قازاقستان بيلىگى رەسەيلىك پروپاگانديست اندرەي گروزيندى ەل اۋماعىنا كىرگىزبەي قويدى.

وقيعا 27 ساۋىردە استانا اۋەجايىندا بولعان.

كرەملدىڭ ىرگەسىندەگى تمد ينستيتۋتىندا قازاقستاندى زەرتتەۋمەن اينالىساتىن گروزين "اقوردا مەن كرەملدىڭ قارىم-قاتىناسىن تالقىلايتىن" جيىنعا اسىعىپ كەلە جاتقان.

الايدا پاسپورتتىق باقىلاۋ بەكەتىندە وعان ەل اۋماعىنا كىرۋگە رۇقسات بەرىلمەگەن. شەكاراشىلار پروپاگانديسكە ەشقانداي تۇسىنىكتەمە بەرمەگەن. ءسويتىپ قازاقستانعا كەلگەندە وكتەم سويلەپ ۇيرەنگەن گروزين تابالدىرىقتان كەرى قايتىپتى.

مۇنى ەستىگەن رەسەي دۋماسىنىڭ دەپۋتاتى كونستانتين زاتۋلين بۇلقان-تالقان تولىپ جاتىر.

"رەسەيدىڭ كەيبىر وداقتاسى ارىپتەستىكتى شۆەد ۇستەلىنە ۇقساتادى، ۇناعانىن الادى، ۇناماعانىن قالدىرادى", - دەيدى زاتۋلين.

تينا كاندەلاكيدىڭ ءىزىن الا قازاقستان تۋرالى تەرىس پىكىر بىلدىرگەن تۇلعالاردىڭ "قارا تىزىمىنە" ەنگەن گروزين بۇدان كەيىن ابايلاپ سويلەيتىن بولادى.

اشكەرە-گە جەتكەن مالىمەت بويىنشا "رەسەي – قازاقستان: قاۋىپسىزدىك جانە ىنتىماق" دەيتىن فورۋمعا قاتىسۋى ءتيىس بولعان گروزين قوماقتى گونوراردان قاعىلىپ، ءىشى اشىپ وتىر.

ايتا كەتەلىك، ءدال وسى گروزين بىلتىرلارى "پۋتين توقاەۆتى "قۇتقارىپ" قالعان ەدى. اقوردا كرەملدى ساتىپ كەتتى..." دەگەن سارىندا سويلەگەن بولاتىن.

"توقاەۆ؟ ول تىم كوسەمسىپ كەتتى. اقوردانى تاۋبەسىنە تۇسىرەتىن كەز كەلدى. قازاقستان ەكسپورتىنىڭ 90 پايىزى رەسەي اۋماعىمەن وتەدى. وسى ارنانىڭ اۋزىن بۋسا، بالكىم، قازاق بيلىگىنىڭ ەسى كىرەر. مۇنداي ءالسىز وداقتاستىڭ "ەركەلىگىن" قاشانعى كەشىرە بەرەمىز؟!", – دەگەن-تۇعىن رەسەيلىك پروپاگانديست.

Abai.kz