گرۋزيانىڭ پوتي پورتىندا ترانسكاسپي حالىقارالىق كولىك باعىتىنىڭ ماڭىزدى بولىگى سانالاتىن ءبىرىنشى قازاقستاندىق مۋلتيمودالدى تەرمينال جۇمىسىن باستادى، دەپ حابارلايدى قازاقپارات. 

نىسان قىتاي، قازاقستان، كاسپي تەڭىزى، ازەربايجان، گرۋزيا ءارى قاراي ەۋروپا ەلدەرىن جالعايتىن ورتا ءدالىزدىڭ بولىگىنە اينالدى.

تەرمينالدىڭ اشىلۋ سالتاناتىنا قازاقستان، گرۋزيا جانە ازەربايجان تاراپتارىنىڭ رەسمي وكىلدەرى قاتىستى.

«Poti Transterminal» اق باس ديرەكتورى ولجاس ارىقباەۆتىڭ ايتۋىنشا، جوبا گرۋزيانىڭ ەكولوگيالىق، ءورت جانە ينجەنەرلىك قاۋىپسىزدىك تالاپتارىنا تولىق ساي جۇزەگە اسىرىلعان.

نىسانعا زاماناۋي جابدىقتار ورناتىلعان. ولار: اۆستريالىق ريچتاكەرلەر مەن ساعاتىنا 25 كونتەينەر وڭدەيتىن قىتايلىق كراندار.

تەرمينالدىڭ وتكىزۋ قابىلەتى ءبىرىنشى كەزەڭدە جىلىنا 120 مىڭ توننانى قۇرايدى. بولاشاقتا بۇل اۋقىم كەڭەيۋى مۇمكىن.

كولىك مينيسترلىگى كوميتەتى توراعاسىنىڭ ورىنباسارى قاسىم تلەپوۆتىڭ ايتۋىنشا، تەرمينالدىڭ ىسكە قوسىلۋى —ترانسكاسپي حالىقارالىق كولىك باعىتى ارقىلى جۇك تاسىمالىن ارتتىرۋدا ستراتەگيالىق قادام.

«وتكەن جىلى ءبىز 4,5 ملن توننا جۇك تاسىمالدادىق، ءوسىم 60% قۇرادى. الداعى ءۇش جىلدا ءبول كورسەتكىشتى جىلىنا 10 ملن-عا جەتكىزۋدى جوسپارلاپ وتىرمىز. پوتي تەرمينالى قىتايدان ەۋروپاعا جونەلتىلەتىن جۇكتەردىڭ نەگىزگى بولىگىن وڭدەۋگە مۇمكىندىك بەرەدى»،—دەدى ول.

ايتا كەتەيىك، بىلتىر قازاقستان مەن گرۋزيا اراسىندا ترانسكاسپي حالىقارالىق كولىك باعىتى ارقىلى جۇك تاسىمالداۋ كولەمى 62 پايىزعا ارتقان ەدى. 

پوتي پورتى — رەسەيدى اينالىپ وتەتىن ترانزيتتىك مارشرۋت قۇرىلىسىنىڭ ماڭىزدى بۋىنى. 2024 جىلى كونتەينەر اينالىمى 545 297 TEU-عا جەتتى.

Abai.kz