قازاقستان ءۇندىستاننىڭ تۋريزم نارىعىنداعى نەگىزگى كومپانيالارمەن ىنتىماقتاستىقتى نىعايتىپ، تىكەلەي اۋە قاتىناسىن كەڭەيتۋدە. Kazakh Tourism جانە Air Astana كومپانيالارى بۇل ەلدىڭ جەتەكشى تۋروپەراتورلارى ءۇشىن ارنايى تانىستىرۋ تۋرىن ۇيىمداستىردى.

قازاقستان ەۋرازيانىڭ تۋريستىك كارتاسىندا ءوز مارتەبەسىن نىعايتىپ كەلەدى. وتكەن جىلدىڭ وزىندە ءۇندىستاننان كەلۋشىلەر سانى ەكى ەسەگە جۋىق ارتىپ، 78 مىڭنان 146 مىڭعا جەتتى. بۇل - ەلىمىزدىڭ  تۋريستىك الەۋەتىن شەتەلدە ىلگەرىلەتۋ جۇمىستارىنىڭ ناتيجەسى.

ۇندىستاندىق تۋروپەراتورلاردىڭ قازاقستانعا ساپارى «مۋمباي – الماتى» جاڭا تىكەلەي اۋە باعدارىنىڭ ىسكە قوسىلۋىنا وراي ۇيىمداستىرىلدى. العاشقى رەيس وڭتۇستىك استاناعا ءساتتى قونىپ، قوناقتار الماتى قالاسى مەن الماتى وبلىسىنىڭ كورنەكتى جەرلەرىن ارالاۋعا اتتاندى. باعدارلامادا «كوكتوبە» ساياباعى، «شىمبۇلاق» تاۋ-شاڭعى كۋرورتى، كورىكتى «شارىن» شاتقالى، بىرەگەي كولساي مەن قايىڭدى كولدەرى جانە وزگە دە تۋريستىك نىساندار قامتىلعان. بۇل تانىستىرۋ ساپارى ءۇندىستان تۋروپەراتورلارىنا ءوڭىردىڭ تۋريستىك الەۋەتىن باعالاۋعا جانە ساياحاتشىلارعا ۇسىناتىن باعىتتاردى كەڭەيتۋگە جول اشادى.

ءۇندىستاننىڭ ەڭ ءىرى مەگاپوليسىمەن تىكەلەي اۋە بايلانىس اپتاسىنا 3 رەت ورىندالادى: مۋمبايدان ۇشاق سارسەنبى، جۇما جانە جەكسەنبى كۇندەرى ۇشادى، ال الماتىدان كەرى رەيستەر سارسەنبى، بەيسەنبى جانە جەكسەنبى كۇندەرى جۇزەگە اسىرىلادى.

اتاپ وتكەن ءجون، 2024 جىلى Kazakh Tourism مۋمباي قالاسىندا قازاقستاندىق جانە ۇندىستاندىق تۋروپەراتورلار اراسىندا ىنتىماقتاستىقتى دامىتۋ ماقساتىندا B2B كەزدەسۋلەر وتكىزدى.

Kazakh Tourism ءباسپاسوز قىزمەتى

Abai.kz