ەردوعان اقش-تى تۇركيانىڭ قورعانىس ونەركاسىبىنە ەنگىزىلگەن سانكتسيالاردى الىپ تاستاۋعا شاقىردى.

سونىمەن قاتار، ەردوعان اسكەري جويعىش ۇشاقتاردى ازىرلەيتىن ءارى وندىرەتىن F-35 باعدارلاماسىنا قايتا قوسىلعىسى كەلەتىنىن مالىمدەگەن.

ەسكە سالايىق، بۇل سانكتسيالار 2019 جىلى تۇركيانىڭ رەسەيلىك س-400 اۋە قورعانىس جۇيەلەرىن ساتىپ الۋىنا بايلانىستى ەنگىزىلگەن ەدى. سونىڭ سالدارىنان تۇركيا F-35 جويعىش ۇشاق باعدارلاماسىنان شىعارىلدى.

ەردوعان اقش پرەزيدەنتى دونالد ترامپپەن تەلەفون ارقىلى سويلەسۋ بارىسىندا ۆاشينگتوننىڭ تۇركيا جايىندا، ياعني ەلدىڭ ۇلتتىق قاۋىپسىزدىك مۇددەلەرىن ەسكەرەتىن جاڭا كوزقاراس قالىپتاستىراتىنىنا ءۇمىتىن ءبىلدىردى.

وسىلايشا، رەجەپ تايىپ ەردوعان اقش-تى قورعانىس سالاسىنداعى كەيبىر ساتىپ الۋلارعا كەدەرگى كەلتىرەتىن سانكتسيالاردى الىپ تاستاۋعا شاقىرىپ وتىر.

ەردوعان تۇركيانىڭ F-16 ۇشاقتارىن جاڭارتۋ جوباسى ارقىلى جاڭا بەتبۇرىس جاساعانىن ايتىپ، وسى سالاداعى ەكسپورتتىق شەكتەۋلەردىڭ الىنىپ تاستالۋىن كۇتەتىنىن جەتكىزدى.

Abai.kz