«ورتالىق ازيا – قىتاي» ءسامميتى استانادا اشىلعالى بەرى قىتايلىق باسىلىمدار دا ءبىز تۋرالى ءجيى جازا باستادى. بۇگىن نازارلارىڭىزعا China Daily اقپاراتتىق اگەنتتىگىنىڭ جاريالاعان قىسقا شولۋىن ۇسىنامىز.

«شىڭجاڭنىڭ قورعاس قالاسىندا قازاقستاننان كەلگەن ستۋدەنتتەر قىتايلىق مامانداردان ەلەكتروندى ساۋدا جۇرگىزۋدىڭ قىر-سىرىن ۇيرەنۋدە. ولار ءۇش اي بويى تىكەلەي ەفيردە تاۋار جارنامالاۋدان باستاپ، قىتاي ءتىلىن مەڭگەرۋگە دەيىنگى اۋقىمدى باعدارلاماعا قاتىسىپ جاتىر.

الماتىداعى حالىقارالىق قازاق-قىتاي ءتىل كوللەدجىنەن كەلگەن 30 ستۋدەنتتىڭ قاتارىندا توعجان قاناتقىزى دا بار. ول livestream ارقىلى كورەرمەندەرگە ونىمدەردى تانىستىرىپ، قىتايلىق كوسمەتيكا مەن اس ۇيگە ارنالعان بۇيىمداردىڭ قازاق تۇتىنۋشىلارى اراسىندا ۇلكەن سۇرانىسقا يە ەكەنىن ايتادى.

– قىتاي مەن قازاقستان اراسىنداعى ساۋدادا ەلەكتروندى كوممەرتسيانىڭ ماڭىزى ارتىپ كەلەدى. وسى سالادا تاجىريبە جيناقتاۋ — مەن ءۇشىن ۇلكەن مۇمكىندىك، – دەيدى توعجان.

جاستار قىتاي مەن قازاقستان شەكاراسىنداعى قورعاس حالىقارالىق ىنتىماقتاستىق ورتالىعىندا ءبىلىم الۋدا. بۇل ورتالىق – قىتايدىڭ شەكارالاس ەلدەرمەن قۇرعان العاشقى ساۋدا ايماعى. مۇندا ستۋدەنتتەرگە ارناپ ارنايى e-commerce پلاتفورماسى مەن ءتىل كۋرستارى ۇيىمداستىرىلعان.

باعدارلامانى جۇزەگە اسىرىپ وتىرعان «تۋنتسزيانگۋنچۋان» حالىقارالىق ساۋدا كومپانياسى الداعى ۋاقىتتا الماتىدا قويما اشىپ، livestream جۇرگىزەتىن جاستار توبىن قۇرۋدى جوسپارلاپ وتىر. كومپانيا باسشىسى گو چجيگۋيدىڭ ايتۋىنشا، ەكى ەلدىڭ مادەنيەتىن مەڭگەرگەن جاستار – بولاشاق نارىق ءۇشىن تاپتىرماس كادر.

ساۋدا ورتالىعىنداعى Yiwu حالىقارالىق كەشەنىندە تاعىلىمدامادان ءوتىپ جاتقان تاعى ءبىر جاس – جەڭىس جەكسەمباەۆ. ول قىتايلىق كوتەرمە ساۋداگەرلەردىڭ ونىمدەرىن جارنامالايتىن بەينەروليكتەر تۇسىرۋمەن اينالىسادى.

– قىتايدا بيزنەسكە جول اشىق. قازاقستاندا دا قىتايلىق كومپانيالار كوبەيىپ كەلەدى. بولاشاقتا سولاردىڭ بىرىندە جۇمىس ىستەگىم كەلەدى، – دەيدى جەڭىس.

وقۋ باعدارلاماسىنىڭ جەتەكشىسى، سينتسزياندىق قازاق سۇلۋباي نۇرياقىپ ستۋدەنتتەردىڭ شىعارماشىلىعىنا جوعارى باعا بەردى.

– بۇل باعدارلاما جىل سايىن تۇراقتى تۇردە جالعاسادى. قازاق جاستارى ەكى ەل اراسىن جاقىنداتاتىن التىن كوپىرگە اينالۋى مۇمكىن، – دەيدى ول».

Abai.kz