبور ولكەسىندە 21 738 بالا ومىرگە كەلدى، 21 560 ورىنبورلىق دۇنيە سالدى. سالىستىرساق، 2019 جىلعى قاڭتار-قازان ايلارىندا وڭىردە 16 577 بالا تۋىلدى. بۇل الدىڭعى 2018 جىلعىدان 1 910 بالاعا از. سول جىلعى قاڭتار-قازاندا 21 631 ادام ومىردەن ءوتتى. وسىلايشا، 2019 جىلعى 10 ايدا ورىنبور وبلىسىندا حالىقتىڭ تابيعي كەمۋى 5 054 ادامدى قۇراعان ەدى. بۇل 2018 جىلعى كورسەتكىشتەن (3 793 ادام) الدەقايدا كوپ", – دەپ مالىمدەدى ۆەدومستۆو.

ءبىر عاسىر بۇرىن، 1919-جىلى 10-شىلدەدەن 1925-جىلعى 16-شىلدەگە دەيىن ورىنبوردىڭ قازاقستاننىڭ استاناسى بولعانى تاريحتان بەلگىلى. ورىنبور الدىمەن 1919-جىلى قىرعىز (قازاق) ولكەسىنىڭ باس قالاسى بولدى. 1920-جىلى 26-تامىزدا سونىڭ نەگىزىندە قازاق اكسر-ءى (قازاقستان رەسپۋبليكاسى) قۇرىلدى، ونىڭ استاناسى 1925-جىلدىڭ سوڭىنا دەيىن ورىنبور بولدى.

قازىرگى كەزدە ورىنبور وبلىسىندا 1 828 692 ادام عانا قالعان. سالىستىرساق، 2001-جىلى وبلىس تۇرعىندارىنىڭ سانى 2 203 616 بولدى. شيرەك عاسىر ىشىندە ۇزدىكسىز ازايىپ بارادى.

Abai.kz