1993 جىلدىڭ ەكىنشى ءساۋىرى – قازاقستاننىڭ اسكەري تەڭىزشىلەرى ءۇشىن ەرەكشە كۇن. بۇل كۇنى قازاقستان پرەزيدەنتىنىڭ جارلىعىمەن اسكەري-تەڭىز كۇشتەرى قۇرىلدى.

قارۋلى كۇشتەردىڭ بۇل ءتۇرى قالىپتاسۋ مەن دامۋدىڭ ءتۇرلى كۇردەلى ءارى داڭقتى كەزەڭىنەن ءوتتى. بۇگىنگى تاڭدا ەلدىڭ اسكەري-تەڭىز كۇشتەرى مەملەكەتتىڭ تەڭىزدەگى قۋاتى، سەنىمدى جانە جوعارى تەحنولوگيالىق قۇرامداس بولىگى بولىپ تابىلادى.

سۋرەت: gov.kz سايتىنان الىندى.

اسكەري-تەڭىز كۇشتەرىنىڭ بولىمشەلەرى مەملەكەتتىك شەكارانى قورعاۋ، اقتاۋ، باۋتينو، قۇرىق پورتتارىن، جاساندى ارالداردى، كاسپي تەڭىزىنىڭ قازاقستاندىق سەكتورىنداعى قۇبىرلار مەن كەن ورىندارىن كۇزەتۋ مىندەتتەرىن ورىندايدى.

اسكەري-تەڭىز كۇشتەرى زاماناۋي زىمىران-ارتيللەريامەن، مينا تارتقىش كورابلدەرمەن، گيدروگرافيالىق كەمەلەرمەن جانە دەسانتتىق كاتەرلەرمەن جابدىقتالعان. وتكەن جىلى وتاندىق دەسانتتىق «شاپشاڭ» قايىعى ىسكە قوسىلدى. جىلدام جۇزەتىن قايىق تەڭىزدە وپەراتسيالار جۇرگىزۋگە، جاعالاۋعا دەسانت تۇسىرۋگە، ولاردى اتىسپەن قولداۋعا، مەديتسينالىق ەۆاكۋاتسيالاۋعا جانە اپاتقا ۇشىراعاندارعا كومەك كورسەتۋگە ارنالعان.

سۋرەت: gov.kz سايتىنان الىندى.

كورابلدەر ەكيپاجدارىن شەتەلدەگى جەتەكشى اسكەري وقۋ ورىندارىندا وقىعان وفيتسەرلەر باسقارادى. بىلتىر اسكەري تەڭىزشىلەر يتاليا مەن تۇركيا اسكەري-تەڭىز كۇشتەرىنىڭ كورابلدەرى مەن كەمەلەرىندە تاعىلىمدامادان ءوتتى. ولارعا ءۇندىستاندا، تۇركيادا، پاكىستاندا جانە وڭتۇستىك كورەيادا تىلدىك كۋرستار ۇيىمداستىرىلدى.

اسكەري تەڭىزشىلەر وزدەرىنىڭ كاسىبي شەبەرلىگى مەن اسكەري-تەڭىز داعدىلارىن «بىرلەستىك» حالىقارالىق وقۋ-جاتتىعۋىندا، رەسپۋبليكالىق وقۋ-جاتتىعۋلاردا جانە كاسپي تەڭىزى بويىنشا جيىن-جورىقتاردا ايقىن دالەلدەپ ءجۇر.

سۋرەت: gov.kz سايتىنان الىندى.

جاۋىنگەرلىك ازىرلىكتى نىعايتۋ، تەڭىز ماشىعىن جەتىلدىرۋ جانە وزىق تەحنولوگيالاردى مەڭگەرۋ مىندەتتەرىن ورىنداي ءجۇرىپ، اسكەري تەڭىزشىلەر كاسىبي دەڭگەيىن، جاۋىنگەرلىك دايارلىقتى، بەرىك رۋحتى جانە ءوز ىستەرىنە ادالدىقتى كورسەتۋدە.

Abai.kz