بۇگىن ءماجىلىستىڭ جالپى وتىرىسىندا ءماجىلىس  دەپۋتاتى قازىبەك يسا مەملەكەت باسشىسىنىڭ باستاماسىمەن جۇزەگە اسىرىلىپ جاتقان ساياسي رەفورمالاردىڭ جانە ەل دامۋىنداعى جاڭا وزگەرىستەردىڭ ماڭىزدىلىعىنا توقتالدى.

دەپۋتاتتىڭ ايتۋىنشا، پرەزيدەنت قاسىم-جومارت توقاەۆتىڭ باستاماسىمەن جۇزەگە اسقان رەفورمالارى ءۇش جىلدىڭ ىشىندە ەل ومىرىنە ۇلكەن سەرپىن بەردى. اتا زاڭعا تۇزەتۋلەر ەنگىزىلدى، پارلامەنتتىڭ وكىلەتتىگى كۇشەيدى، كونستيتۋتسيالىق سوت قۇرىلدى. اۋىل اكىمدەرىن سايلاۋ جۇيەسى جاڭارىپ، حالىقتىڭ سەنىمى ارتتى. مەملەكەتكە قايتارىلعان زاڭسىز اكتيۆتەر قۇنى 2 تريلليون تەڭگەدەن استى. ول ادىلەتتى قازاقستان قاعيداتىنىڭ نەگىزگى تىرەگى – زاڭ مەن ءتارتىپ ەكەنىن اتاپ ءوتتى. 

«ادىلەتتى قازاقستاننىڭ بارىنە بىردەي «زاڭ مەن ءتارتىپ» قاعيداتى بولماسا، بۇلاردىڭ ءبىرى دە بولماس ەدى. ءدال وسى پرينتسيپ پرەزيدەنتتىڭ باستى جەڭىسى دەپ بىلەمىن. ۇلتتىق قوردان بالالار بولاشاعى ءۇشىن قارجى سالۋدى  الدىمەن وزدەرىنىڭ جەكە  بايلىقتارىن كوبەيتۋدى ويلاعان بۇرىنعى بيلىك  ەشقاشان بولۋى مۇمكىن ەمەستەي كورسەتەتىن. ال قازىر ءبارى دە مۇمكىن بولىپ، ءار بالانىڭ ەسەپشوتىنا العاشقى سالىمدار ءتۇسىپ جاتىر»، – دەدى ق.يسا.

سونىمەن قاتار دەپۋتات ۇلتتىق دامۋدىڭ نەگىزى — ۇلتتىق يدەولوگيا ەكەنىنە نازار اۋداردى. مەملەكەت باسشىسىنىڭ ىشكى ساياسات تۇجىرىمداماسىن جاساۋ جونىندەگى تاپسىرماسى ۇلتتىق يدەولوگيانىڭ جاڭا كەزەڭى ەكەنىن جەتكىزدى. ۇلتتىق بىرەگەيلىكتىڭ نەگىزى – مەملەكەتتىك ءتىل ەكەنىن ەسكە سالدى. 

قازىبەك يسا كونستيتۋتسياعا ەنگىزىلگەن وزگەرىستەردىڭ ىشىندە «جەر مەن جەر قويناۋى حالىققا تيەسىلى» دەگەن قاعيدانىڭ تاريحي ماڭىزىن اتاپ ءوتتى.  

سونداي-اق دەپۋتات جاڭادان قۇرىلعان اباي، ۇلىتاۋ جانە جەتىسۋ وبلىستارىنىڭ دامۋعا سەرپىن بەرگەنىنە ءمان بەردى. پرەزيدەنتتىڭ تورعاي ءوڭىرىن دامىتۋ باستاماسى مەن استانادان ارقالىق ارقىلى ترانسكاسپي دالىزىنە شىعاتىن اۆتوجول قۇرىلىسى تۋرالى شەشىمىن قولدايتىنىن جەتكىزدى. 

«ەلىمىزدى جاڭا داۋىرگە باستايتىن ساليقالى ساياسي رەفورما، ۇلتتىق بىرلىك پەن ىنتىماق ءۇشىن ءبارىمىز ءوز ۇلەسىمىزدى قوسۋىمىز كەرەك. ول ءۇشىن پرەزيدەنتتىڭ جانىندا انتىنا ادال، ىسىنە مىعىم ازاماتتاردىڭ توپتاسۋى قاجەت»، – دەدى ق.يسا. 

Abai.kz