الماتىداعى سي-28 تەرگەۋ اباقتىسىنا بارىپ، ءارتۇرلى قىلمىستىق ىسكە تارتىلعان بىرنەشە ازاماتپەن كەزدەسىپ قايتتىم. (ارقايسىسىنا بولەك-بولەك جازبا ارنايمىن).

سۋرەت: ە.باپيدىڭ جەلىدەگى پاراقشاسىنان الىندى.

سولاردىڭ ءبىرى - اەس-كە قارسى رۇقساتسىز نارازىلىق اكتسياسىن ۇيىمداستىرۋعا قاتىسى بار دەگەن جەلەۋمەن قاماۋعا الىنعان نۇرلان جاۋىلباەۆ. بىراق پروكۋراتۋرا نۇرلانعا جانە ونىمەن بىرگە ءدال وسى ايىپپەن قامالعان تاعى دا ءتورت جىگىتكە كەيىننەن «ەكسترەميستىك باپتى» بايلاپ بەرىپتى.

ءيا، اۋىر ايىپ، قيىن باپ! بىراق اەس قايدا، ەكسترەميزم قايدا؟! بۇل بەس جىگىتتىڭ تەرىسىن ءتورت رەت سىپىرىپ الساڭ دا، لاڭكەستىكتىڭ ءىزى تۇگىلى، ءيىسىن تاپپايسىڭ! الوكپە اسىرا سىلتەۋ!

ءيا، اەس دابىراسى كەزىندەگى «الدىن الا ساقتانۋ ينستينگى» قوزىپ كەتكەن كۇشتىك قۇرىلىمدار قىزدى-قىزدىمەن بەس جىگىتتى قاماۋعا العان شىعار. ءيا، قىڭىر قوعامنىڭ قىزۋىن باسۋدىڭ دوعالداۋ دولبارىن جاساعان بولار. ءيا، بيلىككە دەگەن «حرونيكالىق» نارازىلىعى بار جىگىتتەر سىرتتان سىبىرلاعان الدەبىر ايداپسالدىڭ سوزىنە ەرىپ كەتكەن شىعار. التىنبەكتىڭ اتىلۋىنا بايلانىستى نازارباەۆشىلاپ ايتساق، «س كەم نە بىۆاەت؟».

ەندى شە؟ ەندى ەلدەگى رەفەرەندۋمنىڭ ناتيجەسىندە ءبىر ەمەس، پەرسپەكتيۆادا ءۇش اەس سالىناتىن بولعان جوق پا؟! قازاقشىلاپ ايتقاندا، «جاۋدىڭ بەتى قايتتى»، ەندىگى ەرەگەستىڭ ءجونى قايسى؟ بەس بىردەي ازاماتتى تۇرمەگە تىعۋدىڭ قانداي قيسىنى قالدى؟

سوندىقتان ەكى جاق اقىلعا سالىپ: «كۇشتى كەشىرىمشىل كەلەدى» دەگەن تامسىلگە پروكۋراتۋرا دەس بەرىپ; ادامي زاڭدى قۇقىعىنا «قاقالىپ» قالعان قاماۋداعىلار مىقىن تايانىپ، «پوزاعا» تۇرىپ الماي; «ساياسي تۇتقىندار» سانىن مولايتپاۋعا مۇددەلى بولۋى ءتيىس بيلىك قازاقستان مەن پرەزيدەنتتىڭ سىرتتاعى يميدجىنە نۇقسان كەلتىرمەۋدىڭ قامىن كۇيتتەگەن دۇرىس بولار-اۋ!

مەن وسىنداي لوگيكانىڭ جەتەگىمەن تەرگەۋدىڭ ايىپتاۋ قورىتىندىسىن بەكىتكەن پروكۋراتۋرانى پايىمدى مامىلەگە شاقىرام. قاماۋدا وتىرعان ازاماتتارعا دا وسىنداي ارااعايىندىق اقىلىمدى ايتتىم. اباقتىداعى كەزدەسۋ كەزىندە بايقاعانىم: قايراتى قايتپاعان قالپىنان اينىماعان نۇرلان مىرزا بۇل مامىلەگە مويىنسۇنعان كەيپىن تانىتتى. قاسىنداعى «اەس ءۇشىن وتىرعان»، جىگەرى جاسىماعان جىگىتتەر دە «توستاعاندا تولقىن تۋدىرۋعا» پەيىلدى ەمەس ەكەن.

ال بۇل بايلامعا ءۇشىنشى جاق - سوت نە ايتار ەكەن؟

سوتقا دا ايتار اقىل بار: جىگىتتەردىڭ التى اي تەرگەۋ اباقتىسىندا وتىرعانىن «جازا وتەلدىگە» ساناپ، ارى كەتسە، بىرەر جىلعا «بوستاندىقتى شەكتەۋ» شاراسىمەن شەشىم شىعارعانى شاپاعاتتى ءىس بولماق! قازاقستاننىڭ بۇگىنگى رەاليىندە بۇدان باسقا قانداي قيسىندى جول بولماق؟

ەرمۇرات باپي،

ءماجىلىس دەپۋتاتى

Abai.kz