"ەلگە كومەك" قايىرىمدىلىق قورىنىڭ باسشىسى ءىلياس ساريەۆكە قاتىستى تەرگەۋ باستالدى. ساريەۆ ءىرى كولەمدەگى الاياقتىق جاسادى دەگەن كۇدىككە ىلىگىپ وتىر.

بۇل تۋرالى الماتى قالالىق پوليتسيا دەپارتامەنتىنىڭ مالىمدەدى.

ءىس بويىنشا وعان قاتىستى 30-دان استام ادام جابىرلەنۋشى رەتىندە تانىلعان. قازىر ءىلياس ساريەۆ قاماۋدا وتىر.

زاڭگەر نۇرسۇلتان ورىنبەكوۆ "ەلگە كومەك" قايىرىمدىلىق قورىنىڭ باسشىسىنىڭ ارەكەتىنەن زارداپ شەككەن 4 وتباسىنىڭ وقيعاسىن باياندادى. وقيعا 2024 جىلى بولعان.

زاڭگەردىڭ ايتۋىنشا، ءىلياس ساريەۆ وتباسىلارمەن جەكە ءوزى كەزدەسىپ، ەم-دومعا اقشا جيناۋعا كومەكتەسكەن.

"كەي ادامدار Instagram-دا اۋىر ناۋقاس تۋىستارى تۋرالى جازىپ، كومەك سۇرايدى. مۇنداي جانداردى قايىرىمدىلىق قورىنىڭ وكىلدەرى ىزدەپ تابادى", – دەپ تۇسىندىرەدى ورىنبەكوۆ.

ءبىر ايەلدىڭ اكەسى ونكولوگيالىق اۋرۋمەن اۋىرعان. "ەلگە كومەك" قورى كومەك ۇسىنعان جانە قاراجات جيناۋدى باستاعان.

زاڭگەردىڭ سوزىنشە، شامامەن 14 ميلليون تەڭگە جينالعان، بىراق بۇل وتباسى ول قاراجاتتى مۇلدە الماعان. 2024 جىلدىڭ قىركۇيەگىندە ايەلدىڭ اكەسى قايتىس بولعان.

ورالدىق كىشكەنتاي ءىنجۋ دە ەم الۋى كەرەك بولعان. قور 27 ميلليون تەڭگە كولەمىندە قاراجات جيناۋ باستاماسىن جاريالاعان. ورىنبەكوۆتىڭ ايتۋىنشا، ساريەۆ ءتىپتى جەكە اۆتوكولىگىن ساتۋعا ۋادە بەرگەن. الايدا، قىزدىڭ اناسى ەشقانداي كومەك الماعانىن ايتادى. ءىنجۋ 2024 جىلدىڭ 7 تامىزىندا كوز جۇمدى.

"ادامدارعا قاراجات جينالىپ، قىز ەم قابىلداپ جاتىر دەپ ايتىلعان. انىعىندا مۇنىڭ ءبارى جالعان بولىپ شىقتى", – دەيدى زاڭگەر.

2024 جىلدىڭ قاراشا ايىندا اۋىر دياگنوز قويىلعان 2 جاسار قىز بالاعا 1,7 ميلليون تەڭگە جينالعان. الايدا اناسىنىڭ ايتۋىنشا، قىزىن ءوز قاراجاتىنا ەمدەپ جاتىر. تاعى ءبىر جاعدايدا كوزى ناشار كورەتىن بالاعا وتا جاساۋ ءۇشىن 15 ميلليون تەڭگە جينالعانى ايتىلعانىمەن، وتا جاسالماعان.

ورىنبەكوۆتىڭ ايتۋىنشا، زارداپ شەككەندەردىڭ بارلىعى ءىلياس ساريەۆتىڭ كومەگىنە ءوز ەركىمەن جۇگىنگەن. الايدا ۋادە ەتىلگەن كومەكتى الماعان سوڭ، ولار پوليتسياعا شاعىمدانعان.

"الاياقتىقتى دالەلدەۋ قيىن، ويتكەنى پوليتسيانىڭ پىكىرىنشە، ولار ناقتى زارداپ شەككەندەر بولىپ سانالمايدى. قور زارداپ شەككەندەردىڭ ەمەس، حالىقتىڭ ەرىكتى تۇردە بەرگەن اقشاسىنا يە بولعان. ياعني، قايىرىمدىلىق جاساعاندار ونى ءوز ەركىمەن جاساعان", – دەيدى ول.

زاڭگەردىڭ ايتۋىنشا، قازاقستانداعى قايىرىمدىلىق قورلارىنىڭ قىزمەتى ءىس جۇزىندە رەتتەلمەگەن. مۇنداي ۇيىمداردىڭ مىندەتتى ەسەپتىلىگى دە، مەملەكەتتىك ءاۋديتى دە جوق.

"ولاردىڭ باستى ماقساتى – جازىلۋشىلاردىڭ سەنىمىنە يە بولۋ. ولار ەشكىمگە ەسەپ بەرمەيدى. ار-ۇجدانى تازا، ادال جۇمىس ىستەيتىن قورلار دا بار. الايدا، پەريزات قايرات پەن ءىلياس ساريەۆتىڭ ىستەرى بۇل سالانىڭ باسقا قىرىن كورسەتىپ وتىر. مۇنداي ۇيىمدار اقشا اينالىمىن ۇيىمداستىرۋ، قولما-قول اقشاعا اينالدىرۋ جانە سالىق جۇيەسىنەن اينالىپ ءوتۋ ءۇشىن قۇرىلادى. اسىرەسە، بۇل ءىرى قورلارعا ءتان", – دەيدى زاڭگەر ورىنبەكوۆ.

Abai.kz