عالامدىق تۇراقسىزدىققا قاراماستان، قازاقستان ەركىن ساۋدا قاعيداتتارىنا ادالدىعىن ساقتاپ، ەۋرازيالىق كەڭىستىكتەگى ستراتەگيالىق ارىپتەستىكتى كۇشەيتۋدە. بۇل تۋرالى «قازپوشتا» باسشىسى اسەل جاناسوۆا مالىمدەدى.

«ساۋدا سوعىستارىنا قاراماستان»

«ءبىز ساۋدا سوعىستارى، گەوساياسي كاتاكليزمدەر جانە الەمدەگى ەكونوميكالىق بەلگىسىزدىككە قاراماستان، ەركىن ساۋدا قاعيداتىن ۇستاناتىن سەنىمدى جاقتاۋشىلار بولىپ قالا بەرەمىز. ءبىرتۇتاس ەۋرازيالىق كەڭىستىكتە ورنالاسقاندىقتان، ءبىز جانە باسقا ەلدەر ولاردىڭ اسەرىن سەزىنەمىز. ويتكەنى كورشىلەرىمىزدە بولىپ جاتقان جاعدايلار بىزگە دە اسەر ەتپەي قويمايدى. وسىلايشا، ءبىز شىن مانىندە ءبىر تاعدىرلى قاۋىمداستىقپىز»، – دەدى اسەل جاناسوۆا.

«قازپوشتا» باسشىسىنىڭ ايتۋىنشا، قازاقستان ءوزىنىڭ شىعىس پەن باتىس اراسىنداعى گەوگرافيالىق ورنىن بارىنشا پايدالانىپ، كورشى ەلدەرمەن ارىپتەستىكتى نىعايتىپ، كولىك ينفراقۇرىلىمىن دامىتۋى قاجەت.

اسەل جاناسوۆا كولىك-لوگيستيكالىق ينفراقۇرىلىم ورتالىق ازيا وڭىرىندەگى نەگىزگى ءوسۋ نۇكتەلەرىنىڭ بىرىنە اينالۋى ءتيىس ەكەنىنە سەنىم ءبىلدىردى، بۇل رەتتە قازاقستان جەتەكشى ءرول اتقارادى.

«بۇل مەملەكەت باسشىسى قاسىم-جومارت كەمەلۇلى توقاەۆتىڭ ستراتەگياسىنا، ەلىمىزدىڭ ودان ءارى قالاي دامۋى كەرەكتىگى تۋرالى كوزقاراسىنا تولىق سايكەس كەلەدى. قاسىم-جومارت كەمەلۇلى مۇنداي بىرلەسكەن باستامالار مەملەكەت پەن حالىقارالىق جەكە كومپانيالار اراسىنداعى ىنتىماقتاستىقتىڭ ۇلگىسى بولۋى ءتيىس ەكەنىن اتاپ ءوتتى، بۇل قازاقستاننىڭ ەۋرازياداعى ماڭىزدى لوگيستيكالىق ورتالىق رەتىندە قالىپتاسۋىنا ىقپال ەتەدى»، – دەپ قوستى جاناسوۆا.

Almaty Sky Hub: جاڭا لوگيستيكالىق جوبا

قىتايلىق YTO Express كومپانياسىنىڭ باسقارما توراعاسى يۋي حۋەيتسزياو تاراپتار ماۋسىم ايىندا Almaty Sky Hub حالىقارالىق لوگيستيكالىق حابىنىڭ قۇرىلىسىن باستاۋدى جوسپارلاپ وتىرعانىن راستادى. جوبانى 2026 جىلى اياقتاۋ كوزدەلگەن.

«الماتى پورتى بولاشاقتا ەۋروپا مەن باسقا ەلدەرگە شىعۋ ءۇشىن نەگىزگى تۇيىندەردىڭ ءبىرى بولادى. وسىلايشا، ەلدەرىمىز اراسىندا ەشقانداي كەدەرگى بولمايدى جانە ءبىز ناتيجەلى ىنتىماقتاستىق ورناتا الامىز»، – دەدى يۋي حۋەيتسزياو.

سونداي-اق ول پرەزيدەنت قاسىم-جومارت توقاەۆقا جوباعا جەكە كوڭىل ءبولىپ، باستامانى قولداعانى ءۇشىن ريزاشىلىعىن ءبىلدىردى.

«مەن پرەزيدەنت مىرزاعا وتە ريزامىن، ويتكەنى ونىڭ كەستەسىنىڭ قانشالىقتى تىعىز ەكەنىن جاقسى تۇسىنەمىز. سوعان قاراماستان، ول قىتايدان كەلگەن جەكە كومپانيا رەتىندە بىزبەن كەزدەسۋگە ۋاقىت تاپتى، بۇل ءبىزدى تەرەڭ اسەرگە بولەدى. توقاەۆ مىرزا «قازپوشتامەن» ىنتىماقتاستىعىمىزعا جان-جاقتى قولداۋ ءبىلدىرىپ، ءبىزدىڭ باستامالارىمىزعا ۇلكەن قولداۋ كورسەتتى، وسىلايشا ءبىز قازاقستان-قىتاي ىنتىماقتاستىعىنا يننوۆاتسيالىق جاڭا يدەيالار ەنگىزۋدى جالعاستىرا الامىز»، – دەپ اتاپ ءوتتى ول.

ونىڭ ايتۋىنشا، قىتاي تەك ساۋدانى دامىتۋعا عانا ەمەس، سونىمەن قاتار ارىپتەستىكتى كەڭەيتۋگە دە مۇددەلى.

«ءبىز قازاقستان نارىعىنا ۇلكەن قۋانىشپەن كەلىپ، ءوز ۇلەسىمىزدى قوسقىمىز كەلەدى. سونداي-اق قازاقستان قوعامىنىڭ الەۋمەتتىك جانە باسقا دا سالالارىنا ۇلەس قوسۋدى قالايمىز. قىتاي قازاقستانمەن جانە باسقا دا ورتالىق ازيا مەملەكەتتەرىمەن ءوزارا ءتيىمدى ىنتىماقتاستىقتى ىلگەرىلەتەتىن بولادى»، – دەپ تولىقتىردى يۋي حۋەيتسزياو.

استاناداعى سامميت: 10 ەلدەن كەلگەن لوگيستيكالىق وپەراتورلار نە تالقىلاۋدا.

بۇل مالىمدەمەلەر ايتىلعان ءسامميتتى «قازپوشتا» YTO كومپانياسىمەن بىرلەسىپ ۇيىمداستىردى. استاناداعى سامميتكە 10-نان استام ەلدەن پوشتا جانە لوگيستيكالىق كومپانيالاردىڭ باسشىلارى جينالدى.

نەگىزگى نازار – ورتالىق ازياداعى ەلەكتروندىق كوممەرتسيانى دامىتۋ، تاريفتىك ساياسات جانە لوگيستيكا ماسەلەلەرىنە اۋدارىلدى. الەمدىك تۇراقسىزدىق جاعدايىندا ءتيىمدى جانە تۇراقتى پوشتا ينفراقۇرىلىمىن قالاي قۇرۋعا بولاتىنىنا ەرەكشە كوڭىل ءبولىندى.

بۇعان دەيىن پرەزيدەنت قاسىم-جومارت توقاەۆ YTO Express باسقارما توراعاسى يۋي حۋەيتسزياونى قابىلداعان بولاتىن. پرەزيدەنتكە «قازپوشتا» مەن YTO Express-ءتىڭ بىرلەسكەن كاسىپورنى – Qazpost-YTO قىزمەتى تۋرالى اقپارات بەرىلدى.

بيىل الماتى وبلىسىندا سۇرىپتاۋ حابىنىڭ قۇرىلىسىن باستاۋ جوسپارلانۋدا، بۇل پوشتا جونەلتىلىمدەرىن جەتكىزۋ ۋاقىتىن قىسقارتۋعا مۇمكىندىك بەرەدى. Qazpost-YTO سۇرىپتاۋ حابىنىڭ جانىندا يندۋستريالىق پارك قۇرۋدى جوسپارلاپ وتىر. قاسىم-جومارت توقاەۆ مۇنداي بىرلەسكەن جوبالاردىڭ ستراتەگيالىق ماڭىزدىلىعىن اتاپ ءوتىپ، ولار مەملەكەت پەن حالىقارالىق بيزنەستىڭ ءتيىمدى ءوزارا ءىس-قيمىلىنىڭ ۇلگىسى بولۋى ءتيىس ەكەنىن ايتتى.

Abai.kz