وزبەكستاننىڭ حيۆا قالاسىندا وزبەكستان مادەنيەت مينيسترلىگىنىڭ ۇيىمداستىرۋىمەن حالىقارالىق باقسى فەستيۆالى ءوتتى. فەستيۆال اياسىندا وتكەن «ءىى تۇركى دۇنيەسى مادەنيەت فورۋمى» شەڭبەرىندە «تۇركى مادەنيەتىنىڭ تسيفرلىق ترانسفورماتسياسى» تاقىرىبىندا سەسسيا ۇيىمداستىرىلدى.

«ادەبيەت جانە ونەر» پورتالىنىڭ حابارلاۋىنشا، سەسسيا تۇركى مادەنيەتى جانە مۇراسى قورى مەن تۇرىك ىنتىماقتاستىق جانە ۇيلەستىرۋ اگەنتتىگى (TİKA) بىرلەسىپ ۇيىمداستىردى.

تۇركى مادەنيەتى جانە مۇراسى قورىنىڭ جوبا مەنەدجەرى نۋري اكسۋنىڭ مودەراتورلىعىمەن وتكەن سەسسيادا مادەني مۇرا مەن تسيفرلاندىرۋ سالاسىنداعى حالىقارالىق بەدەلگە يە ماماندار باس قوستى. نۋري اكسۋ ءوز سوزىندە TİKA مەن تۇركى مادەنيەتى جانە مۇراسى قورى اراسىنداعى ىنتىماقتاستىق قارىم-قاتىناستار تۋرالى بايانداپ، تاراپتار اراسىندا قول قويىلعان ءوزارا تۇسىنىستىك تۋرالى مەموراندۋمعا سۇيەنە وتىرىپ، 2025 جىلعا جوسپارلانعان بىرلەسكەن جوبالار تۋرالى اقپارات بەردى. سونداي-اق، ول «ماجارستانداعى تۇركى مۇراسىن تسيفرلاندىرۋ» جوباسىنا ەرەكشە نازار اۋداردى.

سونىمەن قاتار نۋري اكسۋ اتالعان سەسسيانىڭ دا تىكەلەي TİKA مەن تۇركى مادەنيەتى جانە مۇراسى قورى اراسىنداعى ىنتىماقتاستىقتىڭ ناتيجەسىندە ۇيىمداستىرىلعانىن ەرەكشە اتاپ ءوتتى.

تۇركى مادەنيەتى جانە مۇراسى قورىنىڭ پرەزيدەنتى اقتوتى رايىمقۇلوۆا سەسسياعا قاتىسىپ، قاتىسۋشىلاردىڭ باياندامالارىن تىڭداپ، ولاردى قۇتتىقتادى.

سەسسيا بارىسىندا تۇرىك ساۋلەت زەرتتەۋلەرى ورتالىعىنىڭ باس حاتشىسى حاسان فەۆزي چۇگەن ءسوز سويلەپ، بالقانداعى تۇركى ساۋلەت مۇراسىن قالپىنا كەلتىرۋ جانە تسيفرلاندىرۋ جوبالارى تۋرالى باياندادى. ول ءوز بايانداماسىندا بالقان تۇبەگى مەن تۇركىستان ايماعىنداعى ءتۇرلى مۇرا نىساندارى تۋرالى ايتىپ، TİKA-نىڭ قولداۋىمەن قالپىنا كەلتىرىلگەن گۇل بابا كەسەنەسى مەن مۋزەيى، سونداي-اق سەربياداعى ماحمۇد پاشا مونشاسى سياقتى جوبالارعا دا توقتالدى.

Abai.kz