بيىل بۇل ءتۋرنيردىڭ مارتەبەسى وزگەردى.

7-10 قازان ارالىعىندا الماتىداعى «Halyk Arena» مۇز ايدىنىندا فيگۋرالى سىرعاناۋدان وتەتىن VIII Denis Ten Memorial Challenge 2026 حالىقارالىق ءتۋرنيرى ۇيىمداستىرىلادى. بيىل بۇل جارىس 2026/27 جىلعى ماۋسىمداعى ISU Challenger Series كۇنتىزبەسىنىڭ اجىراماس بولىگىنە اينالدى. بۇل تۋرالى الماتى قالالىق وڭىرلىك كوممۋنيكاتسيالار قىزمەتىندە وتكەن ءباسپاسوز ءماسليحاتىندا ءتۋرنيردىڭ ورگكوميتەت جەتەكشىسى ءارى «دەنيس تەن قورىنىڭ» ديرەكتورى وكسانا تەن مەن جارىستىڭ ءباسپاسوز حاتشىسى بوتاگوز الدوڭعاروۆا حابارلادى.

تۋرنيرگە الەمنىڭ 25-تەن استام ەلىنەن (سونىڭ ىشىندە اقش، فرانتسيا، گەرمانيا، كانادا، ۆەنگريا، وڭتۇستىك كورەيا جانە جاپونيا بار) 150-گە جۋىق سپورتشى قاتىسادى دەپ كۇتىلۋدە.

ەسكە الۋ كەشىنەن باستالعان تۋرنير الەمدىك سەريا كەزەڭىنە قالاي اينالدى؟

وكسانا تەننىڭ ايتۋىنشا، تۋرنير وتكەن جىلدار ىشىندە ۇلكەن جولدان ءوتتى: ول دەنيس تەندى ەسكە الۋعا ارنالعان جەرگىلىكتى جارىستان باستالىپ، تولىققاندى حالىقارالىق ستارتقا اينالدى. جارىس 2019 جىلدان بەرى وتكىزىلىپ كەلەدى جانە باستاپقىدان-اق ءۇش نەگىزگى مىندەتتى قاتار اتقارادى: سپورتتىق ناتيجەلەر، حالىقارالىق بايلانىستار جانە ەل ىشىندە فيگۋرالى سىرعاناۋدى دامىتۋ.

«ءبىز ءۇشىن دەنيس تەندى ەسكە الۋ تەك ونىڭ ونەر كورسەتكەن ساتتەرى مەن جەتىستىكتەرىن ەسكە تۇسىرۋمەن عانا شەكتەلمەي، ناقتى ءىس ارقىلى كورىنىس تاپقانى ماڭىزدى. ول — حالىقارالىق تۋرنير وتكىزۋ، سپورتشىلاردى قولداۋ جانە فيگۋرالى سىرعاناۋدى ودان ءارى دامىتۋعا مۇمكىندىكتەر جاساۋ»، — دەپ اتاپ ءوتتى ول.

دەنيس تەننىڭ ءوزى وليمپيادا تۇعىرىنا كوتەرىلگەن العاشقى قازاقستاندىق فيگۋريست رەتىندە تاريحتا قالدى (سوچي-2014 وليمپياداسىنىڭ قولا جۇلدەگەرى). ونىڭ سپورتتىق مانسابىندا 2013 جىلعى الەم چەمپيوناتىنىڭ كۇمىس جۇلدەسى، 2015 جىلعى الەم چەمپيوناتىنىڭ قولاسى، ءتورت قۇرلىق چەمپيوناتىنىڭ تيتۋلى، سونداي-اق ازيا قىسقى ويىندارى مەن ۋنيۆەرسياداداعى جەڭىستەرى بار.

ISU Challenger Series سەرياسىنا ەنۋ ءتۋرنيردىڭ بەدەلىن ايتارلىقتاي ارتتىرادى. ەندى ونىڭ ناتيجەلەرى ISU جۇيەسىندە تىركەلەدى، ال فيگۋريستەر حالىقارالىق رەيتينگتە ەسەپكە الىناتىن ۇپايلاردى جيناۋعا مۇمكىندىك الادى. جارىستارعا ISU اككرەديتاتسياسىنان وتكەن ماماندار تورەلىك ەتەدى، ال تۋرنير فەدەراتسيانىڭ رەسمي ەرەجەلەرى بويىنشا وتەدى.

نەگىزگى جارىستارعا كىرۋ تەگىن بولادى، سونداي-اق كورەرمەندەرگە نەگىزگى ونەر كورسەتۋلەردەن بولەك، سپورتشىلاردىڭ جاتتىعۋلارىن تاماشالاۋعا دا مۇمكىندىك بەرىلەدى.

«ءتۋرنيردىڭ تەك كاسىبي سپورت قاۋىمداستىعى ءۇشىن ءوتىپ قويماي، جاستار مەن ستۋدەنتتەردى دە قىزىقتىرعانىن قالايمىز. ولارعا جوعارى دەڭگەيدەگى فيگۋرالى سىرعاناۋدى ءوز كوزدەرىمەن كورىپ، ۇلكەن سپورتتىڭ اتموسفەراسىن سەزىنۋگە مۇمكىندىك بەرگىمىز كەلەدى»، — دەدى بوتاگوز الدوڭعاروۆا.

ۇيىمداستىرۋشىلاردىڭ مالىمەتىنشە، ءتۋرنيردىڭ تىكەلەي ترانسلياتسياسىن 56 ەلدە تاماشالايدى. كەستە، ناتيجەلەر جانە جاڭالىقتار Denis Ten Foundation رەسمي الەۋمەتتىك جەلىلەرىندە جاريالانىپ تۇرادى، ال جۋرناليستەر ءۇشىن اككرەديتاتسيا مەن اقپاراتتىق قولداۋ ۇيىمداستىرىلعان.

ءتۋرنيردىڭ قورىتىندى بولىگى 10 قازاندا وتەدى: وعان سوڭعى ونەر كورسەتۋلەر، ماراپاتتاۋ ءراسىمى جانە جەڭىمپازدار مەن الەمدىك فيگۋرالى سىرعاناۋ جۇلدىزدارىنىڭ قاتىسۋىمەن وتەتىن Gala Show كىرەدى.

Abai.kz