"قازمۇنايگاز" ۇك اق باسقارما توراعاسى اسحات حاسەنوۆ "Eni SpA" كومپانياسىنىڭ جاھاندىق تابيعي رەسۋرستار ءبولىمىنىڭ بارلاۋ جانە ءوندىرۋ جونىندەگى ديرەكتورى لۋكا ۆينياتيمەن كەزدەستى، دەپ حابارلادى كومپانيانىڭ ءباسپاسوز قىزمەتى.

تاراپتار سولتۇستىك كاسپي جانە قاراشىعاناق جوبالارىن ىسكە اسىرۋ بارىسى، قازاقستاندىق كادرلاردى دايارلاۋ ماسەلەلەرى، سونداي-اق گيبريدتى ەلەكتر ستانتسياسىن سالۋ جانە گەولوگيالىق بارلاۋ سالاسىنداعى ىنتىماقتاستىقتى كەڭەيتۋ ماسەلەلەرى تالقىلاندى.

كەزدەسۋدە ا.حاسەنوۆ قاشاعان كەن ورنىن ودان ءارى تولىق يگەرۋ باعىتىنداعى جوسپارلارعا توقتالا كەلە، ءتيىستى ءىس-شارالاردى پىسىقتاۋ بويىنشا كۇش-جىگەردى بىرىكتىرۋ ماڭىزىن اتاپ ءوتتى. سونداي-اق قمگ-نىڭ NCOC جانە KPO-داعى قازاقستاندىق ماماندار سانىن كوبەيتۋ باسىمدىلىعىن ەسكەرە وتىرىپ، 2020-2025 جىلدارعا ارنالعان جەرگىلىكتى كادرلار ۇلەسىن ارتتىرۋ باعدارلاماسىن 2030 جىلعا دەيىنگى كەزەڭگە جاڭارتۋ تالاپ ەتىلەدى.

ماڭعىستاۋ وبلىسى جاڭاوزەن قالاسىنداعى قۋاتى 247 مۆت بولاتىن گيبريدتى ەلەكتر ستانتسياسى قۇرىلىسىنىڭ بارىسى دا كەزدەسۋدە ءسوز بولدى. گيبريدتى ەلەكتر ستانتسيا قۇرىلىسىن جۇرگىزۋ بارىسىندا 800-گە جۋىق ادام تارتىلادى، وبەكت پايدالانۋعا بەرىلگەننەن كەيىن 70-كە دەيىن جاڭا جۇمىس ورنى اشىلادى. كۇن ەلەكتر ستانتسياسى 2025 جىلدىڭ III توقسانىندا، ال گاز جانە جەل ەلەكتر ستانتسيالارى 2026 جىلى ىسكە قوسىلادى دەپ جوسپارلانعان.

ەكىجاقتى ىنتىماقتاستىقتىڭ جاڭا باعىتتارىنىڭ ءبىرى – گەولوگيالىق بارلاۋ. بيىل Eni كومپانياسى قمگ-نىڭ الەۋەتى جوعارى جاڭا جوبالارى تانىستىرىلعان روۋد-شوۋعا شاقىرىلدى. قازىرگى ۋاقىتتا اتالعان ۋچاسكەلەردى باعالاۋ جۇرگىزىلىپ جاتىر.

ال، 2025 جىلعى 5 ايدىڭ قورىتىندىسى بويىنشا قاشاعاندا 7,7 ملن توننا مۇناي ءوندىرىلدى. 2025 جىلعا ارنالعان جوسپار – 18 ملن توننا.

قاراشىعاناقتا 2025 جىلدىڭ 5 ايىندا 4,8 ملن توننا مۇناي ءوندىرىلدى. بيىل كەن ورنىندا 11,14 ملن توننا مۇناي جانە 25,57 ملرد تەكشە مەتر گاز ءوندىرۋ جوسپارلانعان.

Abai.kz