اقوردا رەزيدەنتسياسىندا ەلىمىزگە رەسمي ساپارمەن كەلگەن رۋاندا رەسپۋبليكاسىنىڭ پرەزيدەنتى پول كاگامەنى سالتاناتتى قارسى الۋ ءراسىمى ءوتتى.

مەملەكەتتەر باسشىلارى ءبىر-بىرىنە رەسمي دەلەگاتسيا مۇشەلەرىن تانىستىردى. قۇرمەت قاراۋىلىنىڭ باستىعى راپورت بەرگەن سوڭ قازاقستان مەن رۋاندانىڭ ءانۇراندارى شىرقالدى. ونان سوڭ مەملەكەت باسشىسى رۋاندا پرەزيدەنتى پول كاگامەمەن كەلىسسوز جۇرگىزدى.

قاسىم-جومارت توقاەۆ پول كاگامەگە ءىلتيپات ءبىلدىرىپ، بۇل ساپاردىڭ تاريحي ءمانى زور دەپ باعالادى. سونداي-اق قازاقستان مەن رۋاندا اراسىنداعى قارىم-قاتىناس جاڭا دەڭگەيگە شىعاتىنىن جەتكىزدى.

– ءسىزدىڭ بۇل ساپارىڭىز جانە الداعى كەلىسسوزدەر ەكىجاقتى ىقپالداستىققا تىڭ سەرپىن بەرۋ تۇرعىسىنان وتە ماڭىزدى دەپ ويلايمىن. رۋاندانىڭ ەكونوميكاسى قارقىندى دامىپ كەلەدى. مەنىڭشە، ءوزارا بايلانىستاردى نىعايتا بەرۋ قاجەت. ويتكەنى قازاقستان – ءىجو كولەمى، ءىت تەحنولوگيالار مەن جاساندى ينتەللەكتتى دامىتۋ بويىنشا وڭىردەگى كوشباسشى ەل. بۇل ءبىزدىڭ ءوزارا ءتيىمدى ىنتىماقتاستىعىمىزدى وركەندەتۋدىڭ باسىم باعىتتارى بولا الادى. سوندىقتان ءسىزدىڭ ساپارىڭىزعا ەرەكشە ءمان بەرەمىن، – دەدى قاسىم-جومارت توقاەۆ.

رۋاندا پرەزيدەنتى مەملەكەت باسشىسىنا قوناقجايلىق تانىتقانى ءۇشىن العىس ايتىپ، ەكىجاقتى ىنتىماقتاستىقتى دامىتۋعا نيەتتى ەكەنىن جەتكىزدى.

– ەلىڭىزگە شاقىرعانىڭىز ءۇشىن ريزاشىلىعىمدى بىلدىرەمىن. مەن بۇعان دەيىن قازاقستانعا 2015 جىلى كەلگەن بولاتىنمىن، بۇل مەنىڭ ەكىنشى ساپارىم. وزىڭىزبەن جانە ءسىزدىڭ كومانداڭىزبەن بىرگە ەكى ەل يگىلىگى جولىنداعى بىرلەسكەن جۇمىسىمىزدى جالعاستىرۋدىڭ مۇمكىندىكتەرىن قاراستىرامىز، – دەدى پول كاگامە.

تاراپتار قازاقستان مەن رۋاندانىڭ ساياسي، ساۋدا-ەكونوميكالىق، كولىك-لوگيستيكا، اۋىل شارۋاشىلىعى جانە تسيفرلاندىرۋ سالالارىنداعى قارىم-قاتىناستارىن دامىتۋ پەرسپەكتيۆاسىن تالقىلادى. سونداي-اق پرەزيدەنتتەر ايماقتىق جانە حالىقارالىق ماسەلەلەر تۋرالى پىكىر الماستى.

مەملەكەت باسشىسى رۋاندا پرەزيدەنتى پول كاگامەنىڭ قازاقستانعا 2015 جىلى جاساعان ساپارىنان كەيىن ەكى ەلدىڭ ءوزارا قۇرمەتكە نەگىزدەلگەن، ىنتىماقتاستىق پەن ورنىقتى دامۋدى كوزدەيتىن قارىم-قاتىناسى ايتارلىقتاي تابىسقا جەتكەنىن اتاپ ءوتتى.

پرەزيدەنت قازاقستاننىڭ افريكا مەملەكەتتەرىمەن بايلانىستى كەڭەيتۋگە ەرەكشە ءمان بەرەتىنە نازار اۋداردى.

– ءسىزدىڭ كورەگەن كوشباسشىلىعىڭىزبەن رۋاندا دامۋ داڭعىلىنا ءتۇسىپ، ينستيتۋتسيونالدى ورنىقتىلىق پەن بولاشاققا باعدارلانعان جاڭاشىلدىقتىڭ ۇلگىسىن كورسەتتى. ەلىڭىزدىڭ ەكونوميكالىق ءوسىمى 8 پايىزدان استى. بۇل – جاڭعىرتۋدىڭ جارقىن كورىنىسى. وسى ورايدا ءسىزدىڭ ەلىڭىزبەن ىنتىماقتاستىقتى دامىتۋعا ايرىقشا ءمان بەرەمىز. قازاقستان ەكىجاقتى ءتيىمدى بايلانىستاردى ناقتى جوبالار ارقىلى ىلگەرىلەتۋگە دايىن. ءسىزدىڭ ساپارىڭىز بارىسىندا قول جەتكىزىلگەن ۋاعدالاستىقتار قازاقستان مەن رۋاندا اراسىنداعى قارىم-قاتىناستى جاڭا دەڭگەيگە كوتەرەتىنىنە سەنىمدىمىن، – دەدى قاسىم-جومارت توقاەۆ.

پول كاگامە كورسەتىلگەن سىي-قۇرمەت ءۇشىن ريزاشىلىعىن ءبىلدىرىپ، قازاقستاننىڭ ەكىجاقتى ىقپالداستىقتى دامىتۋداعى كۇش-جىگەرىنە جوعارى باعا بەردى. سونداي-اق رۋاندا مەن قازاقستان اراسىنداعى سەرىكتەستىكتىڭ الەۋەتىنە توقتالىپ، ەكى ەلدىڭ وركەندەۋىنە جانە ستراتەگيالىق ديالوگتىڭ نىعايۋىنا ىقپال ەتەتىن بىرلەسكەن جوبالاردى جۇزەگە اسىرۋعا دايىن ەكەنىن جەتكىزدى.

– استاناعا ەكىنشى مارتە جولىم تۇسكەنىنە قۋانىشتىمىن. قازاقستان ۇلتتىق دامۋ جولىندا تولايىم تابىسقا جەتىپ، سونىڭ ارقاسىندا حالىقارالىق ارەناداعى ءرولى ارتىپ كەلەدى. ءبىز وزىڭىزبەن جانە ءسىزدىڭ ەلىڭىزبەن سەرىكتەس ءارى دوستاس بولعانىمىزعا ريزامىز، – دەدى رۋاندا پرەزيدەنتى.

مەملەكەتتەر باسشىلارى ەكىجاقتى ىقپالداستىقتىڭ باسىم باعىتتارىن، سونىڭ ىشىندە ساۋدا، ينۆەستيتسيا، كولىك، اۋىل شارۋاشىلىعى، اقپاراتتىق تەحنولوگيا، ەلەكتروندىق ۇكىمەت جانە قارجى سالالارىنداعى بايلانىستاردى دامىتۋعا ۋاعدالاستى.

Abai.kz