اقپان ايىندا شىمكەنت قالاسىنا ورىنباسار اكىم بولىپ بارعان رۋسلان بەردەنوۆتى كەشە كەشكە اكىمدىك الدىندا اتىپ كەتتى دەگەن اقپارات ەل ىشىندە ىزۋ-قىزۋ تالقىلانۋدا.

وقيعا 21 ءساۋىر كۇنى ساعات 20:30 شاماسىندا ورىن العان. رۋسلان بەردەنوۆتىڭ وڭ جاق جامباسى مەن يىعىنا وق ءتيىپ، جەدەل تۇردە اۋرۋحاناعا جەتكىزىلگەن. وعان وتا جاسالىپ، «ومىرىنە قاۋىپ جوق» دەپ باعالاندى. وق اتقان ادام وقيعا ورنىندا ۇستالىپ، ۋاقىتشا ۇستاۋ يزولياتورىنا قامالدى. شىمكەنت قالاسىنىڭ پوليتسياسى قىلمىستىق ءىس قوزعالىپ، تەرگەۋ جۇرگىزىلىپ جاتقانىن حابارلادى.

بەيرەسمي اقپاراتقا سۇيەنسەك، وق اتقان ادام شىمكەنت قالاسى اكىمدىگىنە قاراستى «تۇرعىن ءۇي شىمكەنت» جشس-ىندە جۇمىس ىستەگەن.

تۋرا ەكى جىل بۇرىن قازاقستاننىڭ ساياسي ساحناسىنا كەنەتتەن «رەسپۋبليكا» پارتياسى پايدا بولىپ، پارلامەنتتەن ءبىر-اق شىققان ەدى. رۋسلان بەردەنوۆ پارتيا اتىنان پارلامەنت پارتاسىنا جايعاسقانداردىڭ قاتارىندا بولدى. بيىل پارتيالاسى دينارا شۇكىجانوۆانىڭ ارتىنان، رۋسلان بەردەنوۆ تە دەپۋتاتتىق مانداتىن تاپسىرىپ، شىمكەنت قالاسى اكىمىنىڭ ورىنباسارى قىزمەتىنە تاعايىندالعان ەدى.

الەۋمەتتىك جەلىلەردە قىلمىستىق ءىستىڭ تۋىنداۋ سەبەبىنە باپيلانىستى راستالماعان ءتۇرلى نۇسقالار تارالۋدا. ءبىر نۇسقا بويىنشا بەردەنوۆ ۇستالعان ادامنىڭ ايەلىنە قىرىنداعان دەلىنەدى. بىراق شىمكەنت اكىمدىگى بۇل نۇسقانى جوققا شىعاردى.

«مەديا جانە الەۋمەتتىك جەلىلەردە قالالىق اكىمنىڭ ورىنباسارى رۋسلان بەردەنوۆكە جاسالعان قاستاندىقتىڭ سەبەبى ونىڭ شابۋىلداۋشىنىڭ ايەلىنە قىرىنداعانى دەگەن اقپارات. ءبىز بۇل مالىمەتتىڭ جالعان ەكەنىن حابارلايمىز»، — دەپ مالىمدەدى شىمكەنت اكىمدىگى.

«چەمودان گوسسەكرەتوۆ» Telegram-كانالى ءوز دەرەككوزدەرىنە سىلتەمە جاساپ، قازىر نەگىزگى نۇسقانىڭ جەكە باس ارازدىعى ەكەنىن حابارلادى.

الايدا تانىمال بلوگەر بەيبىت الىبەكوۆ شابۋىل بەردەنوۆتىڭ شىمكەنتتەگى قۇرىلىس سالاسىنداعى قىزمەتىمەن بايلانىستى بولۋى مۇمكىن دەپ پايىمدادى.

«مەنىڭ ويىمشا، بۇل شىمكەنتتەگى قۇرىلىس سالاسىندا ءتارتىپ ورناتۋمەن بايلانىستى بولۋى مۇمكىن، بۋكمەكەرلەردىڭ قاتىسى بار دەپ ويلامايمىن. بۇگىن عانا وسى تاقىرىپتا قاتال ءماجىلىس ءوتتى. ماعان رۋسلاندى بوپسالاعانداردىڭ بولعانى جايلى حابارلاندى»، — دەپ جازدى الىبەكوۆ.

الەۋمەتتىك جەلىدە قوعام بەلسەندىلەرى دە ءوز ويلارىن جازىپ جاتىر. بەلگىلى ءدىنتانۋشى قايرات جولدىباي: «وتكەن اپتا رۋسلاندى جاڭا قىزمەتىمەن قۇتتىقتاپ بارعانىمدا، «شىمكەنتتە جۇمىس ىستەۋ وتە قيىن. قۇرىلىس سالاسىندا رەتتەيتىن جۇمىس كوپ. بۇل سالاداعى لايىقسىز ءبىر ادامدى قىزمەتتەن شەتتەتۋدىڭ ءوزى اجەپتەۋىر اۋرەشىلىك. ادام سياقتى جۇمىس ىستەۋگە كەدەرگى كوپ» دەپ قىنجىلىپ ەدى.

كەشە كەشكىسىن بولعان جايسىز وقيعانى ەستىپ، ۋايىمداپ قالدىق. جاقىندارىنان سۇراستىرىپ بىلسەم، رۋسلانعا وق اتقان قۇرىلىس سالاسىنداعى قىزمەتىنەن تاياۋدا عانا شەتتەتىلگەن ادام ەكەن.

الەمجەلىدە وقيعاعا قاتىستى رۋسلاندى ايىپتاعان قيسىنعا كەلمەيتىن كەيبىر جازبالاردى وقىپ قالدىم. تەرگەۋدىڭ، سوتتىڭ شەشىمى شىقپاي جاتىپ، ءتىپتى سەنىمدى دەرەك كوزىنە دە سۇيەنبەستەن دالەل-دايەكسىز كىسىنى كىنالاۋ زاڭعا دا، ادامشىلىققا دا قايشى», - دەپ جازادى.

ماسەلەنىڭ انىق-قانىعىن قۇقىق قورعاۋ ورىندارى انىقتاپ، زاڭدىق تۇرعىدان باعا بەرەتىنىن انىق. بۇل شەتىن وقيعانىڭ قوعام نازارىن اۋدارۋى «تالعار وقيعاسىنداي» دۇكەننىڭ اۋماعىندا ەمەس، قازاقستاننىڭ ءۇشىنشى ۇلكەن قالاسى ستاتۋسىنا يە شىمكەنت اكىمدىگىنىڭ الدىندا بولعانىندا جاتسا كەرەك. ەندى مەملەكەتتىك قىزمەتكەرلەردىڭ ەتيكاسى مەن مەملەكەتتىك ورگانداردىڭ كۇزەت قىزمەتى قايتا قارالۋى مۇمكىن.

Abai.kz