مەملەكەت باسشىسىنىڭ تاپسىرماسىن ورىنداۋ ماقساتىندا سىبايلاس جەمقورلىققا قارسى ءىس-قيمىل اگەنتتىگى قوعامدا زاڭدىلىق پەن ءتارتىپ قاعيداتىن قامتاماسىز ەتۋ، سونداي-اق سىبايلاس جەمقورلىق فاكتىلەرىنىڭ جولىن كەسۋ جونىندەگى جۇمىستى جالعاستىرۋدا.

ماڭعىستاۋ وبلىسى جاڭاوزەن اۋدانىنىڭ سوتى «قازاق گاز وڭدەۋ زاۋىتى» جشس بۇرىنعى ديرەكتورى ب.ا. بايشۋاقوۆقا قاتىستى ۇكىم شىعاردى.

بايشۋاقوۆ كاسىپورىننىڭ سەنىپ تاپسىرىلعان مۇلكىن اۋكتسيون وتكىزبەستەن زاڭسىز ساتۋ جانە تۇسكەن قاراجاتتى يەمدەنۋ ارقىلى ءىرى مولشەردە جىمقىرعانى ءۇشىن كىنالى دەپ تانىلدى.

ول 4 جىلعا باس بوستاندىعىنان ايىرىلدى جانە ءومىر بويى مەملەكەتتىك قىزمەتتە جانە كۆازيمەملەكەتتىك سەكتور سۋبەكتىلەرىندە قىزمەت اتقارۋ قۇقىعىنان ايىرىلدى.

سوت اكتىسى زاڭدى كۇشىنە ەنگەن جوق.

كونستيتۋتسيانىڭ 77-بابى 3-تارماعىنىڭ 1-تارماقشاسىنا جانە قىلمىستىق-پروتسەستىك كودەكستىڭ 19-بابى 1-بولىگىنە سايكەس، قىلمىستىق قۇقىق بۇزۋشىلىق جاساۋداعى كىناسى سوتتىڭ زاڭدى كۇشىنە ەنگەن ۇكىمىمەن بەلگىلەنگەنگە دەيىن ءاربىر ادام كىناسىز دەپ ەسەپتەلەدى.

Abai.kz