قازاقتىڭ ديماشى ەرەكشە سىيقىرى بار عاجاپ داۋسىمەن بۇكىل الەمگە ماحابباتىن ارناپ، جۇرەكتەن شىعىپ، جۇرەككە جەتكەن مۇنايداردىڭ سوزىمەن، ايگۇلدىڭ سازدى اۋەزىمەن جارىققا شىققان انىمەن الەمدى تەربەپ، ۇلكەن ستاديونداردا قازاقشا شىرقاتسا ، قازاقتىڭ ءاليحانى الەم وقىرماندارىن قازاق ادەبيەتىنە عاشىق ەتەتىن كۇن دە جاقىن، بۇيىرسا!

"قازاقستان ادەبيەتى" جوباسى اياسىندا اۋدارما گرانتتارىن شەتەلدىك باسپاگەرلەرگە ۇسىنۋ قازاقتىڭ ءىنجۋ- مارجاندارىن الەم وقىرماندارىنا تانىستىرۋعا زور مۇمكىندىك بەرەدى. 500 گرانت! 2026-2030 جىلدارى وسى جوبادا قالامى جۇيرىك نەبىر دارىندى جازۋشىلاردىڭ تۋىندىلارى الەمنىڭ بىرقاتار ەلدەرىنىڭ تىلدەرىندە سايرايتىن بولادى.

ارامىزدان كەتسە دە، ارتىنا شىعارمالارىن اماناتتاپ قالدىرعان دۇلدىلدەردىڭ شىعارمالارى دا قامتىلادى. الماتى، استانا جازۋشىلارىنىڭ عانا ەمەس، ەلىمىزدەگى بۇكىل وڭىرلەردەگى قالامگەر قاۋىمنىڭ ەڭبەكتەرىن دە بارىنشا قامتۋعا تىرىسامىز.

بۇل جوبادا الماتى، تۇركىستان، اقتاۋ، جانە بۋرابايدا اشىلاتىن رەزيدەنتسيالاردا اۆتورلارمەن بىرگە وتاندىق، شەتەلدىك اۋدارماشىلاردان قۇرالعان شىعارماشىلىق ۇجىمنىڭ قىزمەتى ۇيلەستىرىلىپ، ساپالى اۋدارما دايىنداۋ ماقساتىندا ونكۇندىك سەمينار فورماتتا جۇمىس جۇرەدى، بۇيىرسا. اۋدارما نۇسقاسىن دايىنداۋدىڭ سوڭعى ەتاپىندا شىعارماشىلىق ۇجىم رەزيدەنتسيادا كوزبە-كوز كەزدەسىپ، وعان دەيىنگى ونلاين تالقىلاعان اۋدارما ماسەلەلەرى بويىنشا سەمينار جۇمىسىندا نۇكتەسىن قويادى.

ءبىرىنشى جىلى تۇركى تىلدەس مەملەكەتتەردىڭ باسپاگەرلەرىنە، ەكىنشى جىلى ەۋرووداققا كىرەتىن مەملەكەتتەرىمەن قاتار اۋستراليا، ۇلىبريتانيا باسپاگەرلەرىنە، ءۇشىنشى جىلى امەريكا، ازيا، افريكا مەملەكەتتەرى باسپاگەرلەرىنە گرانتتار ۇسىنىلادى. ءبىر اۋدارما گرانت - ءبىر اۆتوردىڭ 320 بەتتەن تۇراتىن شىعارماسىنا بەرىلەتىن بولادى.

2026 -2030 جىلدارعا جوسپارلانعان بۇل جوبانىڭ قورىتىندى جىلىندا حالىقارالىق ادەبي فورۋم- فەستيۆال فورماتتا وتەدى، قۇداي قالاسا!

قازاقتىڭ اتىمتاي جومارتى اتانعىسى كەلەتىن قالتالى ازاماتتارى جازۋشىلارعا كورسەتەر قۇرمەتتەرىمەن جارىساتىن ءىس- شارالار لەگى جوسپارلانۋدا. باياننىڭتۇرسىنى سىيلاعان 100 پاتەردەن دە اسىرىپ جىبەرسە قوي دەمەيمىز! ايتىستا عانا سۋىرىپ سالما اقىندار مىنگەن تەمىر تۇلپارلاردىڭ كىلتتەرىن ەندى دارىندى جازۋشىلارمەن بىرگە ءدۇلدىل جازبا اقىندارعا سىيلاپ جاتسا، قازاق ادەبيەتىنىڭ قازىناسى جاقۇت دۇنيەلەرمەن تولىعا بەرەرى ءسوزسىز!

وسى جوبانى ىسكە اسىرۋعا قارجىلىق قولداۋعا مۇمكىندىكتەرى بار ءىرى بيزنەس وكىلدەرىمەن قاتار كەز كەلگەن قايىرىمدىلىق جاساۋعا دايىن قالتالى ازاماتتارمەن كەلىسسوزدەر جۇمىستارى ەندى ناقتى بيۋدجەتى انىقتالعان جوبا اياسىندا اڭگىمە وربىمەك!

جوبانىڭ يدەيا اۆتورى دا ءوزىم، كونتسەپتسياسىن دا دايىنداپ مىڭ تولعاتىپ، شارق ۇرىپ، جۇزدەگەن اداممەن كەزدەسىپ، حابارلاسىپ، كەيبىرى قۋانىپ قولداۋعا دايىن ەكەنىن بىلدىرسە، مەسەلىمدى قايتارىپ، كوڭىلىمدى تۇسىرگەندەر دە از بولعان جوق. باسىمدى تاۋعا دا سوعىپ، تاسقا دا ۇرىپ جۇگىرىپ جۇرگەنىم قاراقان باسىم ءۇشىن ەمەس، قازاققا بولسىن دەگەن اق نيەتىم ەكەنىنەن حاباردار اعايىن دا جەتەرلىك.

ءۇشبۋ سالەمىمدى قابىل العان، وسى جوباعا ۇلەس قوسا الاتىن ەلىمىزدىڭ كوزى اشىق، كوكىرەگى وياۋ ازاماتتارىن، قوعام قايراتكەرلەرىن، ينۆەستيتسيا قۇيۋعا، دەمەۋشىلىك جاساۋعا دايىن ازاماتتاردى قازاق رۋحانياتىن الەمگە تانىتار ىسكە اتسالىسۋعا شاقىرامىن!

باحىتگۇل ماحانبەتوۆا

Abai.kz