«استانا — وڭىرلىك ەلەكترجەلىلىك كومپانياسى» اق ەلەكتر ەنەرگياسىنىڭ شەكتى ءتاريفىن 1 كيلوۆاتت-ساعاتىنا 31,67 تەڭگەگە دەيىن كوتەرۋدى ۇسىنىپ وتىر. بۇل تۋرالى بۇگىن قوعامدىق تىڭداۋ بارىسىندا اتالعان كومپانيا باسشىسى رۋسلان ءابجانوۆ ايتتى. 

ونىڭ اتاپ وتۋىنشە، 2024 جىلى ەلەكتر ەنەرگياسىنىڭ ءتاريفى 1 كيلوۆاتت-ساعات ءۇشىن 29,28 تەڭگەدەن 24,43 تەڭگەگە دەيىن تومەندەتىلگەن. ال قازىرگى ۋاقىتتا ەنەرگيا بەرۋشى ۇيىمداردىڭ ءتاريفى كوتەرىلىپ وتىر. سونىڭ سالدارىنان قولدانىستاعى تاريف شىعىندى سانالادى جانە ەلەكتر ەنەرگياسىنىڭ وزىندىك قۇنىن جابا المايدى.

— 2025 جىلدىڭ 1 قاڭتارىنان بەرى قولدانىستاعى تاريف 1 كيلوۆاتت-ساعات ءۇشىن 24,43 تەڭگە. ال ءبىز 31,67 تەڭگە دەيىن كوتەرۋدى ۇسىنىپ وتىرمىز. تاريف ءوسىمى — 29,6 پايىز. ەگەر قۇرىلىمىن قارايتىن بولساق، ورتاشا ەسەپپەن ءتاريفتىڭ ارتۋى ساتىپ الۋ، ترانزيت جانە قۋاتتار ءتاريفىنىڭ ارتۋى ەسەبىنەن بولىپ وتىر، — دەدى ول.

كومپانيا ۇسىنىپ وتىرعان جوباعا سايكەس، وسى جىلدىڭ 1 مامىرىنان باستاپ تۇتىنۋ توپتارىنا قاراي سارالانعان تاريف مىناداي بولماق: حالىق ءۇشىن — 1 كيلوۆاتت-ساعات ءۇشىن — 22,43 تەڭگە (ققس-ءتى ەسەپتەگەندە 25,12 تەڭگە), زاڭدى تۇلعالار ءۇشىن — 33,88 تەڭگە، بيۋدجەت ءۇشىن — 66,33 تەڭگە، الەۋمەتتىك ماڭىزى بار ازىق-تۇلىك تاۋارلارىن شىعاراتىن كومپانيالار ءۇشىن — 31,67 تەڭگە.

ايتا كەتەيىك، كەشە «استانا سۋ ارناسىنىڭ» 2025 جىلعى 1 مامىردان باستاپ كورسەتىلەتىن قىزمەتتەرىنە تاريفتەردىڭ وزگەرۋىنە قاتىستى وراي قوعامدىق تىڭداۋ ءوتتى.

ءمالىم بولعانى «سارقىندى سۋلاردى اعىزۋ جانە تازارتۋ» تاريفتەرىنىڭ ورتاشا دەڭگەيىن تەكشە مەترىنە 134,96 تەڭگەدەن 174,29 تەڭگەگە دەيىن وزگەرتۋ ۇسىنىلىپ وتىر. «حالىققا» ارنالعان تاريف 79,63 تەڭگەدەن 102,38 تەڭگەگە دەيىن، جىلۋمەن قامتاماسىز ەتۋ كاسىپورىندارى بويىنشا 240,54 تەڭگەدەن 310,63 تەڭگەگە دەيىن (70 تەڭگە), ال بيۋدجەتتىك ۇيىمدار مەن زاڭدى تۇلعالار ءۇشىن 309,12 تەڭگەدەن 399,19 تەڭگەگە دەيىن (90 تەڭگە) وزگەرەدى. ال «اۋىز سۋدى جىبەرۋ» جانە «تەحنيكالىق سۋمەن قامتاماسىز ەتۋ» قىزمەتتەرى بويىنشا تاريفتەر تەكشە مەترىنە سايكەسىنشە 158,93 تەڭگە جانە 53,43 تەڭگە دەڭگەيىندە وزگەرىسسىز قالدى.

Abai.kz