پۋتين مەن ترامپ 2 ساعاتتان استام ۋاقىت بويى سويلەستى. ترامپ بىلاي دەپ جازبا قالدىردى: «جاڭا عانا رەسەي پرەزيدەنتى ۆلاديمير پۋتينمەن ەكى ساعاتقا سوزىلعان سويلەسۋىمىز اياقتالدى. ول وتە جاقسى ءوتتى دەپ سانايمىن. رەسەي مەن ۋكراينا دەرەۋ ارادا ۇرىستى اياقتاۋ تۋرالى كەلىسسوزدەردى باستايدى، ال ودان دا ماڭىزدىسى سوعىستى تولىق اياقتاۋ بويىنشا كەلىسسوز جۇرگىزەدى. تالاپتار ەكى تاراپ اراسىندا كەلىسىلەدى، سولاي بولۋعا ءتيىس تە. ويتكەنى كەلىسسوز پروتسەسىنىڭ وزگەگە بەيمالىم تۇستارىنىڭ انىق-قانىعى ەكەۋىنە بەلگىلى عوي. اڭگىمەلەسۋ اۋانى جاقسى ءوتتى. ەگەر ولاي بولماعاندا، مەن ول جايلى ءداپ قازىر ايتار ەدىم.

رەسەي مىنا قىرعىن اياقتالعان سوڭ اقش-پەن اۋقىمدى ساۋدا جاساعىسى كەلەدى جانە مەن ول يدەيانى قولدايمىن. رەسەيدىڭ كوپتەگەن جۇمىس ورنىن اشۋ جانە ءال-اۋقاتتى ارتتىرۋ مۇمكىندىگى بار. ونىڭ پوتەنتسيالى – شەكسىز. ۋكراينا دا ءوز ەلىن قالپىنا كەلتىرۋ ساتىندە ۇلكەن ساۋدا قاتىناسىن جاساي الادى.

كەلىسسوزدەر رەسەي مەن ۋكراينا اراسىندا بىردەن باستالادى. مەن بۇل تۋرالى ۋكراينا پرەزيدەنتى ۆلاديمير زەلەنسكيگە، ەۋروپا كوميسسياسىنىڭ پرەزيدەنتى ۋرسۋلا فون دەر ليايەنگە، فرانتسيا پرەزيدەنتى ەممانۋەل ماكرونعا، يتاليا پرەمەر-ءمينيسترى دجوردجا مەلونيگە، گەرمانيا كانتسلەرى فريدريح مەرتسكە جانە فينليانديا پرەزيدەنتى الەكساندر ستۋببقا پرەزيدەنت پۋتينمەن اڭگىمەدەن كەيىنگى تەلەفون ارقىلى سويلەسۋدە حابارلادىم.

ريم پاپاسىنىڭ ايتۋىنشا، ۆاتيكان بۇل كەلىسسوزدەردىڭ ءوز اۋماعىندا وتۋىنە زور قىزىعۋشىلىق ءبىلدىردى.

پروتسەسس باستالسىن!»

ال رەسەي پرەزيدەنتى پۋتين بىلاي دەدى (تەزيستى تۇردە):

- رەسەي ۋكراينامەن ۇرىس قيمىلدارىن توقتاتۋعا مۇمكىندىك بەرەتىن مەموراندۋمدى جاساۋ بويىنشا جۇمىس ىستەۋگە ءازىر. وندا پرينتسيپتەر، مەرزىمى قامتىلۋى قاجەت.

- رەسەي مەن ۋكراينانى بىردەي قاناعاتتاندىراتىن كەلىسىم تابۋىمىز كەرەك.

- ترامپ ۇرىس قيمىلدارىن توقتاتۋ، كەلىسىمگە كەلۋ جايلى پوزيتسياسىن ايتتى. ءوز تاراپىمنان مەندە ءوز پوزيتسيامدى جەتكىزدىم.

- ىستامبۇلداعى كەزدەسۋدە بايلانىس ورناي باستادى. دەمەك ءبىز دۇرىس باعىتتامىز.

- رەسەيدىڭ بۇل قاقتىعىستاعى پوزيتسياسى ايقىن. ءبىز ءۇشىن ەڭ ماڭىزدىسى قاقتىعىستى تۋىنداتقان العىشارتتاردى رەتتەۋ بولىپ سانالدى.

قىسقاسى ايتارلىقتاي وزگەرىس جوق. ءپۋتيننىڭ «ءبىز ءۇشىن ەڭ ماڭىزدىسى قاقتىعىستى تۋىنداتقان العىشارتتاردى رەتتەۋ بولىپ سانالدى» دەۋى، رەسەيدىڭ پوزيتسياسى ەش وزگەرمەگەنىن بىلدىرەدى.

اسحات قاسەنعالي

Abai.kz