قر مادەنيەت جانە اقپارات مينيسترلىگىنىڭ جوسپارىنا سايكەس قر ەڭبەك سىڭىرگەن «سالتانات» مەملەكەتتىك بي ءانسامبلىنىڭ 70 جىلدىعىنا ارنالعان «بي كەرۋەنى» اتتى كونتسەرت تۇركىستان مەن شىمكەنت قالاسىندا جوعارى دەڭگەيدە ءوتتى.

كەشتىڭ شىمىلدىعى «ەل سالتاناتى» بي قويىلىمىمەن اشىلدى. بالەت ارتيستەرى مىڭ بۇرالا بيلەپ، قازاق حالقىنىڭ جانە الەم حالىقتارىنىڭ ءبيىن اسقان شەبەرلىكپەن ورىندادى.

اتالعان شاراعا تۇركىستان وبلىسى اكىمىنىڭ ورىنباسارى ەرتاي التاەۆ ارنايى قاتىسىپ، بي ۇجىمىن 70 جىلدىق مەرەيتويىمەن قۇتتىقتادى. تۇركىستان وبلىسى بويىنشا ەكونوميكالىق تەرگەپ-تەكسەرۋ دەپارتامەنتى باسشىسىنىڭ ورىنباسارى مۇرات وسپانوۆ ءوز كەزەگىندە بىرقاتار ماماندارعا العىس حات تابىستادى. قر مادەنيەت قايراتكەرى، «قۇرمەت» وردەنىنىڭ جانە «ەرەن ەڭبەگى ءۇشىن» مەدالىنىڭ يەگەرى، تۇركىستان قالالىق ايەلدەر القىسىنىڭ ءتورايىمى، ءبيشى ۇلجان مۇستافاەۆا دا الىستان ات تەرلەتىپ كەلگەن بي ۇجىمىنا ىزگى لەبىزىن ارنادى. انسامبل ديرەكتورى ەلۋباي كەنجاليەۆ كەلگەن كورەرمەنگە العىسىن ءبىلدىردى.

كەشىمىزدىڭ قوناعى  “قر مادەنيەت قايراتكەرى”، “قۇرمەت” وردەنىنىڭ يەگەرى، ءانشى ومىرقۇل اينيازوۆ «تۇركىستان»، «قازاقستان-اتامەكەنىم» اندەرىن شىرقادى.

بيىل «سالتانات» مەملەكەتتىك بي انسامبلىنە 70 جىل. وسى ايتۋلى مەرەيتويعا وراي العاش رەت «بي كەرۋەنى» اتتى جوبا ەلىمىزدەگى ەڭ كونە ءارى تاريحي، مادەني تۇرعىدان اسا ماڭىزدى ورىن الاتىن كيەلى تۇركىستان قالاسىنان باستاۋ الدى.  كورەرمەندەر ەرەكشە اسەرگە بولەنىپ، ونەر ۇجىمىنا قۇرمەت-قوشەمەت كورسەتتى.

ءانسامبلدىڭ بالەت ارتيستەرى گاسترولدىك ساپار كەزىندە تۇركىستان قالاسىنىڭ  تۇرعىندارىمەن الەمگە ايگىلى ءانشى، قر حالىق ءارتىسى ديماش قۇدايبەرگەننىڭ اقىن ساكەن سەيفۋلليننىڭ سوزىنە جازىلعان، جۋىردا عانا بەينەبايانى جارىققا شىققان «تاۋ ىشىندە» انىنە فلەشموب ءتۇسىردى. قازاقستان رەسپۋبليكاسىنىڭ مەملەكەتتىك ءانۇرانىن ورىندادى.  انسامبل وسكەلەڭ ۇرپاققا عاجايىپ ونەر ارقىلى ەستەتيكالىق تاربيە بەرىپ، جاستاردىڭ ۇلتتىق پاتريوتتىق سانا سەزىمىن قالىپتاستىرۋ جولىندا ايانباي ونەر كورسەتىپ كەلەدى.

ايتا كەتەيىك، «بي كەرۋەنى» جوباسى اياسىندا تۇركىستان مەن شىمكەنت قالالارىندا شەبەرلىك ساعاتتارى ۇيىمداستىرىلىپ، وڭىردەگى بي ۇجىمدارىنا تاجىريبەلى ماماندار بي ونەرىنىڭ قىر-سىرىمەن ءبولىستى. تۇركىستان قالاسىنان 200, شىمكەنت قالاسىنان 100-دەن اسا حورەوگراف شەبەرلىك ساعاتىنا قاتىستى. ءار قاتىسۋشىعا تەگىن سەرتيفيكات تابىستالدى. بۇل جوبا كۇزدە باتىس، شىعىس، سولتۇستىك قازاقستان وڭىرىندە جالعاسىن تابادى.

Abai.kz