4 ءساۋىر 2025 جىلى ءال-فارابي اتىنداعى قازاق ۇلتتىق ۋنيۆەرسيتەتىنىڭ حالىقارالىق قاتىناستار فاكۋلتەتىندە جەكەنوۆ دۋمان قۇرمانعازىۇلىنىڭ جەتەكشىلىگىمەن قر عىلىم جانە جوعارى ءبىلىم مينيسترىلىگىنىڭ گرانتتىق قارجىلاندىرۋىمەن ار19679313 «بالامالى كولىك دالىزدەرىن قالىپتاستىرۋ جاعدايىندا قازاقستاننىڭ ترانزيتتىك-كولىكتىك الەۋەتىنىڭ باسەكەگە قابىلەتتىلىگى» اتتى جوبا اياسىندا «لوگيستيكانىڭ گەوساياساتى: ورتالىق ازيانىڭ كولىك دالىزدەرى الەمدىك جۇيەدە» اتتى حالىقارالىق عىلىمي كونفەرەنتسيا وتكىزىلدى.

بۇل كونفەرەنتسيا شەڭبەرىندە دە 3-4 ءساۋىر وزبەكستاننىڭ سامارقان قالاسىندا ءوتىپ جاتقان ەۋرووداق – ورتالىق ازيا ءسامميتىنىڭ كۇن تارتىبىندە قاراستىرىلاتىن كولىك-لوگيستيكا سالاسىنداعى ايماقتىق بايلانىستىلىقتى ارتتىرۋ باعىتى جانە ورتالىق ازيا مەن ەۋروپا اراسىنداعى كولىك دالىزدەرىن دامىتۋ ارقىلى ساۋدا-ەكونوميكالىق ىنتىماقتاستىقتى نىعايتۋ ماسەلەلەرىن تالقىلاۋ دا ءوز جالعاسىن تاپتى.

كونفەرەنتسياعا الەمنىڭ بىرقاتار ەلدەرىنەن جەتەكشى عالىمدار، ساراپشىلار جانە مەملەكەتتىك ورگانداردىڭ وكىلدەرى، سونداي-اق لوگيستيكا جانە كولىك سالاسىنداعى ماماندار قاتىستى.

اتاپ ايتساق، كونفەرەنتسياعا تۇركيا مەملەكەتىنەن، بەيكوز ۋنيۆەرسيتەتىنىڭ پرورەكتورى، پروفەسسور راگيپ كۋتاي كارادجا، ازەربايجان مەملەكەتىنەن STEM اناليتيكالىق زەرتتەۋ ورتالىعىنىڭ ديرەكتورى ورحان يولچۋەۆ، وزبەكستان مەملەكەتىنەن الەمدىك ەكونوميكا جانە ديپلوماتيا ۋنيۆەرسيتەتى پەرسپەكتيۆتى حالىقارالىق زەرتتەۋلەر ينستيتۋتىنىڭ اعا عىلىمي قىزمەتكەرى ۋماروۆا نارگيزا باحوديروۆنا، ستامبۋل ۋنيۆەرسيتەتىنىڭ (تۇركيا) پروفەسسورى ومەر كۋل، رەسەي مەملەكەتىنەن "ەكونوميكا جوعارى مەكتەبى" ۇلتتىق زەرتتەۋ ۋنيۆەرسيتەتىنىڭ دوتسەنتى سوكولوۆا تاتيانا دميتريەۆنا، قىرعىزستان مەملەكەتىنەن  قر ءسىم، ك.ديقامباەۆ اتىنداعى ديپلوماتيالىق اكادەمياسىنىڭ پروفەسسورى، ت.ع.د، قۇرمانوۆ زاينيدين كارپەكوۆيچ قاتىستى.

كونفەرەنتسياعا قاتىسۋشىلار ورتالىق ازيانىڭ جاھاندىق كولىك جەلىسىندەگى رولىنە جانە ءوڭىردىڭ حالىقارالىق ساۋدا مەن ەكونوميكاعا اسەرىنە بايلانىستى نەگىزگى ماسەلەلەردى تالقىلادى.

سونداي-اق، ءۇندىستان مەملەكەتىنەن NatStrat اعا عىلىمي قىزمەتكەر رادج كۋمار شارما، يران مەملەكەتىنەن اللامە تاباتاباي ۋنيۆەرسيتەتى، ەىۇ ساقتاندىرۋ ينستيتۋتى، ماندانا تيشەحيار، گرۋزيا مەملەكەتىنەن ساياساتتانۋشى گەلا ۆاسادزە كونفەرەنتسياعا ونلاين فورماتتا قاتىسىپ، وزدەرىنىڭ ازيا، ەۋروپا جانە باسقا ايماقتار اراسىنداعى بايلانىستاردى جاقسارتۋعا ىقپال ەتەتىن كولىك ينفراقۇرىلىمىن جانە بالامالى كولىك دالىزدەرىن دامىتۋداعى زاماناۋي ترەندتەرگە قاتىستى قۇندى اقپاراتتارىمەن ءبولىستى.

سونىمەن قاتار ءوزىمىزدىڭ وتاندىق عالىمدار مەن ساراپشىلار ءال-فارابي اتىنداعى قازاق ۇلتتىق ۋنيۆەرسيتەتى «حالىقارالىق عىلىمدى دامىتۋ ورتالىعى» ديرەكتورىنىڭ ورىنباسارى ەسەنوۆ ولەگ بالىبەكۇلى،  قازاقستان-نەمىس ۋنيۆەرسيتەتىنىڭ حالىقارالىق جانە ايماقتىق ىنتىماقتاستىق زەرتتەۋ ينستيتۋتىنىڭ ديرەكتورى سۇلتانوۆ بولات قىلىشباەۆيچ، قر پرەزيدەنتى جانىنداعى قسزي ازيالىق زەرتتەۋلەر ءبولىمىنىڭ باس ساراپشىسى اۋەلباەۆ بولات ءالىمحانۇلى، الەمدىك ەكونوميكا جانە ساياسات ينستيتۋتىنىڭ جەتەكشى ساراپشىسى ليديا پارحومچيك، ۇلتتىق ەكونوميكا مينيسترلىگى جانىنداعى ەكونوميكالىق زەرتتەۋلەر ينستيتۋتى، عزو "ProAnalytics" ديرەكتورى تولەبەكوۆا دولورەس، الىپباەۆ امانكەلدى راحمەتولداۇلى، ءال-فارابي اتىنداعى قازۇۋ قاۋىمداستىرىلعان پروفەسسورى", «ايماقتىق قاتىناستاردى زەرتتەۋ" عىلىمي-زەرتتەۋ ورتالىعىنىڭ ديرەكتورى ەرمەكباەۆ ادىلبەك الپىسبايۇلى قاتىستى.

ورتالىق ازيا ەلدەرىنىڭ جاھاندىق كولىك جەلىلەرىنە ينتەگراتسيالاۋ ۇدەرىسىندە كەزدەسەتىن ماسەلەلەر مەن سىن-قاتەرلەردى، سونداي-اق ماڭىزدى ترانزيتتىك توراپ رەتىندە قازاقستاننىڭ باسەكەگە قابىلەتتىلىگىن ارتتىرۋ مۇمكىندىكتەرى تالقىلاندى.

ساراپشىلار ورتالىق ازيا ەلدەرىنىڭ قاتىسۋىمەن بىرلەسكەن جوبالاردى ازىرلەۋ مەن ىسكە اسىرۋدىڭ ماڭىزدىلىعىن، سونداي-اق كولىك دالىزدەرىنىڭ ءتيىمدى جۇمىس ىستەۋىن قامتاماسىز ەتۋدە يننوۆاتسيالىق تەحنولوگيالار مەن ينفراقۇرىلىمدى تۇراقتى دامىتۋدىڭ ءرولىن اتاپ ءوتتى. كونفەرەنتسيا اياسىندا ءوڭىردىڭ لوگيستيكالىق جەلىسىن ودان ءارى نىعايتۋ جانە ونى الەمدىك ەكونوميكاعا ىقپالداستىرۋ ءۇشىن ۇسىنىستار ازىرلەۋگە ىقپال ەتەتىن عىلىمي زەرتتەۋلەر دە ۇسىنىلدى.

حالىقارالىق كونفەرەنتسيادا الەمنىڭ بىرقاتار ەلدەرىنەن كەلگەن عالىمدار مەن ساراپشىلار وزدەرىنىڭ زەرتتەۋلەرىمەن، تاجىريبەلەرىمەن، جاڭالىقتارىمەن ءبولىسىپ، ءبىر سوزبەن ايتقاندا ءوزارا تاجىريبە الماستى. ارينە بۇل ءوز كەزەگىندە جاڭا يدەيالاردىڭ تۋىنداۋىنا جانە عىلىمي ىنتىماقتاستىقتىڭ نىعايۋىنا اكەلەرى حاق.

سونداي-اق، بۇل حالىقارالىق كونفەرەنتسيا ترانزيتتىك ينفراقۇرىلىمدى دامىتۋ، جاڭا لوگيستيكالىق كوريدورلار قۇرۋ جانە ساۋدا ەكونوميكالىق بايلانىستاردى نىعايتۋ، قازاقستان مەن ورتالىق ازيانىڭ ترانزيتتىك مۇمكىندىكتەرىن ارتتىرۋ جونىندە ۇسىنىستار مەن شەشىمدەر ازىرلەۋ ءۇشىن ماڭىزدى الاڭ بولدى. كونفەرەنتسيا جۇمىسىن قورىتىندىلاۋ بارىسىندا عىلىمي زەرتتەۋ ورتالىقتارى اتىنان قاتىسۋشى تاراپتار اراسىندا  عىلىمي-زەرتتەۋ جۇمىستارىن بىرلەسىپ جۇرگىزۋ ماقساتىندا ورتاق كەلىسىمدەر جاسالدى.

بۇل وسى باعىتتاعى عىلىمي زەرتتەۋ ورتالىقتارى اراسىندا جاڭا سەرىكتەستىك پەن حالىقارالىق بايلانىستاردى ودان ءارى نىعايتۋعا مۇمكىندىك بەرەرى ءسوزسىز.

سۋرەت: سپيكەردىڭ جەكە البومىنان الىندى.

ب.ز.بيۋجەەۆا،

ءال-فارابي اتىنداعى قازۇۋ، حالىقارالىق قاتىناستار جانە الەمدىك ەكونوميكا كافەدراسىنىڭ قاۋىمداستىرىلعان پروفەسسورى

Abai.kz