يلون ماسكتىڭ شابۋىلىنان كەيىن الەمدەگى ازاتتىق راديولارىن باسقاراتىن جانە قارجىلاندىراتىن اقش-تىڭ USAGM جاھاندىق مەديا اگەنتتىگى راديولار جەلىسىن وپتيميزاتسيالاۋ تۋرالى جوسپارىن دايىنداي باستادى. ال كەلەسى اپتادا وسى اگەنتتىك پەن يلون ماسك باسقاراتىن تيىمدىلىكتى ارتتىرۋ ءۇشىن اشىلعان DOGE دەپارتامەنتى اراسىندا كەلىسسوزدەر وتپەك.

"ورتالىق-شىعىس ەۋروپاداعى، مىسالى رۋمىنيا، بولگاريا، ۆەنگريا، سولتۇستىك ماكەدونياداعى ازاتتىق راديولارى تولىق جابىلادى. ولار ءوز ميسسياسىن 20 جىل بۇرىن ورىنداپ تاستاعان. USAGM باسقارۋشى كوميسسياسى وسىنداي كۋلۋارلى شەشىمگە كەلدى. ەندى پروتوكولمەن بەكىتەدى", - دەيدى، اق ۇيگە جاقىن DALA INSIDE دەرەككوزى

قالعان راديولار بويىنشا ا جانە ب ستسەناريلەرى دايىندالدى.

"ا" ستسەناريىندە ورتالىق-شىعىس ەۋروپا جابىلادى، ال قالعان ەلدەردەگى رەداكتسيالاردا 50 پايىز قىسقارتۋ بولادى. ورتالىق اپپاراتتا 40% پايىز قىسقارتۋ جۇرەدى. جىلىنا 1 ميلليارد دوللاردان شامامەن جارتىسى ۇنەمدەلۋى ءتيىس.

"ب" ستسەناريىندە يران مەن رەسەيدەن باسقا بارلىق تاۋەلسىز مەملەكەتتەردەگى ازاتتىق رەداكتسيالارىن جابۋ كوزدەلگەن. ولار مولدوۆا، رۋمىنيا، بولگاريا، ۆەنگريا، سولتۇستىك ماكەدونيا، كوسوۆو، بوسنيا گەرتسوگوۆينا، ۋكراينا، بەلارۋس، قازاقستان، وزبەكستان، قىرعىزستان، تاجىكستان، ءازىربايجان، ارمەنيا، ءازىربايجان، گرۋزيا. جاباردىڭ الدىندا ەلشىلىكتەر ارقىلى وسى ەل ۇكىمەتتەرىنە "سەندەرگە ازاتتىق راديوسى كەرەك پە؟" دەگەن سۇراق قويىلاتىن بولادى. "كەرەك ەمەس" دەگەن ەلدەردەگى رەداكتسيا جابىلماق. سوندا ازاتتىق راديولارى رەسەي مەن يرانعا قىسىم رىچاگى رەتىندە، جانە كاۆكاز، قىرىم، تاتارستان، ءسىبىر سىندى بودان ايماقتاردا جۇمىسىن جالعاستىرۋى ءتيىس.

ورتالىق اپپارات 70 پايىزعا قىسقارادى. بۇل جىلىنا بولىنەتىن 1 ميلليارد دوللاردىڭ 700 ميلليونىن ۇنەمدەمەك.

كەلەسى اپتادا جابىق كەلىسسوزدەر مەملەكەتتىك حاتشى ماركو رۋبيو، كونگرەس وكىلدەرى، DOGE جانە USAGM اراسىندا وتەتىن بولادى. DOGE باسشىسى يلون ماسك كەشە «ازاتتىق» پەن «امەريكا داۋىسى» راديولارىن جابۋعا شاقىرىپ، ول تۋرالى ءوزىنىڭ ح الەۋمەتتىك جەلىسىندە جازعان بولاتىن. ماسك ولاردى «راديكالدى سولشىل ەسالاڭدار» دەپ اتاپ، سالىق تولەۋشىلەردىڭ قاراجاتىن ىسىراپ ەتىپ كەلەدى دەپ ايىپتادى.

«ولار وزىمەن-وزدەرى سويلەسىپ وتىرعان، امەريكاندىق سالىق تولەۋشىلەردىڭ اقشاسىنان جىلىنا 1 ميلليارد دوللار جاعىپ وتىرعان راديكالدى سولشىل ەسسىزدەر عانا. جابۋ كەرەك. ولاردى ەندى ەشكىم تىڭدامايدى»، - دەپ جازىلعان يلون ماسكتىڭ پوستىندا.

الەم بويىنشا ازاتتىق راديوسىنىڭ رەداكتسيالارى يلون ماسكتىڭ بۇل مالىمدەمەسىنە رەاكتسيا بەرمەدى.

Abai.kz