قازاق اۋدارماسىنىڭ جاڭا كوكجيەگىنىڭ باعى قىرعىز، وزبەك اۋدارماسىمەن تىزە قوسقاندا عانا اشىلادى!

ءاى زامانىندا ءبىر ادامنىڭ عانا اۋدارما جاساۋى مۇمكىن بولماي قالدى. مىسالى بۇۇ ۇيىمىنىڭ رەسمي 6 ءتىلى بار دەسەك، وسىنىڭ ىشىندە يسپان، ورىس، قىتاي، اراب جانە فرانتسۋز تىلدەرى اعىلشىن تىلىندەگى تولاسسىز ەنگەن تەرمىندەر مەن تۇسىنىكتەردىڭ شاڭىنا كومىلىپ قالسا، ءبىزدىڭ ورىس ءتىلىنىڭ قۇشاعىندا تۇنشىققان ءتىلىمىز نە كۇيدە!؟

ءيا، قازاق اۋدارما دەسە، كوركەم ادەبيەت دەپ ۇعادى. بۇل گۋمانيتارلىق باعىتتاعى اۋدارما ءتۇرىنىڭ ءبىر بولشەگى عانا ەكەنىن ۇعىنبايدى.

بۇرىن الەمدى ورىسشا وقىپ، ورىسشا ۇعىنعان ورتالىق ازيا ەلدەرىنىڭ عىلىمي ءتىلى شىققان جوق. عىلىمي، كاسىبي ءھام ساياسي-قوعامدىق اۋدارما سالاسى بەتىمەن كەتتى. بەتىمەن كەتتى دەگەنىمىز نارىققا بەيىمدەلمەي، بيلىكتىڭ بەرگەن اقشاسىن ات توبەلىندەي توپتىڭ اۋدارما سالاسى بويىنشا يگەرۋى بىلايعى جۇرتتىڭ توبە شاشىن تىك تۇرعىزاتىن اۋدارمالاردى وزبەككە، قىرعىزعا ءھام قازاققا سىيلاپ ۇلگەردى.

بۇنىڭ سەبەبى ورتالىق ازيا ەلدەرىندە جازۋشىلار وداعى سياقتى دەربەس اۋدارماشىلار وداعىنىڭ جوقتىعىنان دەپ بىلگەنىمىز ءجون. كەز كەلگەن عىلىمي ءھام كاسىبي اۋدارما جاسالماس بۇرىن اۋدارىلاتىن كىتاپتا ۇشىراساتىن تەرمىندەردىڭ تىزبەسى جاسالىپ، ولاردى ۇلت تىلىنە بەيىمدەۋ دايىنداعى بەلگىلى ءبىر ورتادا تالقىعا سالىنىپ، مامانداردىڭ پىكىرلەرى نازارعا الىنادى. مىنە، سودان كەيىن بارىپ قانا العاشقى «قارا اۋدارما» جاسالىنىپ، ول ءتيىستى مامان رەداكتورلاردىڭ «اق اۋدارماسى» ءۇشىن بەلگىلى ءبىر كاسىبي نە عىلىمي ورتانىڭ ۇستىنەن جونگە كەلتىرىپ قاراپ شىعۋىنا بەرىلەدى.

ال، قازاق، قىرعىز جانە وزبەكتە ءبارى كەرىسىنشە، اۋدارعان ادام اتىن باتپيتىپ قويىپ، ۇلكەن ءبىر دۇنيە بىتىرگەندەي نە قازاق، نە وزبەك، نە قىرعىز ۇقپايتىن قويىرتپاقتى جوو مەن ورتا ءبىلىم سالاسى ءۇشىن  تابىستاي سالادى دا، ءىشىڭ ءبىلىسن ءالۋايلاتىپ قاراپ قانا وتىرادى.

ءتىپتى Google اۋدارمامەن كوسىلتە سالاتىن قاسقالار دا بيلىك بولگەن اقشانىڭ قىزعىن تەر توكپەي قالتاعا باسۋعا كىرىستى.

بۇل كەلەڭسىزدىكتەن شىعۋدىڭ ءبىر عانا جولى بار – اۋدارماشىلار مەن رەداكتورلار القاسىنان تۇراتىن ترانسۇلتتىق (قازاق، وزبەك جانە قىرعىزعا ورتاق) اۋدارماشىلار وداعىن قۇرۋ. ءتىلى جاقىن ءۇش ۇلتتىڭ تەرمىنگە قاتىستى ءبىرىن-ءبىرى وقي الماۋى بولاشاقتا ۇلكەن تىلدىك الشاقتاۋعا ۇرىندىرادى.

ءابىل-سەرىك الىاكبار

Abai.kz