مۇناي ءوندىرۋشى وپەك+ ەلدەرى مۇناي شىعارۋدى ارتتىرماق. دونالد ترامپتىڭ ساۋدا سوعىسى دا قىزا ءتۇستى. ساراپشىلار الداعى ۋاقىتتا الەمدىك ساۋدا دەڭگەيى ءبىرشاما باسەڭدەپ، مۇناي باعاسىنىڭ تۇسەتىنىن ايتۋدا. بولجام بويىنشا رەسەيدىڭ مۇنايى باررەلىنە 50 دوللاردان تومەنگە ءتۇسۋى ىقتيمال. بۇل تۋرالى Mezgil.kz اقپاراتتىق پورتالى جازدى. 

ەڭ نەگاتيۆتى بولجامدى Citigroup جانە ايگىلى JPMorgan Chase ينۆەستبانك جوبالارى بەرۋدە. اتالعان كومپانيالار Brent سۇرىپتى مۇنايدىڭ باعاسى باررەلىنە 60-65 دوللارعا ءتۇسۋى مۇمكىن دەپ بولجام جاساۋدا. بۇل تۋرالى Bloomberg باسىلىمى جازدى. ال Citigroup ساراپشىلارى 2025 جىلدىڭ II جانە III ماۋسىمىندا Brent باعاسى 60 دوللار بولاتىنىن ايتتا، ال IV ماۋسىمدا باعا 55 دوللارعا دەيىن قۇلدىراۋى ىقتيمال.

مۇناي سالاسىنداعى ترەيدەرلىك كومپانيالار دا مۇناي باعاسىنىڭ قۇلدىراۋىن كۇتۋدە. اقش باسشىسى دونالد ترامپ سايلاۋالدى ناۋقاندا جانە پرەزيدەنتتىك قىزمەتىنە كىرىسكەن ساتتە، اقش اۋماعىنداعى مۇنايدى بۇرعىلاۋعا رۇقسات ەتەتىنىن ايتتى. «بۇل الداعى تاڭدا ءسوزسىز مۇناي باعاسىنا اسەر ەتەدى» دەيدى ماماندار.

وپەك+ ەلدەرى ءساۋىر ايىنان باستاپ مۇناي بۇرعىلاۋدى بىرتىندەپ ارتتىرۋدى كەلىستى. بۇل شەشىمدى ۇيىم 2024 جىلدىڭ قىركۇيەك ايىنان باستاپ شەگەرىپ كەلگەن بولاتىن. الايدا ەندىگى تاڭدا مۇناي ءوندىرىسىن ارتتىرۋ شەشىمى قابىلدانىپ وتىر.

ۇنەمى مۇناي باعاسىنا جوعارى بولجام جاسايتىن Goldman Sachs ينۆەستبانكى دۇيسەنبىدە مۇنايدىڭ بولجامدى باعاسىن 70-85 دوللاردان 65-80 دوللارعا دەيىن ءتۇسىردى. وسىلايشا 5 دوللارعا كەم بولجام جاسادى. Morgan Stanley جانە Bank of America جىلدىڭ ەكىنشى جارتىسىندا Brent باعاسى 65-70 دوللار اراسىندا بولادى دەگەن بولجامعا توقتاۋدا.

رەسەيدىڭ Urals سۇرىپتى مۇنايى دا نارىقتا قۇنسىزدانا باستادى. سوڭعى ەكى ايدا رەسەي مۇنايىنا 15-16 دوللار جەڭىلدىك جاساعان. بۇل اقش-تىڭ بۇرىنعى پرەزيدەنتى دجو بايدەننىڭ بيلىكتەن كەتەر ساتتەگى سانكتسيالارىمەن تىكەلەي بايلانىستى. رەسەيلىك ساراپشىلار سانكتسيانىڭ كەرى اسەرى بايقالا باستاعانىن جانە بيۋدجەتكە سوققى جاسالىپ جاتقانىن ايتتى. رەسەي 2025 جىلعا مۇناي باعاسىن باررەلىنە 69,7 دوللار دەپ بەلگىلەگەن. Urals مۇنايى قاڭتار ايىندا 70 دوللاردان ساتىلسا، اقپان ايىندا بايدەننىڭ سانكتسيالارىنا بايلانىستى 62 دوللاردان ساۋدالانا باستادى. ال ناۋرىز ايىنىڭ باسىندا 54 دوللارعا دەيىن قۇلدىرادى.

ساراپشىلار Brent سۇرىپتى مۇناي باعاسى 60 دوللارعا تۇسەتىن بولسا، رەسەيلىك مۇنايدىڭ باعاسى 45 دوللاردان تومەن بولۋى ىقتيمال دەپ توپشىلايدى. ساراپشىلار ءرۋبلدىڭ قۇندى بولا ءتۇسۋى دە رەسەيلىك بيۋدجەتكە سوققى ەكەنىن ايتتى. جىل باسىندا دوللار 102 رۋبل بولسا، قازىرگى ساتتە ونىڭ قۇنى 84 رۋبلگە ءتۇستى.

ساراپشىلار رەسەي مەن ۋكراينا اراسىنداعى قاقتىعىس توقتايتىن بولسا، Urals مۇنايى مەن Brent مۇنايىنىڭ اراسىنداعى ايىرماشىلىق ازايۋى مۇمكىن ەكەنىن جازدى.

Abai.kz