پۋتين رەسمي تۇردە ءازەربايجان ۇشاعى ءۇشىن كەشىرىم سۇراۋدان باس تارتىپتى. بۇل جونىندە ءازەربايجان باق-تارىندا ايتىلعانىنداي، رف وسى ۇشاق اپاتى ءۇشىن جاۋاپكەرشىلىكتى ءوز موينىنا الۋى كەرەك دەگەن ۇسىنىسقا جاۋاپ رەتىندە ءپۋتيننىڭ پرەسس-حاتشىسى پەسكوۆ مالىمدەگەن.

ءسويتىپ تەپ-تەگىس جەردەن رف وزىنە ءبىرشاما دوس مەملەكەتپەن اراقاتىناسىن ءۇزدى. ارعى تۇبىندە مەنسىنبەۋشىلىك، يمپەرلىك پيعىل جاتىر. تەك... كۇش كورسەتۋگە شامالارى كەلمەي تۇر، ايتپەسە سوعىس سالۋعا دا دۇزدەرى جانبايدى، ۋكراينا ولاردىڭ ابدەن سىلىكپەسىن شىعاردى.

بۇل ءبىزدى ءتىپتى قيىن جاعدايعا قالدىردى. نە ىستەۋگە بولادى؟ نە دە بولسا كولىك ءمينيسترى بار شىندىقتى ايتىپ سالۋى كەرەك. ارينە، قۇرباندىققا شالامىز، باسقا امال جوق. ەكى قولعا ءبىر جۇمىس تابىلار. ەسەسىنە ازەربايجان حالقىمەن دوس قالپىمىزدا قالامىز.

وسىعان بايلانىستى تاعى ءبىر وي ايتقىم كەلىپ وتىرعانى. ۇشاقتىڭ تۋرا ماڭعىستاۋ جەرىنە قۇلاعانى قازاق ەلىنە ۇلكەن ابىروي اپەرگەنى شىندىق. ەگەر قازاقستاننىڭ باسقا جەرىنە قۇلاسا نە بولار ەدى؟ «تيكتوكتا» قاليلا دەگەن كينورەجيسسەردىڭ ءارى وپەراتوردىڭ ۆيدەولارىن كورىپ جۇرگەن بولارسىزدار. سوندا ول وتكەن كوكتەمدەگى سۋ تاسقىنى كەزىندە ماڭعىستاۋلىق تاكسيلەردىڭ ادامداردى تەگىن تاسىعانى، ماڭعىستاۋلىقتاردىڭ ولارعا كومەكتى ءۇيىپ-توككەنى تۋرالى ايتىپ كوزىنە جاس الادى. الماتىداعى جەر سىلكىنىسى كەزىندە تاكسيستەردىڭ باعانى كۇرت كوتەرگەندەرىمەن، نەمەسە دالادا قالعان شوپىرلارعا وڭتۇستىك ءوڭىردىڭ ءبىر ەلدى مەكەنىنىڭ حالقى ءبىر بولكە ناندى مىڭ تەڭگەدەن، ءبىر بوتەلكە سۋدى بىرنەشە ەسە باعاعا كوتەرىپ ساتقانىمەن سالىستىرادى. ماڭعىستاۋلىقتاردا ادامگەرشىلىك قاعيداسى ءالى جويىلماعانىنا ريزاشىلىعىن جاسىرمايدى. ونىسىنا راحمەت! ايتا كەتۋ كەرەك - قاليلا ءبىزدىڭ جەرلەسىمىز ەمەس، سول وڭتۇستىكتىڭ ادامى بولۋى كەرەك.

ءبىزدىڭ سول باۋىرمالشىلىعىمىزدىڭ پايداسى بۇكىل قازاق ەلىنە ءتيىپ جاتىر دەپ ايتا الامىن. بۇعان ەشكىم دە رەنجىمەسىن، مەن بىرەۋدىڭ نامىسىنا تيەيىن دەپ، نەمەسە باسقا بوتەن ويمەن جازىپ وتىرعانىم جوق. ابىروي بارىمىزگە ورتاق، ءبارىمىز ءبىر اتانىڭ بالاسىمىز، تەك مەنتاليتەتىمىزدە ازداپ ايىرماشىلىقتار بولۋى مۇمكىن، بىراق بۇل تاربيەمەن تۇزەلىپ كەتەتىن نارسەلەر دەپ ويلايمىن.

ەندى قانداي پايدا دەگەنگە جاۋاپ بەرەيىن: جاقىندا بىرەۋلەر باكۋدە اقتاۋعا ۇشايىن دەپ تۇرادى، قول جۇكتەرى 5كگ اسىپ كەتەدى، سول كەزدە الگى اۋەجاي قىزمەتكەرلەرى كىمسىڭدەر دەيدى عوي. بۇلار قازاقتارمىز، اقتاۋعا ۇشقالى تۇرمىز دەيدى. سوندا الگىلەر: ووو اقتاۋ! قازاقتار! دەپ قۋانا ءبىر-بىرىنە قاراپ بۇلاردىڭ جۇكتەرىنە قولدارىن ءبىر سىلتەپ، وتە بەرىڭدەر دەيدى. مىنە، ءسال نارسە بولسا دا دوستىق دەگەن وسىندايدان باستالادى. ال تيكتوكتا قازاق ەلىنىڭ جالاۋىن كوتەرىپ، قانشاما جىلى سوزدەر ايتىلىپ جاتىر! ءتىپتى «نافتالان» ءساناتوريىنىڭ باسشىسى سويلەپ، بىزگە كەلىپ دەمالىپ كەتىڭدەر، قازاقتار ءۇشىن ۇلكەن سكيدكا جاسايمىز دەپ جاتىر، وسىنىڭ ءوزى ابىروي ەمەس پە؟ بۇرىن قازاقستاندى ءجۇردىم-باردىم تانيتىندار، ال اقتاۋ دەگەن قالا بارىن ءبىرىنشى رەت ەستىپ تۇرعاندارعا ءازىربايجاندا ءبىراز تانىمال بولىپ قالعانىمىز راس. بۇعان باسشىلىقتىڭ قاتىسى قانشالىقتى ەكەنىن بىلمەيمىن، بىراق حالىقتىق ديپلوماتيا دەگەنىمىز مەنىڭشە وسى!

ەندى وسى سوزدەردەن كەيىن ءبىز وسى نازىك سەزىمدەرىمىزدى ءۇزىپ الماساق دەپ ۋايىمدايمىن. ورىستان سەسكەنىپ باسشىلارىمىز وسىناۋ ىستە وتىرىك ايتاتىن بولسا وندا ءبارى بوس ءسوز بولعانى. «دوس كوڭىلى ءبىر اتىم ناسىبايدان قالادى» دەمەكشى، ءازىربايجاندار ءبىر تەرىس قاراپ كەتسە وزىڭە قايتا قاراتۋ مۇمكىن بولماي قالۋى مۇمكىن. تەرىستىكتەگى جاۋىز كورشى ءبىزدى تۋىس حالىقتان ايىرماسا دەگەن تىلەك قوي...

قۋانىش ەدىلحانتەگى

Abai.kz