شۆەيتساريا وزبەكستانعا گۇدلنارا كاريموۆانىڭ 182 ملن دوللار اكتيۆىن قايتارۋعا كەلىستى. گۇلنارا – وزبەكستاننىڭ ءبىرىنشى پرەزيدەنتى يسلام كاريموۆتىڭ ۇلكەن قىزى. اكتيۆتى قايتارۋ كەلىسىمى جونىندە 6 اقپاندا وزبەكستان ادىلەت مينيسترلىگى حابارلادى. قۇجاتقا وزبەكستاننىڭ ادىلەت ءمينيسترى اكبار توشكۋلوۆ پەن شۆەيتساريانىڭ تاشكەنتتەگى ەلشىسى كونستانتين وبولەنسكي قول قويعان.

وزبەكستان ادىلەت مينيسترلىگىنىڭ حابارلاۋىنشا، قايتارىلاتىن قارجىنى "وزبەكستاننىڭ جەكەلەگەن ازاماتتارى زاڭسىز يەلەنگەن جانە 2012 جىلى شۆەيتساريانىڭ باس پروكۋراتۋراسى گۇلنارا كاريموۆانىڭ ۇستىنەن قوزعاعان قىلمىستىق ءىس اياسىندا تولىق تاركىلەنگەن".

بۇل قارجى تاشكەنتكە Uzbekistan Vision 2030 دەگەن قور ارقىلى بەرىلمەكشى. وزبەكستان ادىلەت مينيسترلىگى قايتارىلاتىن اقشا ەلدەگى الەۋمەتتىك ماڭىزى بار جوبالارعا جۇمسالادى دەپ وتىر.

2022 جىلعى 16 تامىزدا وسى قور ارقىلى شۆەيتساريادا تاركىلەنگەن زاڭسىز الىنعان اكتيۆتەردى وزبەكستانعا قايتارۋ تۋرالى كەلىسىمگە قول قويىلدى. باستاپقى كەلىسىم وزبەكستانعا 131 ميلليون دوللار قايتارۋدى كوزدەيدى. مينيسترلىكتىڭ حابارلاۋىنشا، ەكىنشى كەلىسىم ارقىلى وزبەكستانعا قايتارىلعان قارجىنىڭ جالپى سوماسى 313 ميلليون دوللارعا جەتپەك.

Abai.kz