رەزەرۆتەگى اسكەري قىزمەت: قازاقستاندا جۇمىلدىرۋ جۇيەسى قالاي وزگەرەدى؟

2025 جىلدان باستاپ قازاقستاندا اسكەري قىزمەتتىڭ جاڭا ءتۇرى – رەزەرۆتەگى اسكەري قىزمەت پايدا بولادى.

سەناتتا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە رەزەرۆتەگى اسكەري قىزمەت جانە جەكەلەگەن ورتالىق مەملەكەتتىك ورگانداردىڭ فۋنكتسيالارىن قايتا ءبولۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ ماقۇلداندى. بۇل دەگەنىمىز اسكەري مىندەتتىلەردى اۋماقتىق قاعيدات بويىنشا ەرىكتى تۇردە دايارلاۋ. جاڭا جۇيە ارميا سانىن كوبەيتپەي، ەلدىڭ جۇمىلدىرۋ دايىندىعىن كۇشەيتۋگە مۇمكىندىك بەرەدى.

ءبىرىنشى كەزەڭدە 2 مىڭعا جۋىق رەزەرۆتەگىلەردى شاقىرۋ جوسپارلانىپ وتىر. باعدارلامانى ىسكە اسىرۋ ءۇشىن زاڭناماعا وزگەرىستەر ەنگىزۋ قاجەت، اتاپ ايتساق:

– ەڭبەك كودەكسى – رەزەرۆتەگى ادام مەن ولاردىڭ جۇمىس بەرۋشىلەرىنىڭ قۇقىقتارىن رەتتەيدى.

– «اسكەري قىزمەت جانە اسكەري قىزمەتشىلەردىڭ مارتەبەسى تۋرالى» زاڭعا رەزەرۆتىك قىزمەت تۋرالى جەكە تاراۋ ەنگىزىلەدى.

رەزەرۆتەگى قىزمەت قالاي وتەدى؟

قىزمەت كەلىسىمشارتقا نەگىزدەلگەن جانە نەگىزگى جۇمىسپەن بىرىكتىرىلەدى. رەزەرۆتەگى ادامدار جاقىن ماڭداعى اسكەري بولىمدەردە اسكەري دايىندىقتان وتەدى.

باعدارلامادا قاراستىرىلادى:

– 2 ايدان اسپايتىن جىلدىق جيىندار.

– 30 كۇندىك وقۋ-جاتتىعۋ جيىنى.

– قىسقا ايلىق ساباقتار (2-3 كۇن).

رەزەرۆكە كىمدەردى الادى؟

ىرىكتەۋ قاعيدالارى كەلىسىمشارت قىزمەتىنە ۇقساس. نەگىزگى تالاپ – اسكەري دايىندىق.

جاس شەكتەۋلەرى:

– وفيتسەرلەر – 60 جاسقا دەيىن.

– سەرجانتتار مەن ساربازدار — 50 جاسقا دەيىن.

ايەلدەر دە جالپى نەگىزدە رەزەرۆتەگى قىزمەتكە كىرە الادى.

جالاقى قانداي؟

رەزەرۆتەگى ادامدار جۇمىسىن جوعالتپايدى، ولاردىڭ ورنى ساقتالادى. تولەماقىلارى جۇمىسپەن قامتىلۋىنا بايلانىستى:

– جۇمىسى بار رەزەرۆتەگى ادامدار نەگىزگى جۇمىس ورنى بويىنشا ورتاشا جالاقىعا بارابار جالاقى الادى.

– جۇمىسسىزداردىڭ ەڭ تومەنگى جالاقىسى 85 مىڭ تەڭگە بولادى.

رەزەرۆتەگى ادامداردىڭ الەۋمەتتىك پاكەتى قانداي؟

ولار تەگىن مەديتسينالىق قىزمەتپەن، تاماقپەن قامتاماسىز ەتىلەدى، اسكەري اتاعىن كوتەرۋ مۇمكىندىگى، قىزمەت ەتۋ ۋاقىتى ءۇشىن اقشالاي تولەمدەر دە بار، ەڭبەك وتىلىندە رەزەرۆتەگى قىزمەتى دە ەسەپكە الىنادى، جاراقات العان جاعدايدا وتەماقى بەرىلەدى.

قازاقستانعا رەزەرۆتىك ارميا نە ءۇشىن قاجەت؟

رەفورمانىڭ باستى ماقساتى – ارميا سانىنىن ارتتىرماي،   شىعىنداردى ەداۋىر كوبەيتپەي، ەلدىڭ جاۋىنگەرلىك دايىندىعىن نىعايتۋ. بۇل تاجىريبەنى الەمنىڭ الدىڭعى قاتارلى ەلدەرىنىڭ اسكەرلەرى قولدانادى.

رەزەرۆتەگى ادامدار – بۇل اسكەري دايىندىقتان وتكەن جانە قاجەت بولعان جاعدايدا ارميانى كۇشەيتۋگە ءازىر ازاماتتار. مۇنداي جۇيەنى مىنانداي مۇمكىندىكتەرى بار:

– ەلدىڭ قاۋىپسىزدىگىن ارتتىرۋ. داعدارىس جاعدايىندا ارميا ەشقانداي دايىندىعى جوق اسكەرگە شاقىرىلۋشىلارعا ەمەس، دايىندالعان جاۋىنگەرلەرمەن تولىعادى.

– ماشىقتارىن ارتتىرادى. رەزەرۆتەگى ادامدار تۇراقتى جاتتىعۋلاردان وتەدى، تاكتيكالىق جانە ستراتەگيالىق دايىندىقتان وتەدى، زاماناۋي قارۋ-جاراقتى قولدانۋدى ۇيرەنەدى.

– جاڭا مانساپتىق مۇمكىندىكتەر جاسايدى. رەزەرۆتەگى قىزمەت تاجىريبەسى كۇش قۇرىلىمدارى مەن مەملەكەتتىك قىزمەتتە باعالانادى.

– قوسىمشا تولەمدەر مەن جەڭىلدىكتەر بەرىلەدى.

وسىلايشا، جاڭا جۇيە قازاقستانعا جۇمىلدىرۋ رەسۋرستارىن ءتيىمدى باسقارۋعا جانە ارميا ءۇشىن كادر رەزەرۆىن دايىنداۋعا مۇمكىندىك بەرەدى.

Abai.kz