"16 ملن قازاقستاندىقتىڭ جەكە دەرەگى تارالدى" دەگەن اقپاراتقا قاتىستى مينيسترلىك جاۋاپ بەردى

تسيفرلىق دامۋ مينيسترلىگى قازىر جاعدايدى تولىق تەكسەرىپ جاتقانىن مالىمدەدى. سوڭعى اقپارات بويىنشا مەملەكەتتىك ورگانداردىڭ بازالارىنا حاكەرلەر شابۋىلداماعان.

اقپاراتتى كيبەرشابۋىلدى تالداۋ جانە تەرگەۋ ورتالىعى راستاپ وتىر. جابىق ارنالار ارقىلى تاراعان مالىمەتتەردىڭ ىشىندە ازاماتتاردىڭ تولىق اتى-ءجونى، تۋعان كۇنى، جەكە سايكەستەندىرۋ ءنومىرى، جىنىسى، ازاماتتىعى، تەلەفون ءنومىرى، مەكەن جايى جانە باسقا دەرەكتەرى بار، دەپ جازادى inbusiness.kz سايتى.

مينيسترلىك وكىلدەرىنىڭ ايتۋىنشا، وسى جولى تاراپ كەتكەن مالىمەتتەر جەكە كومپانيالاردىڭ، ميكروقارجىلىق ۇيىمداردىڭ بازاسىنان الىنۋى نەمەسە ەسكى اقپاراتتار جيناقتالىپ قايتا جاريالانۋى مۇمكىن.

قر ءتسدياوم اقپاراتتىق قاۋىپسىزدىك كوميتەتى قۇقىق قورعاۋ جانە ارنايى ورگاندارمەن بىرلەسىپ، ۇسىنىلعان مالىمەتتەردىڭ شىنايىلىعى مەن وزەكتىلىگىن انىقتاۋ ماقساتىندا كەشەندى تەكسەرۋدى باستاعانىن حابارلادى.

"العاشقى تالداۋ بۇل دەرەكتەردىڭ مەملەكەتتىك ەمەس، ياعني جەكەمەنشىك اقپاراتتىق جۇيەلەردەن الىنۋى مۇمكىن ەكەنىن كورسەتىپ وتىر. بۇگىنگى تاڭدا مەملەكەتتىك اقپاراتتىق جۇيەلەردەن دەربەس دەرەكتەردىڭ تارالۋى نەمەسە حاكەرلىك شابۋىلدار ناتيجەسىندە بۇزىلۋى تىركەلگەن جوق. تەكسەرۋ تولىق اياقتالعانعا دەيىن قانداي دا ءبىر قورىتىندى جاساۋ نەمەسە اقپاراتتىڭ شىنايىلىعىن راستاۋ ەرتە.

ەگەر ازاماتتىڭ دەربەس دەرەكتەرى تاراعان مالىمەتتەر اراسىندا بولسا، ول تۋرالى ەلەكتروندىق ۇكىمەت پورتالى (eGov) ارقىلى جەكە كابينەتىنە حابارلاما جولدانادى", – دەلىنگەن مينيسترلىك تاراتقان حابارلامادا.

ايتا كەتەيىك، بۇعان دەيىنگى وسىنداي جاعدايلاردا جاريالانعان دەرەكتەر ەسكى اقپاراتتىق بازالاردان – نەگىزىنەن قىزمەت كورسەتۋ سالالارى مەن ميكروقارجى ۇيىمدارىنان الىنعان ەسكى مالىمەتتەر بولعان.

Abai.kz